ភ្នំពេញ៖ នៅក្នុងឆ្នាំ២០២៥ កន្លងទៅនេះ ការប្រមូលចំណូលពន្ធគយបានចំនួន ១២ ៧៦០.​៥​ ប៊ីលានរៀល ឬ ប្រមាណជាង ៣ ១៨១.៣ លានដុល្លារសហរដ្ឋអាម៉េរិក ដែលស្មើនឹង ១២៤.៥% នៃផែនការ​ឆ្នាំ២០២៥។ កំណើនវិជ្ជមាននេះ កើតឡើងដោយសារការកើនឡើងនៃសកម្មភាពនាំចេញ-នាំចូលទំនិញរបស់កម្ពុជាជាមួយបណ្តាដៃគូអន្តរជាតិ។ នេះបើតាមការឱ្យដឹងរបស់ឯកឧត្តមបណ្ឌិត គុណ ញឹម រដ្ឋមន្ដ្រីប្រតិភូអមនាយករដ្ឋមន្ដ្រី ទទួលបន្ទុកអគ្គនាយកនៃអគ្គនាយកដ្ឋានគយ និងរដ្ឋាករកម្ពុជា នៅក្នុងវេទិកាផ្សព្វផ្សាយ និងដាក់ឲ្យអនុវត្ដផែនការសកម្មភាពឆ្នាំ២០​២​៦ របស់អគ្គនាយកដ្ឋានគយ និងរដ្ឋាករកម្ពុជា នៅសាលសន្និសីទនៃសាលាជាតិគយ នាព្រឹកថ្ងៃទី២៧ ខែមករា ឆ្នាំ២០២៦។

វេទិកានេះ ធ្វើឡើងក្នុងគោលបំណងពង្រឹងសមត្ថភាពស្ថាប័នគយ អនុលោមភាព និងការអនុវត្តច្បាប់ កិច្ចសហប្រតិបតិ្តការជាមួយស្ថាប័នពាក់ព័ន្ធ និងវិស័យឯកជន ព្រមទាំងការធ្វើទំនើបកម្មប្រព័ន្ធបច្ចេកវិទ្យាព័ត៌មាន ជាពិសេស កិច្ចសម្រួលពាណិជ្ជកម្ម និងដើម្បីធានាឱ្យបាននូវការអនុវត្តប្រកបដោយប្រសិទ្ធភាព និងការចូលរួមចំណែកពីគ្រប់ភាគីពាក់ព័ន្ធទាំងអស់ផងដែរ។

ឯកឧត្តមអគ្គនាយកនៃអគ្គនាយកដ្ឋានគយ និងរដ្ឋាករកម្ពុជា បាន​លើក​ឡើង​ថា៖ ភាព​ល្អ​ប្រសើរ​នៃ​ការធ្វើ​ពាណិជ្ជកម្ម​អន្តរជាតិ​របស់​​​​កម្ពុជា កាល​ពី​​ឆ្នាំ​២០២៥ បាន​ជួយ​ឱ្យ​ការ​ប្រមូល​ចំណូល​ពន្ធ​គយ​ទទួល​បាន​លទ្ធផល​ល្អ​ប្រសើរ​គួរ​ឱ្យ​កត់​សម្គាល់ ។ ចំណូល​ពន្ធ​គយ​​ឆ្នាំ​២០២៥ គឺ​​ខ្ពស់​​ប្រហាក់​ប្រហែល​​ឆ្នាំ​២០១៩ (មុន​ពេល​សេដ្ឋកិច្ច​ពិភពលោក​ជួប​នឹង​វិបត្តិ​បណ្តាល​មក​ពីការ​រីករាលដាល​ជំងឺកូវីដ​១៩ បញ្ហា​ជម្លោះ​ភូមិសាស្ត្រ​នយោបាយ និង​សង្គ្រាម​នៅ​ប្រទេស​មួយ​ចំនួន​ដែលកំពុង​បន្ត​​ដល់​ពេល​នេះ)​។​

គួរជម្រាបថា កាល​ពី​​ឆ្នាំ២០២៤ ការប្រមូលចំណូលពន្ធគយសម្រេចបានប្រមាណ​ ១០ ៥៤២,២​ ពាន់​លានរៀល (២ ៥៩០,៣​ លានដុល្លារ) កើនឡើង ១៣,៨%​​បើ​​ធៀបនឹងចំណូលប្រមូលបាន​ក្នុង​​​ឆ្នាំ​២០២៣។ សូមជម្រាបផងដែរថា នៅក្នុងច្បាប់ថវិកាកាលពីឆ្នាំ២០១៩ កំណត់ឲ្យអគ្គនាយកដ្ឋានគយ និងរដ្ឋាករកម្ពុជា ប្រមូលចំណូលឲ្យបាន ២ ២៦០លានដុល្លារ ប៉ុន្តែគយបានរកចំណូលលើសច្បាប់ថវិការហូតដល់ជាង ៩០០លានដុល្លារ ដែលសរុបជិត ៣.២ពាន់លានដុល្លារ។

គួរបញ្ជាក់ថា៖ អគ្គនាយកដ្ឋានគយ និងរដ្ឋាករកម្ពុជា តែងរៀបចំផែនការសកម្មភាពការងារជារៀងរាល់ឆ្នាំ ហើយក្នុងផែនការសកម្មភាពឆ្មាំ២០២៦នេះ មានបែងចែកជា ៣ផ្នែកសំខាន់ៗ គឺ (១) ការពង្រឹងគោលនយោបាយពន្ធអាករ និងការងារបច្ចេកទេសគយ, (២) កិច្ចសម្រួលពាណិជ្ជកម្ម, អនុលោមភាពនិងការអនុវត្តច្បាប់, និងការធ្វើទំនើបកម្មប្រព័ន្ធបច្ចេកវិទ្យាព័ត៌មាន, និង (៣) ការពង្រឹងសមត្ថភាពស្ថាប័នគយ។ ក្នុងនោះ ការជំរុញកែលម្អកិច្ចសម្រួលពាណិជ្ជកម្ម និងការពង្រីកនិងពង្រឹងការប្រើប្រាស់ប្រព័ន្ធបច្ចេកវិទ្យាព័ត៌មាន ត្រូវបានចាត់ទុកជាអាទិភាពចម្បងរបស់អគ្គនាយកដ្ឋានគយនិងរដ្ឋាករកម្ពុជា៕

យោង​តាម​ច្បាប់​ថវិកា ឆ្នាំ​២០២៦ សម្រាប់​ឆ្នាំ​២០២៦ នេះ​រាជ​រដ្ឋាភិបាល ​គ្រោង​ប្រមូល​ចំណូល​សារពើពន្ធ​ឱ្យ​បាន ២៧ ៣២៩ ពាន់​លាន​រៀល ឬ​ប្រហែល ៦,៨ ពាន់លាន​ដុល្លារ (ឆ្នាំ​២០២៥ មាន​ចំនួន ២៧ ៩៧៣ ពាន់​លាន​រៀល) ដោយ​ក្នុង​នោះចំណូល​ពន្ធគយ មាន​​ប្រមាណ ១២ ០៤៩ ពាន់​លាន​រៀល(៣ ពាន់លាន​ដុល្លារ) និង​ចំណូល​ពន្ធដារ ១៥ ២៨០ ពាន់​លាន​រៀល( ៣,៨ ពាន់លាន​ដុល្លារ)៕