ភ្នំពេញ ៖ អគ្គនាយកដ្ឋានពន្ធដារ បានចេញសេចក្តីប្រកាសស្ដីពីការអនុវត្តកម្មវិធីសវនកម្មពន្ធដារឆ្នាំ២០២៤ ដើម្បីជម្រាបជូនដំណឹងដល់អ្នកជាប់ពន្ធទាំងអស់ឱ្យបានដឹង និងត្រៀមខ្លួនឱ្យបានរួចរាល់ ក៏ដូចជាឯកសារពាក់ព័ន្ធ។

តាមរយៈសេចក្តីប្រកាសដែលបានចេញផ្សាយនៅក្នុងសប្ដាហ៍នេះបានឱ្យដឹងថា ៖ អគ្គនាយកដ្ឋានពន្ធដារ នឹងចុះធ្វើសវនកម្មដល់ទីកន្លែងលើសហគ្រាសចំនួន ៣០០៦ ក្នុងឆ្នាំ២០២៤ នេះ ហើយលិខិតជូនដំណឹងស្តីពីការចុះធ្វើសវនកម្មសារពើពន្ធនឹងត្រូវផ្ញើជូនដល់សហគ្រាសនីមួយៗ ដើម្បីត្រៀមខ្លួនក្នុងការផ្តល់កិច្ចសហការជាមួយរដ្ឋបាលសារពើពន្ធ។

ផ្អែកតាមគោលការណ៍នៃសៀវភៅណែនាំស្តីពីបែបបទ និងនីតិវិធីនៃការធ្វើសវនកម្មពន្ធដារសម្រាប់មន្ត្រីពន្ធដារ និងអ្នកជាប់ពន្ធ អគ្គនាយកដ្ឋានពន្ធដារ បានបញ្ជាក់ជូនអ្នកជាប់ពន្ធឱ្យដឹងថា ៖ សហគ្រាសអាចត្រូវបានចុះធ្វើសវនកម្មដល់ទីកន្លែងតែម្តងក្នុងរង្វង់ ៣ឆ្នាំ លើកលែងតែករណីដែលអគ្គនាយកដ្ឋានពន្ធដាររកឃើញថាមានហានិភ័យ ឬភាពមិនប្រក្រតី។ ជាមួយគ្នានេះដែរ សហគ្រាសអាចស្នើសុំមកអគ្គនាយកដ្ឋានពន្ធដារក្នុងករណីសហគ្រាសមានបំណងឱ្យមានការធ្វើសវនកម្មពន្ធដារដើម្បីត្រួតពិនិត្យការបំពេញកាតព្វកិច្ចសារពើពន្ធរបស់ខ្លួនក្នុងរង្វង់ ៣ឆ្នាំនេះ។

អគ្គនាយកដ្ឋានពន្ធដារ សង្ឃឹមយ៉ាងមុតមាំថា អ្នកជាប់ពន្ធតាមរបបស្វ័យប្រកាសទាំងអស់នឹងយកចិត្តទុកដាក់អនុវត្តតាមខ្លឹមសារនៃសេចក្តីជូនដំណឹងនេះឱ្យមានប្រសិទ្ធភាពខ្ពស់។

សូមជម្រាបថា ៖ អគ្គនាយកដ្ឋានពន្ធដារនៃក្រសួងសេដ្ឋកិច្ច និងហិរញ្ញវត្ថុ ជាសេនាធិការរបស់រាជរដ្ឋាភិបាល ទទួលបន្ទុកគ្រប់គ្រង និងប្រមូលចំណូលពន្ធផ្ទៃក្នុងស្របតាមច្បាប់ស្តីពីសារពើពន្ធនៃព្រះរាជាណាចក្រកម្ពុជា ដើម្បីជាប្រយោជន៍ថវិកាជាតិប្រកបដោយប្រសិទ្ធភាព តម្លាភាព ការទទួលខុសត្រូវ និងវិជ្ជាជីវៈខ្ពស់។

