សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ គិតត្រឹមរយៈពេល១០ខែ គិតចាប់ពីខែមករា ដល់ខែតុលា ឆ្នាំ២០២៤ កម្ពុជាផលិតគ្រាប់ស្វាយចន្ទីបានចំនួន៨៤ ម៉ឺនតោន កើន២៦ភាគរយ ក្នុងនោះនាំចេញទៅវៀតណាមបានជាង៧៩ម៉ឺនតោន គិតជាទឹកប្រាក់ចំនួន ១ពាន់ ១១០លានដុល្លារអាមេរិក កើន ៣១ភាគរយ ខណៈតម្លៃកើន ៩ភាគរយ ធៀបរយៈពេលដូចគ្នានៅឆ្នាំ២០២៣។ នេះបើតាមការឱ្យដឹងពីលោក អួន ស៊ីឡុត ប្រធានសមាគមស្វាយចន្ទីកម្ពុជា នាថ្ងៃ១៣ ខែវិច្ឆិកា ឆ្នាំ២០២៤។
លោក អួន ស៊ីឡុត ប្រធានសមាគម បានឱ្យដឹងថា៖ ប្រទេសកម្ពុជា រហូតមកដល់ពេលនេះ នៅតែរក្សាបានចំណាត់ថ្នាក់លេខ២ក្នុងពិភពលោកបន្ទាប់ពីប្រទេសកូឌីវ័រ លើការផលិតគ្រាប់ចន្ទីឆៅដោយបរិមាណផលិតបានដល់ទៅជាង៨០ម៉ឺនតោន។
ទាក់ទងនឹងការកែច្នៃគ្រាប់ស្វាយចន្ទី លោក អួន ស៊ីឡុត បានលើកឡើងថា៖ ការផលិតគ្រាប់ស្វាយចន្ទីឆៅនៅកម្ពុជាមានការកើនឡើង តែការកែច្នៃគ្រាប់ស្វាយចន្ទី ហាក់ដូចជាថយចុះ ដោយសារសហគ្រាសក្នុងស្រុកខ្វះទុនបង្វិលដើម្បីទិញគ្រាប់ស្វាយចន្ទីស្តុកទុកមកកែច្នៃ។
លោក អួន ស៊ីឡុត បានបញ្ជាក់ថា៖ សម្រាប់ឆ្នាំ២០២៤ ការកែច្នៃចន្ទីថយចុះ តែនៅឆ្នាំ២០២៥ លោកសង្ឃឹមថា ការកែច្នៃចន្ទីនឹងកើនឡើង ខណៈដែលរោងចក្រស្វាយចន្ទីធំៗ និងក្រុមហ៊ុនកែច្នៃមួយចំនួនចាប់ផ្តើមដំណើរការដែលនឹងអាចផលិតនាំចេញលើសពី១០ភាគរយ។
លោក ស៊ុយ កុកធាន អនុប្រធានសមាគមស្វាយចន្ទីកម្ពុជា បានមានប្រសាសន៍ឱ្យដឹងថា៖ វិស័យស្វាយចន្ទីមួយរយៈក្រោយនេះមានចរន្តល្អ ដោយសារមានក្រុមហ៊ុនជាច្រើនមកពីប្រទេសចិន បានសម្លឹងឃើញការនាំគ្រាប់ស្វាយចន្ទីឆៅពីកម្ពុជាយកទៅកែច្នៃនៅប្រទេសរបស់គេ។ ដូច្នេះការនាំចេញគ្រាប់ស្វាយចន្ទីនឹងមានការកើនឡើង ជាពិសេសឆ្នាំ២០២៥ខាងមុខនេះ។
គួរកត់សម្គាល់ថា កម្ពុជាមានគោលបំណងជំរុញផលិតកម្មគ្រាប់ស្វាយចន្ទី និងអភិវឌ្ឍរោងចក្រកែច្នៃ ព្រមទាំងធ្វើពិពិធកម្មទីផ្សារនាំចេញតាមរយៈគោលនយោបាយជាតិគ្រាប់ស្វាយចន្ទីពីឆ្នាំ២០២២ ដល់ឆ្នាំ ២០២៧ ។ ជាមួយគ្នានេះ កម្ពុជារំពឹងថាសមត្ថភាពកែច្នៃគ្រាប់ស្វាយចន្ទីនឹងកើនឡើងពី ៥ ភាគរយទៅ ២៥ ភាគរយនៅឆ្នាំ២០២៧ និងប្រហែល ៥០ ភាគរយនៅឆ្នាំ២០៣២៕
Account
Security
Favourite Content