សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ យោងតាមរបាយការណ៍របស់ក្រសួងទេសចរណ៍បានបង្ហាញឱ្យដឹងថា កម្ពុជាបានទាក់ទាញភ្ញៀវទេសចរចំនួន ៤.៨ លាននាក់នៅក្នុងត្រីមាសទី៣ នៃឆ្នាំ២០២៤ ដែលចំនួននេះកើនឡើង២២ ភាគរយ បើធៀបនឹងរយៈពេលដូចគ្នាកាលពីឆ្នាំ២០២៣។
របាយការណ៍ដដែលបានឱ្យដឹងថា ប្រទេសថៃគឺជាភ្ញៀវនាំមុខសម្រាប់ការមកដល់នៃភ្ញៀវទេសចរបរទេសនៅកម្ពុជាគិតចាប់ពីខែមករា ដល់ខែកញ្ញា ដោយមានភ្ញៀវទេសចរចំនួន ១.៥២ លាននាក់ ធ្លាក់ចុះ១៤ ភាគរយ។ ភ្ញៀវទេសចរវៀតណាមចំនួន ៩៧៣,៤០៧ នាក់ កើនឡើង៣៣ ភាគរយ និងជនជាតិចិនចំនួន ៦០៧,៥៤២ នាក់ កើនឡើង៤៩,៨ ភាគរយ ដែលបានធ្វើដំណើរមកកម្ពុជាក្នុងអំឡុងពេល៣ ត្រីមាសនៃឆ្នាំ២០២៤ ។
សម្រាប់ចំនួនភ្ញៀវទេសចរបរទេសចំនួន ១.៧ លាននាក់ ឬប្រហែល ៣៥.៥៥ភាគរយ នៃចំនួនអ្នកទេសចរបរទេសសរុបចំនួន ១ ៧០២ ៧៦៨នាក់ បានធ្វើដំណើរមកកម្ពុជាតាមផ្លូវអាកាសកើនឡើង ២៧ ភាគរយធៀបនឹងឆ្នាំមុន ដោយអាកាសយានដ្ឋានភ្នំពេញមានអ្នកដំណើរចំនួនប្រមាណ១ ២៦៤ ៩២០នាក់ អាកាសយានដ្ឋានអង្គរសៀមរាប មានអ្នកដំណើរចំនួនប្រមាណ ៤២២ ១៤៣នាក់ និងអាកាសយានដ្ឋានខេត្តព្រះសីហនុ មានអ្នកដំណើរចំនួន១៥ ៧០៥នាក់។
របាយការណ៍បានឱ្យដឹងទៀតថា ចំនួនភ្ញៀវអ្នកទេសចរ ដែលធ្វើដំណើរតាមច្រកផ្លូវទឹក និងផ្លូវគោក មានចំនួនសរុប ៣ ០៩៧ ៧៦៤ ដែលក្នុងនោះបានមកដល់តាមផ្លូវទឹកចំនួន ៣ ០៤០ ៧១១នាក់ និងច្រកព្រំដែនគោក ចំនួន៥៧ ០៥៣នាក់។
មន្ត្រីអ្នកនាំពាក្យក្រសួងទេសចរណ៍ ឯកឧត្តម តុប សុភ័ក រមានប្រសាសន៍ថា តួលេខនេះបង្ហាញថា វិស័យទេសចរណ៍របស់កម្ពុជាកំពុងងើបឡើងវិញ ទោះបីជាមិនទាន់ឈានដល់កម្រិតមុនពេលមានវិបត្តិ កូវីដ-១៩ ក៏ដោយ តែក្រសួងទេសចរណ៍បាន និងកំពុងខិតខំប្រឹងប្រែង ដោយមានការគាំទ្រពីភាគីពាក់ព័ន្ធ និងវិស័យឯកជន ដើម្បីជំរុញការទាក់ទាញភ្ញៀវមកទស្សនាប្រទេសកម្ពុជា។
ជាក់ស្តែងសមាគមមិត្តភាពកម្ពុជា-ចិន និងសមាគមប្រជាជនចិន ដើម្បីមិត្តភាពជាមួយបរទេស បានរៀបចំសន្និសីទខេត្ត-ក្រុង មេត្រីភាពកម្ពុជា-ចិន ឆ្នាំ២០២៤ នៅខេត្តសៀមរាប ដែលឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ និងឯកឧត្តម វ៉ាង វិនពីន (Wang Wenbin)ឯកអគ្គរដ្ឋទូតចិនប្រចាំកម្ពុជាសុទ្ធតែបានបង្ហាញជំហរក្នុងការបន្តជំរុញកិច្ចសហការ និងសាមគ្គីភាព រវាងប្រជាជន និងប្រជាជននៃប្រទេសទាំងពីរ កម្ពុជា-ចិន ឱ្យកាន់តែស៊ីជម្រៅបន្ថែមទៀត និងជំរុញការផ្សព្វផ្សាយអំពីវប្បធម៌ អរិយធម៌ ប្រពៃណី និងសក្តានុពលទេសចរណ៍កម្ពុជាទៅដល់ប្រជាជនចិន។
