សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ ជនជាតិកាណាដា និងអង់គ្លេស អាចទៅធ្វើដំណើរទៅកាន់ប្រទេសចិនដោយគ្មានទិដ្ឋាការ (visa-free) ជាផ្លូវការចាប់ពីថ្ងៃអង្គារ៍ ទី១៧ កុម្ភៈ ដែលកើតឡើងបន្ទាប់ពីមេដឹកនាំនៃប្រទេសទាំងពីរបានទៅបំពេញទស្សនកិច្ចនៅទីក្រុងប៉េកាំងកាលពីខែមករា កន្លងទៅ នេះបើយោងតាមសេចក្ដីរាយការណ៍ពី BBC។
កាលពីខែមករា នាយករដ្ឋមន្ត្រីអង់គ្លេស លោក Keir Starmer និង កាណាដា លោក Mark Carney បានទៅបំពេញទស្សនកិច្ចនៅទីក្រុងប៉េកាំងរៀងៗខ្លួន ក្នុងគោលបំណងពង្រឹងទំនាក់ទំនងជាមួយប្រទេសចិន និងចៀសពីសម្ពាធពាណិជ្ជកម្មរបស់អាម៉េរិក។ ជាផ្នែកមួយនៃកិច្ចព្រមព្រៀងជាមួយនឹងចិន ជនជាតិអង់គ្លេស និងកាណាដាអាចធ្វើដំណើរទៅកាន់ចិនដីគោកដោយគ្មានទិដ្ឋាការ ឬ visa-free បានរយៈពេល ៣០ ថ្ងៃដោយអនុម័តជាផ្លូវការចាប់ពីថ្ងៃទី ១៧ ខែកុម្ភៈ ឆ្នាំ២០២៦ ។
ក្រសួងការបរទេសរបស់ចិន បានបញ្ជាក់ថា ការអនុញ្ញាតឲ្យចូលប្រទេសចិនដោយគ្មានទិដ្ឋាការនឹងត្រូវបានអនុញ្ញាតសម្រាប់ទេសចរណ៍ អាជីវកម្ម និង ការមកលេងគ្រួសារ ឬ មិត្តភ័ក្ត្រ។ ការអនុម័តនេះនឹងជួយសម្រួលបន្ថែមទៀតដល់ការផ្លាស់ប្តូររវាងប្រជាជន និងប្រជាជន ជាពិសេសរវាងជនជាតិចិន និងជនជាតិប្រទេសដទៃទៀត។ មិនត្រឹមតែប៉ុណ្ណោះ ការផ្លាស់ប្តូរនេះនាំមកនូវផលប្រយោជន៍សម្រាប់អ្នកកាន់លិខិតឆ្លងដែនអង់គ្លេស និងកាណាដា ដូចទៅនឹងប្រទេសមួយចំនួនដែលទទួលបាន visa-free សម្រាប់ការចូលទៅប្រទេសចិនដូចជា បារាំង អាល្លឺម៉ង់ អ៊ីតាលី អូស្ត្រាលី និងជប៉ុនជាដើម។
យោងតាមការិយាល័យស្ថិតិជាតិបានឱ្យដឹងថា ជនជាតិអង់គ្លេសប្រហែល ៦២០ ០០០ នាក់បានធ្វើដំណើរមកកាន់ប្រទេសចិនក្នុងឆ្នាំ ២០២៤ ។ នេះគឺជាដំណើរទស្សនកិច្ចជាលើកដំបូងរបស់នាយករដ្ឋមន្ត្រីអង់គ្លេស បើគិតចាប់តាំងពីជំនាន់លោកស្រី Theresa May ក្នុងឆ្នាំ ២០១៨ ប៉ុន្តែត្រូវបានឥស្សរជនមួយចំនួនប្រឆាំងរិះគន់ក្នុងកំឡុងពេលនោះ។នាយករដ្ឋមន្ត្រីអង់គ្លេសលោក Keir Starmer លើកឡើងថា កិច្ចព្រមព្រៀងនេះនឹងធ្វើឱ្យកាន់តែងាយស្រួលសម្រាប់អាជីវកម្មរបស់ជនជាតិអង់គ្លេសអាចពង្រីកខ្លួនទៅកាន់ប្រទេសចិនបាន ទោះបីជាមានការរិះគន់ថាការបន្ធូរបន្ថយនេះមើលរំលងបញ្ហាសិទ្ធិមនុស្ស និងសន្តិសុខជាតិក៏ដោយ។ មុនពេលធ្វើដំណើរទៅកាន់ប្រទេសចិន រដ្ឋាភិបាលរបស់លោក Keir Starmer បានអនុម័តផែនការសម្រាប់ការសាងសង់ស្ថានទូតចិនថ្មីមួយនៅកណ្តាលទីក្រុងឡុងដ៍ផងដែរ បើទោះបីជាក្រុមប្រឆាំងអះអាងថា វាអាចប្រើជាគោលបំណងសម្រាប់ចារកម្ម និងបង្កហានិភ័យសន្តិសុខក៏ដោយ។
លើសពីនេះ មេដឹកនាំទាំងអង់គ្លេស និង ចិនក៏បានព្រមព្រៀងគ្នាក្នុងការធ្វើឱ្យទំនាក់ទំនងផ្នែកពាណិជ្ជកម្មកាន់តែស៊ីជម្រៅលើសេវាកម្ម ការថែទាំសុខភាព បច្ចេកវិទ្យាបៃតង និងហិរញ្ញវត្ថុផងដែរ ទោះបីជាគ្មានកិច្ចព្រមព្រៀងពាណិជ្ជកម្មសេរីណាមួយត្រូវបានប្រកាសក៏ដោយ។ សម្រាប់ទំនាក់ទំនងទ្វេភាគីរវាងចិន និង កាណាដាវិញ ភាគីទាំងពីរបានឈានដល់កិច្ចព្រមព្រៀងកាត់បន្ថយពន្ធលើលើទំនិញដែលបានជ្រើសរើសរួមគ្នាទៅវិញទៅមក។ នៅក្រោមកិច្ចព្រមព្រៀងនេះ កាណាដានឹងអនុញ្ញាតឱ្យមានការនាំចូលរថយន្តអគ្គិសនីរបស់ចិនចំនួន ៤៩ ០០០ គ្រឿងចូលទៅក្នុងទីផ្សាររបស់ខ្លួនជារៀងរាល់ឆ្នាំក្នុងអត្រាពន្ធទាប ៦,១% បន្ទាប់ពីការដំឡើងពន្ធលើយានយន្តដល់ ១០០% កាលពីខែតុលា ឆ្នាំ២០២៤។ ជាថ្នូរមកវិញ ទីក្រុងប៉េកាំង នឹងកាត់បន្ថយពន្ធលើការនាំចូលកសិផលរបស់កាណាដា ត្រូវកាត់បន្ថយមកត្រឹម ១៥% ពីអត្រា ៨៥%៕
Account
Security
Favourite Content