ភ្នំពេញ៖ គណៈប្រតិភូក្រុងគីតាគ្យូស៊ូ ប្រទេសជប៉ុន បានបង្ហាញចំណាប់អារម្មណ៍ និងគោលបំណងពង្រីកប្រតិបត្តិការអាជីវកម្មទឹកស្អាតរបស់ខ្លួននៅកម្ពុជា។ គោលបំណងនេះត្រូវបានបញ្ជាក់នៅក្នុងកិច្ចជំនួបជាមួយឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ កាលពីថ្ងៃទី១៣ ខែមករា ឆ្នាំ២០២៥ នាទីស្ដីការក្រសួង។

គណៈប្រតិភូ ដែលជាអ្នកជំនាញវិនិយោគវិស័យទឹកស្អាតនេះដឹកនាំដោយឯកឧត្តម Eguchi Tetsuro អភិបាលរងទីក្រុងគីតាគ្យូស៊ូ រួមមានតំណាង អង្គភាពទឹកស្អាត និងទឹកកខ្វក់របស់ក្រុង សមាគមអាជីវកម្មទឹកស្អាតក្រៅប្រទេសនៃទីក្រុងគីតាគ្យូស៊ូ (KOWBA) និងតំណាងក្រុមហ៊ុនឯកជនជប៉ុន។

ឯកឧត្តម ហែម វណ្ណឌី បានថ្លែងអំណរគុណដល់រដ្ឋាភិបាល និងប្រជាជនគីតាគ្យូស៊ូ ចំពោះការបន្តកិច្ចគាំទ្រវិស័យទឹកស្អាតរបស់កម្ពុជា ព្រមទាំងបានរំលេចឱ្យមានដំណើរទស្សនកិច្ចរបស់គណៈប្រតិភូ ដែលធ្វើឡើងស្របពេលនឹងសិក្ខាសា​លាស្តីពីទឹកស្អាត និងទឹកកខ្វក់ កម្ពុជា-ជប៉ុន ដែលនឹងរៀបចំឡើងនៅថ្ងៃខាងមុខនេះ។

ឯកឧត្តមបានលើកឡើងថា៖

«យើងរីករាយដែលទីក្រុងគីតាគ្យូស៊ូបាននាំយកក្រុមហ៊ុនក្នុងវិស័យទឹកស្អាតជាច្រើនរបស់ជប៉ុនមកសហការជាមួយកម្ពុជា។ វិស័យនេះមានសារសំខាន់មិនត្រឹមតែសម្រាប់សុខភាពសាធារណៈ និងការប្រើប្រាស់ប្រចាំថ្ងៃប៉ុណ្ណោះទេ ប៉ុន្តែក៏សម្រាប់ជំរុញវិស័យធុរកិច្ច និងការអភិវឌ្ឍសេដ្ឋកិច្ចផងដែរ»។

ឯកឧត្តមរដ្ឋមន្ត្រីបានជម្រាបជូនគណៈប្រតិភូថា ទោះបីកម្ពុជា និងជប៉ុនបានសម្រេចវឌ្ឍនភាពគួរឱ្យកត់សម្គាល់ជាមួយគ្នា ក្នុងរយៈពេលប្រមាណ ៣ទសវត្សរ៍កន្លងមកនេះ ប៉ុន្តែចំនួនគ្រួសារដែលនៅពុំទាន់ទទួលបានសេវាទឹកស្អាតនៅមានច្រើនទៀត ដែលបង្ហាញថា វិស័យនេះនៅតែជាអាទិភាពអភិវឌ្ឍន៍របស់កម្ពុជា និងក៏ជាឱកាសសម្រាប់ធុរកិច្ចជប៉ុនផងដែរ ខណៈដែលបច្ចុប្បន្ន ក្រសួង បាន និងកំពុងបន្តពង្រឹងកំណែទម្រង់ និងបញ្ញត្តិកម្មក្នុងវិស័យនេះ តាមរយៈការវាយតម្លៃប្រតិបត្តិករទូទាំងប្រទេសនិងការអនុវត្តច្បាប់ស្តីពីការគ្រប់គ្រងទឹកស្អាត៕

សូមរំលឹកថា កាលពីខែតុលា ឆ្នាំ២០២៥ ទីក្រុងគីតាគ្យូស៊ូ និងសមាគម KOWBA បានចុះអនុស្សរណៈនៃការយោគយល់ជាមួយក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ដើម្បីពង្រឹងកិច្ចសហប្រតិបត្តិការដែលមានប្រវត្តិតាំងពីឆ្នាំ១៩៩៦មកម្ល៉េះ។

ឯកឧត្តម Eguchi Tetsuro អភិបាលរងទីក្រុងបានលើកឡើងថា៖

«ភាពជាដៃគូនេះមានលក្ខណៈរឹងមាំ និងយូរអង្វែង។ យើងសូមបញ្ជាក់ការប្តេជ្ញាចិត្តក្នុងការគាំទ្រកម្ពុជា ហើយនឹងប្តេជ្ញាចិត្តជំរុញការអនុវត្តអនុស្សរណៈនៃការយោគយល់នេះដើម្បីបង្កើតសមិទ្ធផល ជាក់ស្តែងរួមគ្នា។ ក្រុមហ៊ុនរបស់យើងមានបំណងចូលមក និងពង្រីកប្រតិបត្តិការនៅកម្ពុជាសម្រាប់រយៈពេលវែង មិនមែនសំឡឹងប្រាក់ចំណេញរយៈពេលខ្លីនោះទេ។ យើងនឹងសហការជាមួយកម្ពុជាជាច្រើនឆ្នាំ និងច្រើនទសវត្សរ៍ទៅមុខ»។

សូមជម្រាបថា គណៈប្រតិភូ រួមមានក្រុមហ៊ុនឯកជនជប៉ុនចំនួន១៥ ជាសមាជិកសមាគម KOWBA ដែលមានជំនាញចម្រុះ រាប់ចាប់តាំងពីប្រព័ន្ធប្រព្រឹត្តិកម្ម ម៉ាស៊ីនបូមទឹក ទុយោទឹក វ៉ានទឹក និងក្រុមហ៊ុនសាងសង់រោងចក្រទឹកស្អាត រហូតដល់ដំណោះស្រាយបច្ចេកវិទ្យា ប្រព័ន្ធគ្រប់គ្រង ការត្រៀមបង្ការគ្រោះមហន្តរាយ ការកាត់បន្ថយទឹកបាត់បង់ បច្ចេកវិទ្យាភ្នាសនិងចម្រោះទឹក និងក្រុមហ៊ុនផលិតសារធាតុគីមីសម្រាប់ប្រព្រឹត្តិកម្មទឹកជាដើម។ បច្ចេកវិទ្យាទាំងនេះនឹងត្រូវតាំងបង្ហាញក្នុងសិក្ខាសាលានៅថ្ងៃបន្ទាប់ ហើយក្រុមហ៊ុនមួយចំនួន ដែលមានប្រតិបត្តិការនៅប្រទេសជិតខាង ក៏កំពុងស្វែងរកការពង្រីកខ្លួនមកកម្ពុជាផងដែរ៕