សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពព័ត៌មានពី BBC បានរាយការណ៍ថា ចិន និងសហរដ្ឋអាម៉េរិក បានចោទប្រកាន់គ្នាទៅវិញទៅមកអំពីការបំពានយ៉ាងធ្ងន់ធ្ងរលើកិច្ចព្រមព្រៀងបន្ថយសម្ពាធពាណិជ្ជកម្មរយៈពេលខ្លីរបស់ពួកគេ។
កាលពីថ្ងៃចន្ទសប្ដាហ៍នេះ ទីក្រុងប៉េកាំងបាននិយាយថា អាម៉េរិកបានរំលោភលើកិច្ចព្រមព្រៀងរួមមានការបញ្ឈប់ការលក់កម្មវិធីរចនាបន្ទះឈីបទៅឱ្យក្រុមហ៊ុនចិន, ការព្រមានប្រឆាំងមិនឲ្យប្រើប្រាស់បន្ទះឈីបដែលផលិតដោយក្រុមហ៊ុនបច្ចេកវិទ្យាចិន Huawei, និងការលុបចោលទិដ្ឋាការសម្រាប់និស្សិតចិន។ ក្រសួងពាណិជ្ជកម្មចិន បាននិយាយថា ទីក្រុងវ៉ាស៊ីនតោនបានបំពានយ៉ាងធ្ងន់ធ្ងរលើកិច្ចព្រមព្រៀងដែលសម្រេចបានក្នុងអំឡុងកិច្ចពិភាក្សានៅទីក្រុងហ្សឺណែវកាលពីខែមុន នៅពេលដែលប្រទេសទាំងពីរបានបន្ទាបពន្ធលើទំនិញនាំចូលពីគ្នាទៅវិញទៅមក។ ប្រសិនបើអាម៉េរិកធ្វើតាមចិត្តខ្លួនឯងដែលប៉ះពាល់ដល់ផលប្រយោជន៍របស់ប្រទេសចិន នោះចិននឹងបន្តចាត់វិធានការយ៉ាងម៉ឺងម៉ាត់ និងខ្លាំងក្លាដើម្បីការពារសិទ្ធិ និងផលប្រយោជន៍ស្របច្បាប់របស់ខ្លួន។ លើសពីនេះ សកម្មភាពរបស់អាម៉េរិកក៏បានរំលោភបំពានយ៉ាងធ្ងន់ធ្ងរផងដែរចំពោះការព្រមព្រៀងគ្នាក្នុងអំឡុងពេលសន្ទនាតាមទូរស័ព្ទរវាងប្រធានាធិបតីចិន Xi Jinping និងប្រធានាធិបតី Donald Trump កាលពីខែមករា។
ការឆ្លើយតបរបស់ចិនបានកើតឡើងបន្ទាប់ពី Trump និយាយកាលពីថ្ងៃសុក្រថា ប្រទេសចិនបានបំពានទាំងស្រុងលើកិច្ចព្រមព្រៀងរបស់ខ្លួនជាមួយនឹងអាម៉េរិក ប៉ុន្តែលោកមិនបានផ្តល់ព័ត៌មានលម្អិតនោះទេ។ អ្នកតំណាងពាណិជ្ជកម្ម Jamieson Greer លើកឡើងថា ចិនមិនបានដកចេញរបាំងពាណិជ្ជកម្មមិនមែនពន្ធ ដូចដែលបានព្រមព្រៀងគ្នានោះទេ។ ទោះជាយ៉ាងណាក្តី អ្នកវិភាគសង្កេតឃើញថា ចំណុចនៃការឈ្លោះប្រកែកគ្នាពាក់ព័ន្ធនឹងការគ្រប់គ្រងការនាំចេញរបស់ទីក្រុងប៉េកាំងលើរ៉ែកម្រ និងផលិតផលដែលពាក់ព័ន្ធ ខណៈដែលអាម៉េរិករឹតបន្តឹងការលក់គ្រឿងបង្គុំផលិតឈីបទៅឲ្យក្រុមហ៊ុនចិន។ បន្ទាប់ពីមានកិច្ចពិភាក្សានៅទីក្រុងហ្សឺណេវកាលពីខែឧសភា មន្ត្រីអាម៉េរិកបានរំពឹងថា ប្រទេសចិននឹងបន្ធូរបន្ថយការរឹតបន្តឹងការនាំចេញសារធាតុរ៉ែកម្រទាំងនោះ ដែលជាផ្នែកសំខាន់ក្នុងការផលិតចាប់តាំងពីគ្រឿងអេឡិចត្រូនិក ទូរស័ព្ទ និងរថយន្តអគ្គិសនី រហូតដល់សព្វាវុធធំៗ ដូចជា យន្តហោះចម្បាំង F-35 និងប្រព័ន្ធមីស៊ីលជាដើម។ យ៉ាងណាមិញ ចិនមិនបានដកការរឹតបន្តឹងនេះទេ ដែលបណ្តាលឱ្យរដ្ឋបាល Trump មិនសប្បាយចិត្ត និងជំរុញឱ្យមានវិធានការជាបន្តបន្ទាប់ថ្មីៗនេះលើប្រទេសចិន។ ថ្មីៗនេះ ភាពតានតឹងបានកើនឡើងបន្ថែមទៀត ដោយសារអាម៉េរិកកំណត់ការលក់បច្ចេកវិទ្យាសំខាន់ៗទៅកាន់ប្រទេសចិន និងដាក់កម្រិតលើចំនួននិស្សិតចិនដែលកំពុងសិក្សានៅអាម៉េរិក។
នៅឯកិច្ចប្រជុំនៅទីក្រុងហ្សឺណែវកាលពីខែឧសភា មហាអំណាចទាំងពីរព្រមព្រៀងគ្នាបន្ថយសម្ពាធពាណិជ្ជកម្មសម្រាប់រយៈពេលខ្លី ៩០ ថ្ងៃ ដោយអាម៉េរិកបានទម្លាក់ពន្ធលើទំនិញពីប្រទេសចិនពី ១៤៥% មកត្រឹម ៣០% ខណៈដែលចិនបន្ទាបពន្ធលើទំនិញនាំចូលពីអាម៉េរិកពី ១២៥% មកត្រឹម ១០%។ កិច្ចព្រមព្រៀងដែលសម្រេចបាននៅទីក្រុងហ្សឺណែវបានធ្វើឱ្យអ្នកវិភាគជាច្រើនមានការភ្ញាក់ផ្អើល និងសង្ឃឹមថាភាគីទាំងពីរអាចឈានដល់កិច្ចព្រមព្រៀង។ យ៉ាងណាមិញ ជម្លោះរវាងមហាអំណាចទាំងពីកំពុងផ្ទុះឡើងម្តងទៀត ដែលគេកំពុងព្រួយបារម្ភថា តើភាពផុយស្រួយនៃកិច្ចព្រមព្រៀងរយៈពេលខ្លីនាពេលបច្ចុប្បន្ននេះអាចមានបញ្ហាប្រឈមយ៉ាងណាក្នុងការឈានដល់កិច្ចព្រមព្រៀងរយៈពេលវែង?
ទោះបីជាការចោទប្រកាន់ថ្មីៗអាចបង្ហាញថាកិច្ចពិភាក្សារវាងទីក្រុងវ៉ាស៊ីនតោន និងទីក្រុងប៉េកាំងនឹងដំណើរការមិនរលូនក៏ដោយ ប៉ុន្តែមន្ត្រីសេតវិមានកំពូលពីររូបបានលើកឡើងថា Trump និង Xi អាចជួបពិភាក្សាគ្នាក្នុងពេលឆាប់ៗនេះ ហើយ៕
Account
Security
Favourite Content