សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ ថ្នាក់ដឹកនាំជាន់ខ្ពស់ កម្ពុជា និងជប៉ុន បានប្រកាសដាក់ឱ្យដំណើរការជាផ្លូវការនូវ «ក្រុមសហបង្កើតធុរកិច្ចកម្ពុជា-ជប៉ុន (Business Co-Creation Team -BCT)» ក្នុងគោលបំណងជំរុញការវិនិយោគរបស់ជប៉ុននៅកម្ពុជា តាមរយៈកិច្ចសម្របសម្រួលកាន់តែជិតស្និទ្ធរវាងរដ្ឋាភិបាល និងអ្នកធុរកិច្ច និងការគាំទ្រពីគ្រប់ភាគីពាក់ព័ន្ធសម្រាប់វិនិយោគិន។ នៅក្នុងកិច្ចការបង្កើតក្រុម BCT នេះផងដែរ ក៏បានទទួលការព្រមព្រៀងពីនាយករដ្ឋមន្ត្រីជប៉ុន និងកម្ពុជា ក្នុងកិច្ចប្រជុំកំពូលជប៉ុន-កម្ពុជា កាលពីអំឡុងខែឧសភា ឆ្នាំ២០២៥កន្លងទៅ។
សូមជម្រាបថា ពិធីប្រកាសចាប់ផ្តើមដំណើការក្រុមសហបង្កើតធុរកិច្ចជប៉ុន-កម្ពុជា ត្រូវបានធ្វើឡើងកាលពីថ្ងៃដើមសប្តាហ៍នេះ នៅនិវេសនដ្ឋានអគ្គរាជទូត ក្រោមវត្តមានឯកអគ្គរាជទូតជប៉ុនប្រចាំនៅកម្ពុជា លោក អ៊ូអិណុ អាត់ស៊ូស៊ី និងឯកឧត្តម ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ ក្រុមប្រឹក្សាអភិវឌ្ឍន៍កម្ពុជា។
លោក UENO Atsushi បានថ្លែងថា ៖ BCT ជាលទ្ធផលសំខាន់បំផុតមួយនៃដំណើរទស្សនកិច្ចផ្លូវការលើកដំបូងរបស់សម្តេចបវរធិបតីនាយករដ្ឋមន្ត្រី ហ៊ុន ម៉ាណែត ទៅកាន់ប្រទេសជប៉ុន កាលពីអំឡុងខែឧសភា ឆ្នាំ២០២៥ ដោយសម្ដេចបានជួបប្រជុំកំពូលជាមួយនាយករដ្ឋមន្ត្រីជប៉ុន លោក ISHIBA Shegeru ហើយមេដឹកនាំនៃប្រទេសទាំងពីរបានឯកភាពគ្នាលើ «កញ្ចប់សហបង្កើតសេដ្ឋកិច្ច»។
លោកបានមានប្រសាសន៍ថា៖
«កញ្ចប់សហបង្កើតសេដ្ឋកិច្ច» ផ្ទុកដោយគំនិតល្អៗជាច្រើនដែលមានគោលបំណងលើកកម្ពស់ការវិនិយោគបន្ថែមទៀតពីក្រុមហ៊ុនជប៉ុននៅក្នុងប្រទេសកម្ពុជា ដោយក្នុងចំណោមគំនិតទាំងនោះ BCT គឺជាចំណុចស្នូលដ៏សំខាន់បំផុត។ ការបង្កើត BCT ឆ្លុះបញ្ចាំងពីការប្តេជ្ញាចិត្តយ៉ាងមុតមាំរបស់រដ្ឋាភិបាលទាំងពីរ ក្នុងការលើកកម្ពស់ការវិនិយោគរបស់ជប៉ុនបន្ថែមទៀតនៅកម្ពុជា ដោយកត់សម្គាល់ថា គំនិតផ្តួចផ្តើមនេះគឺផ្អែកលើកិច្ចព្រមព្រៀងដែលសម្រេចបានរវាងមេដឹកនាំកំពូលនៃប្រទេសជប៉ុន និងកម្ពុជា»។
យោងតាមលោកឯកអគ្គរាជទូតបានឲ្យដឹងថា កត្តាជំរុញដ៏សំខាន់មួយនៅពីក្រោយការបង្កើត BCT គឺតម្រូវការដ៏ខ្លាំងក្លាពីក្រុមហ៊ុនជប៉ុន ទាំងក្រុមហ៊ុនដែលកំពុងប្រតិបត្តិការនៅក្នុងប្រទេសកម្ពុជា និងវិនិយោគិនដែលកំពុងពិចារណាវិនិយោគនៅកម្ពុជា សម្រាប់ទទួលបានព័ត៌មានកាន់តែច្បាស់ ការសម្របសម្រួលលឿនជាងមុន និងដំណោះស្រាយជាក់ស្តែងចំពោះបញ្ហាប្រឈមអាជីវកម្ម។
ជាមួយគ្នានេះ ដើម្បីធានាបាននូវប្រសិទ្ធភាពនៃ BCT ប្រទេសជប៉ុននឹងផ្តល់ការគាំទ្រដល់ការកសាងសមត្ថភាព រួមទាំងកម្មវិធីបណ្តុះបណ្តាលនៅប្រទេសជប៉ុនដែលចាប់ផ្តើមនៅថ្ងៃទី១៩ ខែមករា ដោយសមាជិក BCT នឹងជួបជាមួយ JETRO ក្រុមហ៊ុនពាណិជ្ជកម្មធំៗ និងតំណាងសហគ្រាសធុនតូច និងមធ្យមមួយចំនួនផងដែរ។ ការបណ្តុះបណ្តាលនេះ នឹងផ្តោតលើការយល់ដឹងអំពីតម្រូវការអាជីវកម្មជប៉ុន និងបញ្ហាប្រឈមដែលក្រុមហ៊ុនជប៉ុនជួបប្រទះនៅពេលចូល ឬពង្រីកអាជីវកម្មរបស់ពួកគេនៅក្នុងប្រទេសកម្ពុជា។
ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ នៃក្រុមប្រឹក្សាអភិវឌ្ឍន៍កម្ពុជា(CDC)បានមានប្រសាសន៍ថា ដំណើរទស្សនកិច្ចនាពេលខាងមុខទៅកាន់ប្រទេសជប៉ុន គឺជាឱកាសដ៏មានតម្លៃសម្រាប់សមាជិក BCT ដើម្បីរៀនសូត្រដោយផ្ទាល់ពីវិនិយោគិនជប៉ុន។ វិនិយោគិនជប៉ុន ក៏ដូចជាវិនិយោគិនបរទេសដទៃទៀតដែរ មានជម្រើសទៅវិនិយោគប្រទេសផ្សេងៗ ដែលធ្វើឱ្យកម្ពុជាមានការទទួលខុសត្រូវក្នុងការផ្តល់ហេតុផលដ៏គួរឱ្យទាក់ទាញសម្រាប់ពួកគេក្នុងការវិនិយោគនៅក្នុងប្រទេស។
ឯកឧត្តមឧបនាយករដ្ឋមន្ត្រី លើកឡើងថា៖
«ការងាររបស់យើង គឺស្តាប់ ស្វែងយល់ពីអ្វីដែលវិនិយោគិនជប៉ុនពិតជាត្រូវការមុនពេលពួកគេធ្វើការសម្រេចចិត្តវិនិយោគ និងធ្វើការរួមគ្នាដើម្បីបង្កើតលក្ខខណ្ឌត្រឹមត្រូវសម្រាប់ពួកគេក្នុងការវិនិយោគនៅកម្ពុជា។ វិនិយោគិនជប៉ុនត្រូវបានគេវាយតម្លៃខ្ពស់ មិនត្រឹមតែសម្រាប់ការបង្កើតការងារដែលមានគុណភាពសម្រាប់ប្រជាជនកម្ពុជាប៉ុណ្ណោះទេ ប៉ុន្តែថែមទាំងសម្រាប់ការប្តេជ្ញាចិត្តយ៉ាងមុតមាំរបស់ពួកគេចំពោះការទទួលខុសត្រូវសង្គមរបស់ក្រុមហ៊ុន និងការរួមចំណែកកាន់តែទូលំទូលាយដល់សង្គមផងដែរ»។
នៅក្នុងឱកាសជាមួយគ្នានេះដែរ លោកឧបនាយករដ្ឋមន្ត្រីបានជំរុញឱ្យសមាជិក BCT ផ្តោតលើការរៀនសូត្រ និងការស្តាប់ក្នុងអំឡុងពេលទស្សនកិច្ចនៅប្រទេសជប៉ុនរបស់ពួកគេ និងនាំយកចំណេះដឹងដែលទទួលបានមកវិញដើម្បីចែករំលែកជាមួយស្ថាប័នរដ្ឋាភិបាលផ្សេងទៀត និង CDC ដើម្បីពង្រឹងកិច្ចខិតខំប្រឹងប្រែងលើកកម្ពស់ការវិនិយោគរបស់ប្រទេសកម្ពុជាបន្ថែមទៀត៕
Account
Security
Favourite Content