ឯកឧត្តម វ៉ាង វិនពីន បានមានប្រសាសន៍ថា វិស័យទេសចរណ៍ជាកម្លាំងចលករជំរុញវិស័យសេដ្ឋកិច្ច ហើយប្រទេសចិនបានយកចិត្តទុកដាក់ជាខ្លាំងក្នុងការអភិវឌ្ឍវិស័យទេសចរណ៍នេះ ទុកជាការងារចម្បង ដែលក្នុងព្រឹត្តិការណ៍សន្និសីទខេត្ត-ក្រុង មេត្រីភាពកម្ពុជា-ចិននេះ មានការចូលរួមពីសំណាក់តំណាងខេត្ត-ក្រុងនៃប្រទេសចិនចំនួន៨ ហើយខេត្ត-ក្រុងនៃប្រទេសកម្ពុជាចំនួន២៥។ ពិសេសជាងនេះ គឺការជំរុញកិច្ចសហប្រតិបត្តិការលើវិស័យទេចរណ៍ខេត្តយូណាន-កម្ពុជា ហើយក៏មានខេត្តហើណាន កំពុងសហការជាមួយកម្ពុជាផងដែរ ដោយគ្រោងរៀបចំដំណើរកម្សាន្ត ទស្សនានៅអង្គរឱ្យទៅជាគម្រោងទេសចរណ៍ដ៏ប្រណិត ។
និន្នាការវិជ្ជមានខាងលើ គឺស្របទៅនឹងគោលបំណងរបស់កម្ពុជា ក្នុងការទទួលបានចំនួនភ្ញៀវទេសចរឱ្យច្រើនលើសពីពេលមុនមានជំងឺរាតត្បាតកូវីដ-១៩ ខណៈដែលក្រសួងទេសចរណ៍បានព្យាករថា ការមកដល់របស់ភ្ញៀវទេសចរបរទេសនឹងមានចំនួន ៧ លាននាក់នៅឆ្នាំ២០២៥ លើសពី ៦,៦ លាននាក់ដែលបានកត់ត្រាក្នុងឆ្នាំ២០១៩។
សូមជម្រាបថា កម្ពុជាមានកេរ្តិ៍ឈ្មោះល្បីល្បាញដោយសារតំបន់បេតិកភណ្ឌវប្បធម៌ពិភពលោកដូចជា ឧទ្យានបុរាណអង្គរក្នុងខេត្តសៀមរាប ប្រាសាទព្រះវិហារ និងប្រាសាទកោះកេរក្នុងខេត្តព្រះវិហារ និងតំបន់បុរាណសំបូរព្រៃគុកក្នុងខេត្តកំពង់ធំ។ ក្រៅពីនេះ កម្ពុជាមានឆ្នេរសមុទ្រប្រវែង ៤៥០ គីឡូម៉ែត្រ លាតសន្ធឹងលើខេត្តភាគនិរតីចំនួន៤គឺ ព្រះសីហនុ កំពត កែប និងកោះកុង។
នៅក្នុងរបាយការណ៍ដែលចេញផ្សាយដោយធនាគារជាតិនៃកម្ពុជានាពេលថ្មីៗនេះ បានឱ្យដឹងថា វិស័យទេសចរណ៍គឺជាកត្តាជំរុញដ៏សំខាន់មួយនៃកំណើនសេដ្ឋកិច្ចរបស់ប្រទេសនៅឆ្នាំ២០២៤។
កាលពីឆ្នាំ២០២៣ កម្ពុជាទទួលបានភ្ញៀវទេសចរបរទេសចំនួន ៥.៤៥ លាននាក់ ដោយទទួលបានចំណូលសរុបចំនួន ៣.០៨ ពាន់លានដុល្លារ និងបានចូលរួមចំណែកចំនួន៧,៥ នៃផលិតផលក្នុងស្រុកសរុប GDP នេះបើយោងតាមក្រសួងទេសចរណ៍៕
Account
Security
Favourite Content