សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ បច្ចុប្បន្ន ក្រសួងពាណិជ្ជកម្ម បាន និងកំពុងសហការជាមួយក្រសួងកសិកម្ម រុក្ខាប្រមាញ់ និងនេសាទ និងអង្គការស្បៀង និងកសិកម្មនៃសហប្រជាជាតិ (FAO) កំពុងរៀបចំកសាងកេរ្តិ៍ឈ្មោះ និងចុះបញ្ជី “ស្វាយចន្ទីកំពង់ធំ” និង “ស្វាយកែវរមៀតឧត្តរមានជ័យ” ជាម៉ាកសម្គាល់ភូមិសាស្រ្តទំនិញ។ ក្រសួងពាណិជ្ជកម្មក៏បាន និងកំពុងសហការជាមួយអង្គការកម្មសិទ្ធិបញ្ញាពិភពលោក (WIPO) ដើម្បីរៀបចំកសាងកេរ្តិ៍ឈ្មោះ និងចុះបញ្ជី “ក្តាមថ្មកោះកុង” ជាម៉ាកសម្គាល់ភូមិសាស្រ្តទំនិញផងដែរ។
នេះជាការបញ្ជាក់អះអាងរបស់ឯកឧត្តម វ៉េង សុធី រដ្ឋលេខាធិការនៃក្រសួងពាណិជ្ជកម្ម នៅក្នុងវគ្គបណ្តុះបណ្តាលស្តីពី “កម្មសិទិ្ធបញ្ញា៖ ទិដ្ឋភាពទូទៅ អត្ថប្រយោជន៍ ការការពារទ្រព្យកម្មសិទ្ធិបញ្ញា និងនីតិវិធីនៃការចុះបញ្ជីម៉ាកសម្គាល់ភូមិសាស្ត្រទំនិញ”នៅខេត្តសៀមរាបកាលពីពាក់កណ្តាលសប្តាហ៍នេះ។
ឯកឧត្តមរដ្ឋលេខាធិការ បានថ្លែងថា៖ បច្ចុប្បន្នម៉ាកសម្គាល់ភូមិសាស្ត្រទំនិញរបស់កម្ពុជាមានចំនួន៨ម៉ាក រួមមាន៖ ១- ម្រេចកំពត ២- ស្ករត្នោតកំពង់ស្ពឺ ៣- ក្រូចថ្លុងកោះទ្រង់ ៤- ទឹកឃ្មុំព្រៃមណ្ឌលគិរី ៥- អំបិលកំពតកែប ៦- ទឹកត្រីកំពតកែប ៧- បង្កងតាកែវ និង៨- ប្រហុកសៀមរាប ដោយបានផ្តល់ឱ្យកសិករនូវការបណ្តុះបណ្តាលផ្នែកគ្រប់គ្រង បច្ចេកទេសវេចខ្ចប់ នវានុវត្តន៍ផលិតផល និងប្រព័ន្ធត្រួតពិនិត្យ ដែលធ្វើឱ្យផលិតផលម៉ាកសម្គាល់ភូមិសាស្ត្រទំនិញទទួលតម្លៃបន្ថែម និងមានតម្រូវការទីផ្សារខ្ពស់ ដែលបានចូលរួមចំណែកក្នុងការជួយលើកស្ទួយសេដ្ឋកិច្ចគ្រួសាររបស់កសិករខ្នាតតូច និងមធ្យមជាច្រើន។
ឯកឧត្តម បន្តថា៖
