សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពព័ត៌មានពី Vietnam Net បានរាយការណ៍ថា ទំនាក់ទំនងទ្វេរភាគីរវាងវៀតណាម និងកម្ពុជា កាន់តែប្រសើរឡើងជាមួយនឹងកំណើនទំហំពាណិជ្ជកម្មមានតម្លៃលើសពី ១០ ពាន់លានដុល្លារក្នុងឆ្នាំ២០២៤ ។
ប្រភពដដែលបានលើកឡើងទៀតថា ទំនាក់ទំនងសេដ្ឋកិច្ចរវាងវៀតណាម និងកម្ពុជា កាន់តែមានភាពសកម្ម និងមានកំណើនជាបន្តបន្ទាប់ ខណៈដែលប្រមុខថ្នាក់ដឹកនាំប្រទេសទាំង២បានកំណត់គោលដៅឈានឱ្យដល់ ២០ពាន់លានដុល្លារត្រឹមឆ្នាំ២០៣០ ។
លោក Do Viet Phuong ទទួលបន្ទុកការិយាល័យពាណិជ្ជកម្មវៀតណាមប្រចាំកម្ពុជាបានបង្ហាញថា ពាណិជ្ជកម្មទ្វេភាគីលើទំនិញបានកើនឡើង ៣ ដងក្នុងចន្លោះឆ្នាំ២០១៤ និងឆ្នាំ២០២៤ ដែលកើនឡើងពី ៣,៣ ពាន់លានដុល្លារដល់ ១០,១ ពាន់លានដុល្លារអាម៉េរិក ជាមួយនឹងអត្រាកំណើនប្រចាំឆ្នាំជាមធ្យមប្រហែល ១២% ។ ដោយឡែក នៅក្នុងឆ្នាំ២០២៥ ត្រឹមតែរយៈពេល៨ខែ ទំហំពាណិជ្ជកម្មបានកើនជិតដល់ ៨ ពាន់លានដុល្លារអាម៉េរិក។
លោក Phan Thi Thang អនុរដ្ឋមន្ត្រីក្រសួងឧស្សាហកម្ម និងពាណិជ្ជកម្មវៀតណាមបានលើកឡើងថា កម្ពុជា គឺជាប្រទេសជិតខាងដ៏ជិតស្និទ្ធដែលមានទីតាំងយុទ្ធសាស្ត្រល្អ ដើរតួនាទីជាច្រកចេញចូល និងជាមជ្ឈមណ្ឌលឆ្លងកាត់ក្នុងអនុតំបន់មេគង្គ។ លើសពីនេះ ប្រទេសទាំងពីរមានកិច្ចព្រមព្រៀងសំខាន់ៗដូចជា អនុស្សរណៈនៃការយោគយល់ឆ្នាំ២០១៩ ស្តីពីការអភិវឌ្ឍន៍ហេដ្ឋារចនាសម្ព័ន្ធពាណិជ្ជកម្មតាមព្រំដែន កិច្ចព្រមព្រៀងពាណិជ្ជកម្មព្រំដែនឆ្នាំ២០២៤ និងផែនការសកម្មភាពឆ្នាំ២០២៥-២០២៦ ដើម្បីជំរុញពាណិជ្ជកម្មទ្វេភាគី។
អនុរដ្ឋលេខាធិការក្រសួងពាណិជ្ជកម្មកម្ពុជា លោក ទិត្យ រិទ្ធីប៉ូល បានលើកឡើងថា កម្ពុជា និងវៀតណាម មិនត្រឹមតែជាអ្នកជិតខាងដ៏ជិតស្និទ្ធប៉ុណ្ណោះទេ ប៉ុន្តែក៏ជាដៃគូដែលគួរឱ្យទុកចិត្តផងដែរ។ កម្ពុជាមានទាក់ទាញមួយចំនួនសម្រាប់ធុរកិច្ចវៀតណាមដូចជា ស្ថិរភាពនយោបាយ កម្លាំងពលកម្មវ័យក្មេង ទីតាំងយុទ្ធសាស្ត្រ និងការលើកទឹកចិត្តវិនិយោគដ៏អំណោយផល។ ទន្ទឹមនឹងនេះ វៀតណាមក៏មានចំណុចខ្លាំងលើផលិតផលកសិកម្មកែច្នៃ ទំនិញប្រើប្រាស់ សម្ភារៈសំណង់ និងគ្រឿងចក្រ ដែលសមស្របនឹងតម្រូវការនាំចូលដ៏រឹងមាំរបស់កម្ពុជា។
