បរទេស ៖ យោងតាមប្រភពព័ត៌មានពី Investing បានរាយការណ៍ថា កាណាដា កំពុងពិចារណាលើការដាក់ពន្ធលើការនាំចេញសារធាតុ​អ៊ុយរ៉ាញ៉ូម និង​ប្រេងរបស់ខ្លួន ប្រសិនបើ​អាម៉េរិកពិតជាអនុវត្តការដាក់ពន្ធលើការនាំចូលពីកាណាដា។

បច្ចុប្បន្ននេះ មន្ត្រីនៅក្នុងរដ្ឋបាលរបស់នាយករដ្ឋមន្ត្រី Justin Trudeau កំពុងពិភាក្សាអំពីលទ្ធភាពនៃការដំឡើងពន្ធលើការនាំចេញលើទំនិញ ដូចជា អ៊ុយរ៉ាញ៉ូម ប្រេង និងប៉ូតាស្យូម។ មធ្យោបាយនេះត្រូវបានលើក​ឡើងជាការសងសឹកទៅអាម៉េរិកវិញ​ បន្ទាប់ពី Donald Trump ប្រកាសពីការដាក់​ពន្ធលើការនាំចូលពីកាណាដា ម៉ិកស៊ិក និងចិន។ លើសពីនេះ កាណាដាទំនងជានឹងដាក់ពន្ធលើទំនិញដែលផលិតដោយសហរដ្ឋអាមេរិក និងដាក់កម្រិតលើការនាំចេញផលិតផលជាក់លាក់ មុនពេលពិចារណាដាក់ពន្ធលើការនាំចេញ ហើយវានឹងបង្កើនការចំណាយសម្រាប់អ្នកប្រើប្រាស់ និងអាជីវកម្មរបស់សហរដ្ឋអាម៉េរិក។ នៅក្នុងការធ្វើបច្ចុប្បន្នភាពសារពើពន្ធ និងសេដ្ឋកិច្ចដែលគ្រោងធ្វើនៅថ្ងៃចន្ទខាងមុខនេះ រដ្ឋាភិបាលកាណាដាអាចនឹងបង្កើនសិទ្ធិអំណាចរបស់ខ្លួនលើការត្រួតពិនិត្យការនាំចេញ។

ក្នុងនាមជាអ្នកផ្គត់ផ្គង់ប្រេងដ៏ធំបំផុតមួយសម្រាប់សហរដ្ឋអាម៉េរិក ការដាក់ពន្ធលើការនាំចេញរបស់កាណាដាអាចជះឥទ្ធិពលយ៉ាងខ្លាំងដល់រោងចក្រចម្រាញ់ប្រេងរបស់សហរដ្ឋអាម៉េរិក ជាពិសេសនៅតំបន់ Midwest ដែលពឹងផ្អែកលើប្រេងឆៅរបស់កាណាដាស្ទើរតែពាក់កណ្តាលនៃផលិតកម្មរបស់ពួកគេ។ ការនាំចេញដ៏សំខាន់មួយទៀតរបស់កាណាដាគឺអ៊ុយរ៉ាញ៉ូម ដែលជាប្រភពឥន្ធនៈបរទេសដ៏សំខាន់សម្រាប់រោងចក្រថាមពលនុយក្លេអ៊ែររបស់សហរដ្ឋអាម៉េរិក។ មិនត្រឹមតែប៉ុណ្ណ៉ ក្រសួងការពារជាតិអាម៉េរិកក៏បានវិនិយោគលើគម្រោងកូបាល់ និង ក្រាភីតរបស់កាណាដាផងដែរ ដើម្បីកាត់បន្ថយការពឹងផ្អែកលើខ្សែសង្វាក់ផ្គត់ផ្គង់របស់ចិន។

ទោះបីជាអ្នកវិភាគខ្លះព្យាករណ៍ថា Trump អាចនឹងលើកលែងពន្ធលើការនាំចូលរបស់កាណាដា និងម៉ិកស៊ិកក៏ដោយ ប៉ុន្តែខាងកាណាដាលើកឡើងថា ប្រសិនបើពន្ធថាមពលត្រូវបានលើកលែង ប៉ុន្តែផលិតផលផ្សេងទៀតត្រូវបានកំណត់គោលដៅដដែលនោះ ពួកគេនឹងឆ្លើយតបទៅវិញ។ ក្នុង​ស្ថានភាព​បែប​នេះ កាណាដា​អាច​នឹងអនុវត្ត​ពន្ធលើការ​នាំ​ចេញរបស់ខ្លួនទៅកាន់អាម៉េរិក។ យ៉ាងណាមិញ ផែនការនៃការអនុវត្តពន្ធនាំចេញអាចប្រឈមនឹងការប្រឆាំងក្នុងស្រុក។ អភិបាលខេត្ត Danielle Smith និង Scott Moe បានសម្តែងការមិនពេញចិត្តយ៉ាងខ្លាំងចំពោះវិធានការបែបនេះ ដោយសារវានឹងបង្កើនការចំណាយលើការរស់នៅរបស់អ្នករស់នៅកាណាដាផងដែរ។ បន្ថែមពីនេះ ការអនុវត្ត​ពន្ធលើការ​នាំ​ចេញក៏បង្កហានិភ័យយ៉ាងខ្លាំងដល់សេដ្ឋកិច្ចកាណាដាផងដែរ ដោយសារផលិតផលថាមពលមានចំណែកប្រហែម ៣០ ភាគរយនៃការនាំចេញទៅកាន់សហរដ្ឋអាមេរិក។ ក្រុមហ៊ុន​ផលិត​អ៊ុយរ៉ាញ៉ូម​ធំ​ជាង​គេ​ទីពីរ​របស់​កាណាដា Cameco លក់​​អ៊ុយរ៉ាញ៉ូម និង​ឥន្ធនៈ​របស់​ខ្លួន​ជា​ចម្បង​សម្រាប់​អាម៉េរិកក្នុង​ការផលិត​នុយក្លេអ៊ែរ​។ ការផលិតអ៊ុយរ៉ាញ៉ូមក្នុងស្រុកនៅអាមេរិកមានតិចតួច និងពឹងផ្អែកខ្លាំងលើការនាំចូល៕