«ចាប់តាំងពីការចុះបញ្ជីម៉ាកសម្គាល់ភូមិសាស្ត្រទំនិញ ម្រេចកំពត និងស្ករត្នោតកំពង់ស្ពឺ នៅឆ្នាំ២០១០ រហូតមកដល់បច្ចុប្បន្ន ឃើញថា កសិករផលិត ផ្ទៃដីដាំដុះម្រេច ចំនួនដើមត្នោត និងក្រុមហ៊ុនកែច្នៃវេចខ្ចប់ មានការកើនឡើងគួរឱ្យកត់សម្គាល់ និងមានតម្រូវការទីផ្សារក្នុងស្រុកខ្ពស់ និងបាននាំចេញទៅកាន់បណ្តាប្រទេសនានាជាច្រើន។ ដោយឡែក ម្រេចកំពត ស្ករត្នោតកំពង់ស្ពឺ និងអំបិលកំពតកែប ដែលបានចុះបញ្ជីការពារនៅអន្តរជាតិ និងអំបិលកំពតកែប (កំពុងបន្តនីតិវិធីចុះបញ្ជីនៅសហភាពអឺរ៉ុប) បានទប់ស្កាត់ការក្លែងបន្លំ និងកសាងកេរ្តិ៍ឈ្មោះផលិតផលកម្ពុជា នៅអន្តរជាតិឱ្យមានភាពល្បីល្បាញឱ្យក្លាយជាគោលដៅទេសចរណ៍»។
ឯកឧត្តម សួន វិជ្ជា ទីប្រឹក្សាក្រសួងពាណិជ្ជកម្ម ប្រធានលេខាធិការដ្ឋាននៃគណៈកម្មាធិការជាតិគ្រប់គ្រងកម្មសិទ្ធិបញ្ញា និងជាប្រធាននាយកដ្ឋានកម្មសិទ្ធិបញ្ញា បានលើកឡើងថា៖ កម្មសិទ្ធិបញ្ញា មិនត្រឹមតែជួយជំរុញកំណើនសេដ្ឋកិច្ចជាតិប៉ុណ្ណោះទេ ប៉ុន្តែវិស័យនេះបានជួយជំរុញឱ្យកម្ពុជាមានភាពរីកច្រើនបន្ថែមទៀតលើវិស័យនវានុវត្តន៍ ការច្នៃប្រឌិត ការកែច្នៃផលិតផលថ្មីៗស្របតាមបទដ្ឋាននិងបច្ចេកទេស ព្រមទាំងលើកកម្ពស់ផលិតផលកសិកម្មដែលមានសក្កានុពលតាមរយៈការចុះបញ្ជីជាម៉ាកសម្គាល់ភូមិសាស្ត្រទំនិញជាដើម។
ឯកឧត្តមបានលើកឡើងថា៖ ការកសាងកេរ្តិ៍ឈ្មោះម៉ាកអាចជួយអ្នកប្រើប្រាស់កំណត់អត្តសញ្ញាណ និងទទួលស្គាល់ផលិតផល ដោយនឹងបង្កើតការជំនឿទុក្ខចិត្តជាមួយអ្នកពាក់ព័ន្ធផ្សេងៗជាច្រើន ដូចជា៖ ១. ការពង្រីកមុខមាត់ និងអត្តសញ្ញាណនៃដែនដី ២. ការលើកកម្ពស់គុណភាពទំនិញសម្គាល់ភូមិសាស្រ្ត តាមរយៈ ការរៀបចំចងក្រងសៀវភៅបន្ទុក និងកិច្ចសន្យាអនុវត្ត អនុលោមតាមសៀវភៅបន្ទុក ដោយសមាជិកនីមួយៗ ៣. សមាជិកសមាគមអាចប្រើប្រាស់រូបសញ្ញាជាតិទំនិញ សម្គាល់ភូមិសាស្រ្ត នៃព្រះរាជាណាចក្រកម្ពុជា លើសំបកវេចខ្ចប់ និងឧបករណ៍ផ្សព្វផ្សាយផ្សេងៗ មិនត្រឹមតែប៉ុណ្ណោះ សមាជិកនីមួយៗ អាចរៀបចំកសាងកេរ្តិ៍ឈ្មោះម៉ាកផ្ទាល់ខ្លួន ដើម្បីប្រើប្រាស់ភ្ជាប់នឹង ម៉ាកសម្គាល់ភូមិសាស្រ្តទំនិញដើម្បីញែកឱ្យដាច់ពីសមាជិកផ្សេងៗ ៤. ចូលរួមប្រកួតប្រជែងក្នុងកម្មវិធីពិព័រណ៍ថ្នាក់ជាតិ និងអន្តរជាតិ ។ល៕
Account
Security
Favourite Content