អ្នកជំនាញសេដ្ឋកិច្ចបានកត់សម្គាល់ថា សេដ្ឋកិច្ចនៃប្រទេសទាំងពីរគឺជាការបំពេញបន្ថែមឱ្យគ្នាទៅវិញទៅមក ដែលមិនមែនជាការប្រកួតប្រជែងគ្នាដោយផ្ទាល់នោះទេ។ យ៉ាងណាមិញ បញ្ហាប្រឈមនៅតែមាន ដោយសារហេដ្ឋារចនាសម្ព័ន្ធនៃការដឹកជញ្ជូនមួយចំនួនមិនទាន់បានអភិវឌ្ឍ ជាពិសេសតម្លៃឃ្លាំងស្តុកទំនិញនៅច្រកព្រំដែនមួយចំនួនបានបង្កើនថ្លៃ ខណៈភាពខុសគ្នានៃស្តង់ដារបច្ចេកទេស និងព័ត៌មានទីផ្សារនៅមានកម្រិតដែលជាបញ្ហារារាំងដល់យុទ្ធសាស្ត្ររយៈពេលវែង។ ជាមួយគ្នានេះ ដើម្បីជម្នះបញ្ហាប្រឈមទាំងនេះ និងសម្រេចឱ្យបាននូវគោលដៅ ២០ពាន់លានដុល្លារអាម៉េរិកនៅឆ្នាំ២០៣០ អ្នកជំនាញ និងមន្ត្រីបានស្នើនូវដំណោះស្រាយដ៏ទូលំទូលាយមួយចំនួន ដែលទាមទារឱ្យមានការសម្របសម្រួលរវាងភាគីទាំងពីរ។
លោក Phan Thi Thang អនុរដ្ឋមន្ត្រីក្រសួងឧស្សាហកម្ម និងពាណិជ្ជកម្មវៀតណាម បានអំពាវនាវឱ្យមានការវិនិយោគលើហេដ្ឋារចនាសម្ព័ន្ធតាមព្រំដែន ភស្តុភារ ឃ្លាំងស្តុកទំនិញ និងទីផ្សារតាមព្រំដែន ដើម្បីជំរុញដល់ការនាំចេញ។ ដោយឡែក ខាងភាគីកម្ពុជា អនុរដ្ឋលេខាធិការក្រសួងពាណិជ្ជកម្ម លោក ទិត្យ រិទ្ធីប៉ូល ក៏បានស្នើឱ្យមានការធ្វើទំនើបកម្មហេដ្ឋារចនាសម្ព័ន្ធពាណិជ្ជកម្មតាមព្រំដែន ពង្រឹងទំនាក់ទំនង និងដឹកជញ្ជូនឆ្លងកាត់ព្រំដែន ធ្វើឱ្យកិច្ចសហប្រតិបត្តិការស៊ីជម្រៅក្នុងក្របខ័ណ្ឌតំបន់ ដូចជា អាស៊ាន និង RCEP ។ បន្ថែមពីនេះ លោកក៏បានអញ្ជើញធុរជនវៀតណាមមកបណ្តាក់ទុនក្នុងវិស័យដែលមានសក្ដានុពលខ្ពស់របស់កម្ពុជា ដូចជា កសិកម្មទំនើប ការកែច្នៃម្ហូបអាហារ និងបច្ចេកវិទ្យាឌីជីថលជាដើម៕
Account
Security
Favourite Content