យោងតាមអគ្គនាយកដ្ឋានពន្ធដារ សៀវភៅណែនាំស្តីពីបែបទ និងនីតិវិធីនៃការធ្វើសវនកម្មពន្ធដារសម្រាប់មន្ត្រីពន្ធដារ និងអ្នកជាប់ពន្ធនេះ មានគោលបំណងបង្ហាញ និងផ្តល់ជាមធ្យោបាយឱ្យអ្នកជាប់ពន្ធ និងភ្នាក់ងារសេវាកម្មពន្ធដារ ក៏ដូចជាមន្ត្រីពន្ធដារទាំងអស់បានយល់ដឹងអំពីទិដ្ឋភាពទាំងស្រុងនៃការងារធ្វើសវនកម្មពន្ធដារដែលជាមុខងារស្នូលដ៏សំខាន់ក្នុងចំណោមមុខងារស្នូលដទៃទៀតរបស់​បណ្តារដ្ឋបាលសារពើពន្ធនៅក្នុងតំបន់ និងពិភពលោក។ មុខងារសវនកម្មពន្ធដារមានតួនាទីក្នុងការធានាឱ្យបាននូវអនុលោមភាពសារពើពន្ធ និងផ្តល់សេវាបំពេញកាតព្វកិច្ចសារពើពន្ធរបស់អ្នកជាប់ពន្ធតាមច្បាប់ និងលិខិតបទដ្ឋានគតិយុត្តស្តីពីពន្ធដារ។

តើអ្នកជាប់ពន្ធជាអ្វី?

អ្នកជាប់ពន្ធ សម្ដៅដល់រូបវន្តបុគ្គល ឬនីតិបុគ្គលទាំងឡាយណាដែលមានកាតព្វកិច្ចចុះបញ្ជីពន្ធដារ ដាក់លិខិតប្រកាសពន្ធ បង់ពន្ធ និងគោរពតាមនីតិវិធីពន្ធដារនានាដែលបានប្រកាសដោយអគ្គនាយកដ្ឋានពន្ធដារ។ល។ ចំណូលរបស់អ្នកបង់ពន្ធ ត្រូវបានគេរាប់បញ្ចូលជាផ្នែកមួយដ៏សំខាន់ក្នុងការជំរុញកំណើនសេដ្ឋកិច្ចជាតិ។

បើយោងទៅតាមប្រកាសថ្មីរបស់ក្រសួងសេដ្ឋកិច្ច និងហិរញ្ញវត្ថុ លេខ០០៩ ដែលមានប្រសិទ្ធភាពពីថ្ងៃទី១២ ខែមករា ឆ្នាំ២០២១មក បានធ្វើការកែសម្រួល និងការបែងចែង ប្រភេទនៃអ្នកជាប់ពន្ធក្នុងប្រទេសកម្ពុជា ជា ៣ ប្រភេទ គឺ៖ អ្នកជាប់ពន្ធតូច អ្នកជាប់ពន្ធមធ្យម និងអ្នកជាប់ពន្ធធំ។ ការកែសម្រួលថ្មីនេះ មានលក្ខណៈលម្អិត និងច្បាស់លាស់ជាងមុន ​ដែលមានការបែងចែកចំណាត់ថ្នាក់អ្នកចុះបញ្ជីពន្ធដោយយោងទៅតាមផលរបរប្រចាំឆ្នាំរបស់ពួកគេតាមវិស័យចម្បងៗនានា និងមិនមានការប្រែប្រួលតាមទម្រង់អាជីវកម្មដូចពីមុនទេ។ ករណីដែលអ្នកចុះបញ្ជីពន្ធមិនមានការបង្ហាញព័ត៌មានច្បាស់លាស់អំពីផលរបរប្រចាំឆ្នាំ ការបែងចែងចំណាត់ថ្នាក់បន្ទាប់នឹងត្រូវមើលទៅលើទំហំទ្រព្យសកម្ម ដែលអាជីវកម្មនោះមានផ្ទាល់តែម្តង៕