សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្រសួងរៀបចំដែនដី នគរូបនីយកម្ម និងសំណង់ បានគាំទ្រដល់ការរៀបចំការប្រកួតប្រជែងស្នាដៃរចនាសហគមន៍ឆ្នាំ២០២៤ ដោយការប្រកួតប្រជែងនេះ ផ្ដោតលើប្រធានបទ ភូមិ១ សហគមន៍១ ហើយចលនានេះ នឹងធ្វើឱ្យការរស់នៅរបស់ប្រជាពលរដ្ឋកាន់តែប្រសើរឡើង ។
យោងតាមប្រសាសន៍ឯកឧត្តម ឡៅ ទិព្វសីហា រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ បានមានប្រសាសន៍ឱ្យដឹងថា ចលនាភូមិ១ សហគមន៍១ គឺជាយន្តការដ៏មានប្រសិទ្ធភាពមួយក្នុងការជួយលើកកម្ពស់ការអភិវឌ្ឍសេដ្ឋកិច្ចសហគមន៍ ការធ្វើឱ្យប្រសើរឡើងនូវការរស់នៅក្នុងសហគមន៍ ការបង្កើតការងារនៅនឹងកន្លែង ការលើកកម្ពស់ទំនាក់ទំនង ភាពស្អិតល្មួតក្នុងសង្គមជាតិ ការអភិវឌ្ឍសេដ្ឋកិច្ចគ្រួសារ និងសង្គម និងការកាត់បន្ថយភាពក្រីក្រ ដែលទាំនេះគឺជាមូលដ្ឋានចាំបាច់ក្នុងការរួមចំណែកធ្វើឱ្យប្រជាពលរដ្ឋកម្ពុជាឈានទៅសម្រេចបាននូវចក្ខុវិស័យក្នុងការប្រែក្លាយជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងក្លាយជាប្រទេសមានចំណូលខ្ពស់នៅឆ្នាំ២០៥០ ។
ឯកឧត្តមមានប្រសាសន៍បន្តថា ៖
«ចលនាភូមិ១ សហគមន៍១ បានផ្ដល់លទ្ធភាពដល់ប្រជាពលរដ្ឋក្នុងមូលដ្ឋានធ្វើការអភិវឌ្ឍសេដ្ឋកិច្ចសង្គមនៅតាមបណ្ដាឃុំ សង្កាត់ និងសហគមន៍ក្នុងប្រទេស ។ គោលដៅចម្បងរបស់ចលនាភូមិ១ សហគមន៍១ នេះ គឺផ្ដល់លទ្ធភាពដល់ប្រជាពលរដ្ឋក្នុងសហគមន៍ពង្រីកការអភិវឌ្ឍជីវភាព និងទទួលបានអត្ថប្រយោជន៍ផ្សេងៗ ដូចជាការលើកកម្ពស់សកម្មភាពសេដ្ឋកិច្ចក្នុងសហគមន៍ ការចែករំលែកចំណេះដឹង និងជំនាញ ការចូលរួមរបស់សហគមន៍ក្នុងដំណើរអភិវឌ្ឍ ការកែលម្អ និងរៀបចំសហគមន៍ជាដើម»។
ឯកឧត្តមរដ្ឋលេខាធិកាបានបន្ថែមថា ចលនាភូម១ សហគមន៍១នេះ បានដើរយ៉ាងសំខាន់ក្នុងការលើកកម្ពស់ជីវភាពរស់នៅ និងការលើកកម្ពស់សន្តិសុខសង្គមសម្រាប់ប្រជាពលរដ្ឋក្នុងសហគមន៍មូលដ្ឋានទូទាំងប្រទេសកម្ពុជា ព្រមទាំងការសម្របសម្រួលដោយមានការចូលរួមពីសហគមន៍តូចៗនៅក្នុងមូលដ្ឋានក្នុងគោលបំណងផ្ដល់នូវធនធាន និងសមត្ថភាពដល់សហគមន៍ដើម្បីធ្វើការអភិវឌ្ឍដោយខ្លួនឯង ។ ចលនានេះក៏មានតួនាទីសំខាន់ និងកាន់តែមានលក្ខណៈសមស្របក្នុងរបៀបវរៈ គោលនយោបាយអភិវឌ្ឍន៍សង្គមសេដ្ឋកិច្ចកម្ពុជា ព្រោះថាទស្សនៈនេះ បានកើតឡើងនៅកម្ពុជាតាំងពីយូរលង់ណាស់មកហើយ ដោយប្រជាជនខ្មែរជាប្រជាជាតិមួយធ្លាប់មានប្រពៃណីឧស្សាហ៍ព្យាយាម មានចំណេះដឹង និងជំនាញក្នុងការប្រកបវិជ្ជាជីវៈ ប្រកបអាជីវកម្មច្រើនប្រភេទទៅតាមទីកន្លែងផ្សេងៗគ្នា ។
ឯកឧត្តមបន្ថែមថា តាមរយៈសកម្មភាពនេះ ចលនាភូមិ១ សហគមន៍១ នឹងក្លាយទៅជាកម្លាំងអូសទាញថ្មីមួយថែមទៀត ក្នុងការទាក់ទាញទឹកចិត្តអ្នកសិក្សាគម្រោងប្លង់ អ្នកសាងសង់ អ្នកវិនិយោគក្នុងស្រុក និងប្រទេស ឱ្យមានការខិតខំប្រឹងប្រែងពង្រឹងគុណភាព និងសមត្ថភាពរបស់ខ្លួន ដើម្បីទទួលបានស្នាដៃល្អៗ ការបង្កើនឱកាសទីផ្សារការងារ ប្រាក់ចំណូល និងសមត្ថភាពប្រកួតប្រជែងរបស់ខ្លួនបន្តទៀត ។
តាមរយៈការប្រកួតប្រជែងស្នាដៃរចនាសហគមន៍ ក្រសួងរៀបចំដែនដី នគរូបនីយកម្ម និងសំណង់ បានវាយតម្លៃខ្ពស់ចំពោះកិច្ចខិតខំប្រឹងប្រែងរបស់ក្រុមការងារ សមាគមអ្នកវិនិយោគ អ្នកសាងសង់ និងស្ថាបត្យករកម្ពុជា និងសមាគមសណ្ឋាគារកម្ពុជា ដែលបានលើកប្រធានបទភូមិ១ សហគមន៍១ មានការគាំទ្រពីអគ្គលេខាធិការនៃគណស្ថាបត្យករកម្ពុជា បានខិតខំប្រឹងប្រែងសហការគ្នាបានយ៉ាងល្អនាពេលកន្លងមក ក្នុងការជំរុញការលើកកម្ពស់ស្នាដៃស្ថាបត្យកម្ម និងនគរូបនីយកម្ម តាមទស្សនាៈទានភូមិ១ សហគមន៍១ ។
ឯកឧត្ត ហង្ស សុតសំភារ អនុរដ្ឋលេខាធិការ ក្រសួងរៀបចំដែនដី នគរូបនីយកម្ម និងសំណង់ ក៏បានលើកឡើងផងដែរថា ចក្ខុវិស័យរបស់ក្រសួង គឺចង់កែប្រែ កែលម្អសហគមន៍កម្ពុជាឱ្យក្លាយជាសហគមន៍សុខសាន្ត មានសួនច្បារ មានមនុស្សមកកម្សាន្ត មកហាត់ប្រាណ មានបណ្ណាល័យ មានមនុស្សអានសៀវភៅ ជាកន្លែងក្រេបជញ្ជក់ចំណេះដឹង និងជាកន្លែងស្រាវជ្រាវជាដើម ៕
Account
Security
Favourite Content