សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ បច្ចុប្បន្ននេះ កម្ពុជា បាន និងកំពុងបង្កើនកិច្ចព្រមព្រៀងពាណិជ្ជកម្មសេរីជាមួយបណ្តាប្រទេសដៃគូពាណិជ្ជកម្មរបស់ខ្លួនតាមរយៈការរក្សា និងពង្រឹងទីផ្សារចាស់ ហើយព្យាយាមពង្រីកទីផ្សារថ្មី។
ថ្លែងនៅក្នុងពិធីបើកសន្និបាតបូកសរុបការងារពាណិជ្ជកម្ម ឆ្នាំ២០២៤ និងទិសដៅអនុវត្តការងារពាណិជ្ជកម្ម ឆ្នាំ២០២៥ នាទីស្ដីការក្រសួងពាណិជ្ជកម្ម នាព្រឹកថ្ងៃទី១៩ ខែធ្នូ ឆ្នាំ២០២៤ លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម បានមានប្រសាសន៍ថា៖ កម្ពុជា បាន និងកំពុងជំរុញកិច្ចសហប្រតិបត្ដិការ និងសមាហរណកម្មសេដ្ឋកិច្ចពាណិជ្ជកម្មនៅក្នុងតំបន់ និងសកលលោក តាមរយៈការចរចា បង្កើនកិច្ចព្រមព្រៀងពាណិជ្ជកម្មសេរីជាមួយប្រទេសដៃគូពាណិជ្ជកម្មដែលមានសក្ដានុពលតាមអភិក្រម រក្សា និងពង្រឹងទីផ្សារដែលមានស្រាប់ ហើយព្យាយាមពង្រឹកទីផ្សារថ្មី។
លោកជំទាវរដ្ឋមន្ដ្រីបានបន្ថែមថា៖ កម្ពុជាត្រូវបន្ដ និងអភិវឌ្ឍគោលនយោបាយ ផែនការយុទ្ធសាស្ដ្រ លិខិតបទដ្ឋានគតិយុត្ដិ សម្រាប់គាំទ្រដល់វិស័យពាណិជ្ជកម្ម សំដៅលើការពង្រឹងសមត្ថភាពប្រកួតប្រជែង ធ្វើពិពិធកម្មទីផ្សារ ពង្រឹងគុណភាពទំនិញដែលមានសក្ដានុពលឲ្យមានឧត្ដមភាព និងភាពប្រកួតប្រជែងនៅលើទីផ្សារអន្ដរជាតិព្រមទាំងលើកកម្ពស់កម្មសិទ្ធិបញ្ញា។
លោកជំទាវ ចម និម្មល បានបញ្ជាក់ឲ្យដឹងថា ក្នុងរយៈពេល១១ខែ ឆ្នាំ២០២៤នេះ ទំហំពាណិជ្ជកម្មកម្ពុជា សម្រេចបានទឹកប្រាក់ចំនួន ៥០.៤៥ប៊ីលានដុល្លារអាម៉េរិក កើនឡើង១៥.៩៥% ក្នុងនោះ ការនាំចេញសម្រេចបាន ទឹកប្រាក់ចំនួន ២៤.៣៤ប៊ីលានដុល្លារអាម៉េរិក កើនឡើង១៤.៣៦% និងការនាំចូលសម្រេចបានទឹកប្រាក់ ២៦.១០ប៊ីលានដុល្លារអាម៉េរិក កើនឡើង១៧.៤៨%។
មុខទំនិញសំខាន់ៗដែលកម្ពុជានាំចេញរួមមាន៖សម្លៀកបំពាក់៨.៩៤ប៊ីលានដុល្លារ កើនឡើង២៥.៨៤%, សម្ភារធ្វើដំណើរ១.៧៨ប៊ីលានដុល្លារ កើនឡើង២១.៥០%, ស្បែកជើង១.៥០ប៊ីលានដុល្លារ កើនឡើង២៤.៣០% និងស្រូវ ១.៥០លានដុល្លារ កើនឡើង ១៦.៤២% និងផលិតផលផ្សេងៗទៀត។ ដោយឡែក ទំនិញសំខាន់ៗនាំចូល រួមមាន៖ វាយនភ័ណ្ឌ ៥.៧០ប៊ីលានដុល្លារអាមេរិក កើនឡើង២៣.៥២%, គ្រឿងអេឡិកត្រូនិក ៣.៣២ប៊ីលានដុល្លារអាមេរិក កើនឡើង២៩.១៤%, សម្ភារសំណង់ ១.៤៧ប៊ីលានដុល្លារអាមេរិក កើនឡើង២២.៣៥%, ប្រេងម៉ាស៊ូត ១.៣០ប៊ីលានដុល្លារអាមេរិក កើនឡើង១០.១៦% និងរថយន្ដ ៩០៧.៧៩លានដុល្លារអាមេរិក កើនឡើង៧.២១%៕
Account
Security
Favourite Content