សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ របាយការណ៍របស់អគ្គនាយកដ្ឋានគយ និងរដ្ឋាករបានបង្ហាញថា ពាណិជ្ជកម្មអន្តរជាតិរបស់កម្ពុជាមានចំនួន ២៣,៦៩ ពាន់លានដុល្លារអាមេរិក ក្នុងរយៈពេល ៦ខែដំបូងនៃឆ្នាំនេះ ពោលគឺមានការធ្លាក់ចុះ ១៣ ភាគរយបើធៀបនឹងរយៈពេលដូចគ្នាកាលពីឆ្នាំ២០២២ ដែលមានជាង ២៧ពាន់លានដុល្លារ។
ទិន្នន័យបានបង្ហាញថា ចាប់ពីខែមករាដល់ខែមិថុនា កម្ពុជាបាននាំចេញទំនិញក្នុងទឹកប្រាក់សរុប ១១ ៤៦៤,៤៨លានដុល្លារអាមេរិក កើនឡើងប្រមាណ ០,៨ ភាគរយ បើធៀបនឹងរយៈពេលដូចគ្នាឆ្នាំ២០២២ ។ សម្រាប់ការនាំទំនិញពីក្រៅប្រទេសចូលមកកម្ពុជា របាយការណ៍បានបង្ហាញថា នៅក្នុងឆមាសទី១ ឆ្នាំ២០២៣ គឺមានជាង ១២ ២២៩ លានដុល្លារ ធ្លាក់ចុះ ២២,៩ភាគរយ ធៀបនឹងឆមាសទី១ ឆ្នាំ២០២២ ដែលមាន ១៥ ៨៦៤,៧២លានដុល្លារ។
របាយការណ៍បានបញ្ជាក់ថា ចិន នៅតែមានទំហំពាណិជ្ជកម្មជាមួយកម្ពុជាច្រើនជាងគេសរុបជាង ៦.១៥ពាន់លានដុល្លារ រយៈពេល ៦ខែ ចាប់ពីខែ មករា-មិថុនា ឆ្នាំ២០២៣។ ចំណែកអាមេរិក ស្ថិតនៅលេខរៀងទី២ ដែលមានទំហំពាណិជ្ជកម្មជាមួយកម្ពុជាសរុបទាំងនាំចេញ និងនាំចូលប្រមាណជាង ៤.៣៥ពាន់លានដុល្លារ។ ដោយឡែកវៀតណាម នៅលេខរៀងទី៣ បន្ទាប់មកថៃ ជប៉ុន សិង្ហបុរី ឥណ្ឌូណេស៊ី និងប្រទេសផ្សេងៗទៀត។
សម្រាប់ទំនិញសំខាន់ៗ ដែលកម្ពុជា នាំចេញរួមមាន៖ សម្លៀកបំពាក់ សម្រេចបាន ២.៤ពាន់លានដុល្លារ មានការថយចុះជាង ២១ភាគរយ, ម៉ាស៊ីន និងឧបករណ៍អគ្គិសនី ១.៥ពាន់លានដុល្លារ កើនឡើងជាង ១០៨ភាគរយគជ់ខ្យងធម្មជាតិ ឬចិញ្ចឹម ត្បូងថ្មមានតម្លៃ សម្រេចបាន ជាង ៥៦៥លានដុល្លារ កើនឡើង ២៨៦ភាគរយ, ស្បែកជើង ស្រោមជើងជាង ៧០០លានដុល្លារ ធ្លាក់ចុះ ១៧ភាគរយ និងទំនិញផ្សេងៗដទៃទៀត។
លោកបណ្ឌិត ហុង វណ្ណៈ ប្រធាននាយកដ្ឋានសេដ្ឋកិច្ចនៃរាជបណ្ឌិត្យសភាកម្ពុជា បានប្រាប់ AMS ថា ការនាំចេញរបស់កម្ពុជារយៈពេល៦ខែនេះ អាស្រ័យលើបញ្ហាទីផ្សារ សមត្ថភាពផលិត និងការបញ្ជាទិញកើនឡើង ខណៈដែលកិច្ចពាណិជ្ជកម្ម វាមានដំណើរឡើងចុះមិនទៀង ។
លោកបណ្ឌិតបានគូសបញ្ជាក់ថា ៖
“តាមទស្សនៈរបស់ខ្ញុំ កំណើនការនាំចេញរបស់កម្ពុជានឹងមានបន្តទៀត។ ប៉ុន្តែត្រង់ចំណុចនេះ កម្ពុជាក៏មិនត្រូវភ្លេចខិតខំអភិវឌ្ឍ និងពង្រឹងគុណភាពផលិតផលរបស់ខ្លួនដែរ ជាពិសេសផលិតផលកសិកម្ម ដែលកំពុងក្លាយជាទំនិញសក្តានុពល របស់កម្ពុជា។”
លោកបណ្ឌិត ហុង វណ្ណៈបានមានប្រសាសន៍ថា ៖
“ខ្ញុំយល់ថា ទី១កម្ពុជាបានពង្រីកនូវប្រព័ន្ធទីផ្សារថ្មីៗច្រើនឈរលើច្បាប់វិនិយោគ, ទី២ការជឿទុកចិត្ត, ទី៣កិត្យានុភាពរបស់កម្ពុជាបានកសាងសមិទ្ធិក្នុងអាស៊ាន ជាមួយនឹងការចូលជាធរមាននៃកិច្ចព្រមព្រៀងពាណិជ្ជកម្មជាមួយប្រទេសជាច្រើន គឺកំពុងទាក់ទាញចំណាប់អារម្មណ៍អ្នកវិនិយោគជាតិ និងអន្តរជាតិឱ្យមកបណ្តាក់ទុននៅកម្ពុជាកាន់តែច្រើន។ កំណើនទឹកប្រាក់នាំចេញ គឺបញ្ជាក់ពីការកើនឡើងនៃសមត្ថភាពផលិតកម្មក្នុងស្រុក និងទីផ្សារបញ្ជាទិញពីកម្ពុជាផងដែរ។”
សូមបញ្ជាក់ថា ឆ្នាំ២០២២ ការធ្វើពាណិជ្ជកម្មអន្តរជាតិរបស់កម្ពុជា មានទឹកប្រាក់សរុបជាង ៥២ពាន់លានដុល្លារ កើនជាង ៩,២ ភាគរយ បើធៀបនឹងឆ្នាំ២០២១។ ក្នុងនោះ កម្ពុជាបាននាំទំនិញទៅទីផ្សារអន្តរជាតិក្នុងចំនួនទឹកប្រាក់សរុប ២២,៤ ពាន់លានដុល្លារ កើនឡើង ១៦,៤ភាគរយ និងការនាំចូលមានទំហំទឹកប្រាក់ ២៩,៩ពាន់លានដុល្លារ មានកំណើន ៤,៣ ភាគរយ។ នេះបើយោងតាមទិន្នន័យរបស់អគ្គនាយកដ្ឋានគយ និងរដ្ឋាករកម្ពុជា៕
Account
Security
Favourite Content