សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ សមាគមស្វាយចន្ទីកម្ពុជា មានទិសដៅចង់កាត់បន្ថយការនាំចេញគ្រាប់ស្វាយចន្ទីឆៅឱ្យបាន៧0ភាគរយនៅក្នុងរយៈពេល៥ឆ្នាំខាងមុខ និងងាកមកជំរុញការកែច្នៃក្នុងស្រុក និងពង្រីកការលក់ផលិតផលគ្រាប់ស្វាយចន្ទីក្នុងស្រុកឱ្យបានទូលាយ។
យោងតាមសមាគមស្វាយចន្ទីកម្ពុជា (សសក) បានឱហតដឹងថា ដំណាំស្វាយចន្ទីបានជួយអភិវឌ្ឍន៍សេដ្ឋកិច្ចជនបទដែលមានប្រជាពលរដ្ឋចំនួន ២៥ ០០០គ្រួសារ(កម្ពុជាមានពលរដ្ឋ៦លានកន្លះគ្រួសារ)ដែលប្រកបរបរដាំដំណាំស្វាយចន្ទី។ លើសពីនេះវិស័យស្វាយចន្ទីអាចបង្កើតការងារតាមរដូវកាលសម្រាប់ពលរដ្ឋប្រហែល១២ម៉ឺននាក់។ ប៉ុន្តែការអភិវឌ្ឍលើវិស័យនេះនៅមានកម្រិត ដោយកម្ពុជានៅខ្វះហេដ្ឋារចនាសម្ព័ន្ធក្រោយប្រមូលផលធ្វើឱ្យរំហូរគ្រាប់ស្វាយចន្ទីឆៅភាគច្រើនលើសលប់ ត្រូវនាំចេញទៅក្រៅប្រទេស ដែលធ្វើឱ្យកសិករបាត់បង់តម្លៃបន្ថែម និងមិនអាចបង្កើតការងារអចិន្ត្រៃយ៍ដល់ពលករក្នុងសហគមន៍បាន។
លោក អួន ស៊ីឡុត ប្រធានសមាគមស្វាយចន្ទីកម្ពុជាបានប្រាប់ AMS ថា សមាគមមានទិសដៅកាត់បន្ថយការនាំចេញគ្រាប់ស្វាយចន្ទីឆៅឱ្យបាន ៧0% ដែលបច្ចុប្បន្ននេះការនាំចេញគ្រាប់សា្វយចន្ទីឆៅទៅប្រទេសវៀតណាមក្នុងរយៈពេល៦ ខែនៅតែមានចំនួនច្រើនដដែល ពោលគឺប្រមាណជាង៩០ភាគរយនៃទិន្នផលគ្រាប់ស្វាយចន្ទីសរុប។
លោក អួន ស៊ីឡុត បានបញ្ជាក់ថា ៖
«យើងនៅតែមានផែនការអនុវត្តដើម្បីកាត់បន្ថយការនាំចេញគ្រាប់ឆៅនេះ។ ប៉ុន្តែទាល់តែគ្រប់ភាគីពាក់ព័ន្ធចូលរួម ព្រោះបញ្ហានេះធំណាស់ ។ បើសិនយើងអាចធ្វើបាន គឺការទាក់ទាញវិនិយោគិន ឬក៏មានការកែឆ្នៃ ដែលមកទល់ពេលនេះយើងមាន៤៦ រោងចក្រ ដែលក្នុងនោះមាន៦រោងចក្រជាធុនមធ្យមដែលគាត់អាចផលិតបានចន្លោះពី ៧០០០តោន ទៅ ១៥ ០០០ តោននៃគ្រាប់ស្វាយចន្ទីឆៅ»។
លោកប្រធានសមាគមបានបន្ថែមថា ៖
«បើសិនយើងអាចទាក់ទាញសិប្បកម្មធុនមធ្យមនេះឱ្យបាន៣៥ រោងចក្រ យើងនឹងអាចកាត់បន្ថយការនាំចេញគ្រាប់ស្វាយចន្ទីរហូតដល់ទៅ ៧០% ក្នុងរយៈពេល៥ ឆ្នាំខាងមុខ ហើយរាជរដ្ឋាភិបាលក៏បានជួយផងដែរ ដែលមកទល់នឹងពេលនេះរដ្ឋាភិបាលបានជួយកាត់បន្ថយពន្ធចាំបាច់មួយចំនួនធំដើម្បីលើកស្ទួយវិស័យកសិកម្ម ក្នុងនោះមានគ្រាប់ស្វាយចន្ទីផងដែរ»។
លោក អួន ស៊ីឡុត បានឱ្យដឹងថា នៅក្នុងឆ្នាំ២០២៤នេះ ផ្ទៃដីដាំដុះស្វាយចន្ទីមានសរុប៧០ម៉ឺនហិកតា ក្នុងនោះ៥២ម៉ឺនហិកតាកំពុងប្រមូលផល ចំណែក១៨ម៉ឺនហិកតាទៀតមិនទាន់អាចប្រមូលផលបាន(នៅដើមតូចៗ)នៅឡើយ។ ចំណែកសហគ្រាសកែច្នៃគ្រាប់ស្វាយចន្ទីកាលពីឆ្នាំ២០២៣មានចំនួន៤១ ហើយនៅក្នុងឆ្នាំ២០២៤នេះបានកើនដល់៤៦សហគ្រាសដោយក្នុងនោះ៣៨សហគ្រាសជាសមាជិកសមាគមស្វាយចន្ទីកម្ពុជា។
យោងតាមរបាយការណ៍របស់សមាគមគ្រាប់ស្វាយចន្ទីនៅកម្ពុជា បានឱ្យដឹងថា ក្នុងរយៈពេល ៦ ខែឆ្នាំនេះ កម្ពុជាបានផលិតគ្រាប់ស្វាយចន្ទីឆៅជាង៨១ ម៉ឺនតោន ក្នុងនោះនាំចេញទៅវៀតណាមបានសរុបជាង ៧ សែន ៤ ម៉ឺនតោន ស្មើនឹង ៩១,៨ ភាគរយនៃគ្រាប់ស្វាយចន្ទីឆៅសរុបដែលត្រូវបានប្រមូលផល។
គួរឱ្យដឹងដែរថា ក្នុងគោលបំណងជំរុញការគាំទ្រ និងចែកចាយផលិតផលគ្រាប់ស្វាយចន្ទីកម្ពុជាឱ្យកាន់តែទូលំទូលាយ ក្រសួងពាណិជ្ជកម្ម បានប្រកាសព័ត៌មានស្តីពីការដាក់លក់ផលិតផលគ្រាប់ស្វាយចន្ទីដែលកែច្នៃពីសហគ្រាស និងក្រុមហ៊ុនចំនួន១៤ និងតំណាងផ្សារទំនើប ម៉ាតចំនួន១០ រួមមាន ៖ ផ្សារអ៊ីអន ផ្សារម៉ាក្រូ ផ្សារឡាក់គី ផ្សារជីបម៉ុង ផ្សារថៃហួត ផ្សារបាយ័ន ផ្សារប៊ីកស៊ីខេមបូឌា តេលាម៉ាត 7-Eleven និង Cambodian Superstore។
Account
Security
Favourite Content