បរទេស៖ យោងតាមប្រភពព័ត៌មានពី BBC បានរាយការណ៍ថា ថ្នាក់ដឹកនាំកំពូលរបស់សហរដ្ឋអាម៉េរិក និងចិន បានយល់ព្រមរួមគ្នា និងឈានដល់កិច្ចព្រមព្រៀងមួយជាផ្លូវការដើម្បីរក្សាទុក TikTok ឱ្យដំណើរការនៅក្នុងទឹកដីសហរដ្ឋអាម៉េរិកដដែល។

ថ្មីៗនេះ ប្រធានាធិបតីអាម៉េរិក Donald Trump និយាយថា ៖

«យើងមានកិច្ចព្រមព្រៀងមួយនៅលើ TikTok ហើយបានឈានដល់កិច្ចព្រមព្រៀងជាមួយប្រទេសចិន ហើយខ្ញុំនឹងនិយាយជាមួយប្រធានាធិបតី Xi នៅថ្ងៃសុក្រសប្ដាហ៍នេះ ដើម្បីបញ្ជាក់បន្ថែមទៀត»។

គួរបញ្ជាក់ដែរថា TikTok គឺជាវេទិកាប្រព័ន្ធផ្សព្វផ្សាយសង្គមដាក់ដំណើរការដោយក្រុមហ៊ុនចិន ByteDance ដែលស្ថិតក្នុងហានិភ័យនៃជម្រើសចំនួនពីរ គឺត្រូវតែលក់ប្រតិបត្តិការរបស់ខ្លួននៅអាម៉េរិក ឬ បិទដំណើរការនៅក្នុងសហរដ្ឋអាម៉េរិកនេះតែម្ដង។ យ៉ាងណាមិញ Trump បានពន្យារពេលម្តងហើយម្តងទៀតនូវការហាមឃាត់នេះ ចាប់តាំងពីមានការប្រកាសជាលើកដំបូងកាលពីខែមករា ប៉ុន្តែ ក្រោយមកមិនយូរប៉ុន្មាន លោក Trump បានបង្ហើប​ថា ​អ្នក​ទិញកម្មវិធី TikTok ​នឹង​ត្រូវ​ប្រកាស​ក្នុង​ពេល​ឆាប់ៗ​នេះ។

យោងតាមកាសែត Wall Street Journal បានរាយការណ៍ថា ក្រោមកិច្ចព្រមព្រៀងដែលកំពុងចរចាវាងអាម៉េរិក និងចិន អាជីវកម្ម TikTok នៅអាម៉េរិកអាចនឹងត្រូវបានគ្រប់គ្រងដោយសម្ព័ន្ធវិនិយោគិនដែលរួមបញ្ចូលក្រុមហ៊ុនបច្ចេកវិទ្យា Oracle, ក្រុមហ៊ុនភាគហ៊ុនឯកជន Silver Lake, និងក្រុមហ៊ុនបណ្តាក់ទុន Andreessen Horowitz ។ ក្រោមកិច្ចព្រមព្រៀងនេះ វិនិយោគិនអាម៉េរិកនឹងកាន់កាប់ភាគហ៊ុនប្រហែល ៨០% ​និងគ្រប់គ្រងក្រុមប្រឹក្សាភិបាល ដែលសមាជិកដែលជាថ្នាក់ដឹកនាំម្នាក់នោះនឹងត្រូវជ្រើសរើសដោយរដ្ឋាភិបាលអាម៉េរិក។

កាលពីថ្ងៃចន្ទសប្ដាហ៍នេះ គណៈប្រតិភូពាណិជ្ជកម្មអាម៉េរិកបានលើកឡើងថា ខ្លួនបានឈានដល់កិច្ចព្រមព្រៀងក្របខ័ណ្ឌជាមួយប្រទេសចិន។ ទ​ន្ទឹមនឹងនេះ លោក Wang Jingtao អនុប្រធានរដ្ឋបាលអ៊ីនធឺណេតរបស់ប្រទេសចិន បានស្នើនៅក្នុងសន្និសីទសារព័ត៌មានថា កិច្ចព្រមព្រៀងគួររួមបញ្ចូលនូវការផ្តល់អាជ្ញាបណ្ណ ដែលជាសិទ្ធិកាន់កាប់លើកម្មសិទ្ធិបញ្ញា។

កិច្ចព្រមព្រៀងនេះនឹងលាយបញ្ចូលគ្នាទាំងអ្នកវិនិយោគបច្ចុប្បន្ន និងថ្មី ខណៈដែល Oracle នឹងរក្សាកិច្ចព្រមព្រៀងដែលមានស្រាប់របស់ខ្លួនក្នុងការធ្វើជាម្ចាស់ផ្ទះ និង ម៉ាស៊ីនមេរបស់ TikTok នៅក្នុងអាម៉េរិក ដែលចំណុចនេះគឺជាកង្វល់ចម្បងមួយរបស់សមាជិកសភាអាម៉េរិក ដោយពួកគេព្រួយបារម្ភអំពីទិន្នន័យដែលត្រូវបានចែករំលែកជាមួយប្រទេសចិន។

គួរឲ្យបញ្ជាក់ដែថា Trump បានអំពាវនាវឱ្យមានការហាមឃាត់ TikTok នៅក្នុងអាម៉េរិកតាំងពីអាណត្តិដំបូងរបស់គាត់មកម្ល៉េះ។ កាលពីខែមករា តុលាការកំពូលរបស់អាម៉េរិកបានអនុម័តច្បាប់មួយដែលបានបង្កើតកាលពីខែមេសា ឆ្នាំ២០២៤ ដោយហាមឃាត់​ TikTok នៅក្នុងប្រទេស លុះត្រាតែក្រុមហ៊ុនមេរបស់ចិន ByteDance លក់ប្រតិបត្តិការនៅអាម៉េរិកចេញ។ ក្រសួងយុត្តិធម៌អាម៉េរិក បានលើកឡើងថា ការចូលប្រើប្រាស់ TikTok របស់ពលរដ្ឋនៅអាម៉េរិកអាចបង្កជាការគំរាមកំហែងសន្តិសុខជាតិធ្ងន់ធ្ងរ ដោយសារទិន្នន័យរបស់ពួកគេនឹងចូលទៅក្នុងកម្មវិធី។ យ៉ាងណាមិញ ByteDance មិនព្រមលក់ចេញនោះទេ ប៉ុន្តែរក្សានូវប្រតិបត្តិការរបស់អាម៉េរិកដាច់ដោយឡែកទាំងស្រុង ហើយនិយាយថាគ្មានព័ត៌មានណាមួយត្រូវបានចែករំលែកជាមួយរដ្ឋាភិបាលចិននោះឡើយ៕