អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា និងជាប្រធានគណៈកម្មការសម្របសម្រួលក្រុមការងារផ្នែកឯកជនសម្រាប់យន្តការវេទិការាជរដ្ឋាភិបាល-ផ្នែកឯកជន (គ.ស.ឯ.រ.ជ) តំណាងផ្នែកឯកជន បានដឹកនាំសហប្រធានក្រុមការងារផ្នែកឯកជនទាំង១៦ និងអនុប្រធានសភាពាណិជ្ជកម្មកម្ពុជា សមាគម និងសភាពាណិជ្ជកម្ម-ធុរកិច្ច វិនិយោគជាតិ-អន្តរជាតិ ដែលមានភាពជាតំណាងរបស់ខ្លួននៅកម្ពុជា សម្រាប់កិច្ចប្រជុំផ្នែកឯកជន ស្តីពី “ការវាយតម្លៃ និងការផ្តល់ជាអនុសាសន៍ លើផលប៉ះពាល់ ក្នុងរយៈពេលខ្លី មធ្យម និងវែង ពីស្ថានការណ៍តានតឹងព្រំដែនកម្ពុជា-ថៃ”។

កិច្ចប្រជុំដ៏មានសារសំខាន់នេះត្រូវបានធ្វើឡើងនៅអគារ Wing Tower កាលពីថ្ងៃទី៣០ ខែមិថុនា ឆ្នាំ២០២៥ ដោយមានការចូលរួមមកពីគ្រប់ភាគីពាក់ព័ន្ធ រួមមាន​សមាគមជាតិ-អន្តរជាតិ សភាពាណិជ្ជកម្មអន្តរជាតិប្រចាំនៅកម្ពុជា សហប្រធានក្រុមការងារទាំងអស់ និងធុរជនជាច្រើនរូបផងដែរ។

អ្នកឧកញ៉ា គិត ម៉េង បានមានប្រសាសន៍ថា គោលបំណងនៃកិច្ចប្រជុំនេះគឺពិភាក្សាលើបញ្ហាសំខាន់ ដើម្បីធ្វើការវាយតម្លៃពីបញ្ហាប្រឈម សំណើ និងសំណូមពរផ្សេងៗ ព្រមទាំងស្វែងរកចម្លើយជាយុទ្ធសាស្ត្រដែលសមស្រប និងបង្កើនកិច្ចសហការ ផ្តល់ជាដំណោះស្រាយ​លើផលប៉ះពាល់ដែលកំពុងជួបប្រទះក្នុងកាលៈទេសៈនេះ។

ជាមួយគ្នានេះ គោលបំណងនៃកិច្ចប្រជុំនេះ គឺពិភាក្សាលើបញ្ហាសំខាន់ ដើម្បីធ្វើការវាយតម្លៃពីបញ្ហាប្រឈម សំណើ និងសំណូមពរផ្សេងៗ ព្រមទាំងស្វែងរកចម្លើយជាយុទ្ធសាស្ត្រដែលសមស្រប និងបង្កើនកិច្ចសហការណ៍ផ្តល់ជាដំណោះស្រាយលើផលប៉ះពាល់កំពុងជួបប្រទះក្នុងកាលៈទេសៈនេះ។ អង្គប្រជុំបានលើកឡើងនូវបញ្ហា យោបល់សំខាន់ៗ រួមមាន៖ ១. វិបត្តិព្រំដែនកម្ពុជា-ថៃកំពុងបង្កការរាំងស្ទះដល់ពាណិជ្ជកម្ម ការធ្វើទេសចរណ៍ និងចរន្តពលកម្ម, ២. វិស័យមីក្រូហិរញ្ញវត្ថុ: ស្ថាប័នឥណទានខ្នាតតូច បានសម្គាល់ហានិភ័យប្រព័ន្ធ ប្រសិនបើពលករកម្ពុជានៅថៃ ត្រឡប់មកវិញហើយជួបការលំបាកក្នុងការសងបំណុល, ៣. ការរាំងស្ទះលំហូរពាណិជ្ជកម្ម បង្កឲ្យតម្លៃដើមបង្កើតរោងចក្រខ្ពស់ឡើងនៅក្បែរព្រំដែន ខណៈដែលការស្វែងរកអ្នកផ្គត់ផ្គង់ជំនួសនៅតែពិបាក, ៤.វិស័យទេសចរណ៍ គឺចរន្តទេសចរធ្លាក់ចុះយ៉ាងខ្លាំងនៅសៀមរាប និងភ្នំពេញ ដោយការស្វែងរកអន្តរជាតិចំពោះកម្ពុជាក៏បានធ្លាក់ចុះ ២០% ផងដែរ, ៥. ខ្សែសង្វាក់ផ្គត់ផ្គង់កំពុងមានការបត់បែន ដែលធ្វើឲ្យក្រុមហ៊ុនផលិតអាហារកម្ពុជាកំពុងបង្កើនផលិតកម្ម ជាពិសេសសំរាប់សម្រាប់ទីផ្សារម៉ាឡេស៊ី និងវៀតណាម ដើម្បីក្លាយជាដៃគូផ្គត់ផ្គង់។ ប្រទេសកាណាដាក៏បានបង្ហាញចំណាប់អារម្មណ៍ក្នុងការពង្រឹងទំនាក់ទំនងពាណិជ្ជកម្មក្នុងទីផ្សារកម្ពុជា, ៦. វិស័យកសិកម្ម: បញ្ហាជីកសិកម្ម និងការផ្លាស់ប្តូរដោយរហ័សនៃប្រភពផ្គត់ផ្គង់អាចគំរាមកំហែងសន្តិសុខអាហារ និងបានពិភាក្សាលើវិស័យផ្សេងៗជាច្រើនទៀត ផងដែរ។

លោកបណ្ឌិត ជ័យ តិច អ្នកសេដ្ឋវិទូបានមើលឃើញថា ការអូសបន្លាយវិវាទព្រំដែន និងការបន្តបិទទ្វារព្រំដែន បង្កឱ្យរងផលប៉ះពាល់ផ្នែកសេដ្ឋកិច្ចពាណិជ្ជកម្មទ្វេរភាគីយ៉ាងខ្លាំង ប៉ុន្តែភាគីថៃជាអ្នកខាតបង់កាន់តែច្រើន ព្រោះថែនាំចូលទំនិញមកកម្ពុជាច្រើនជាងកម្ពុជានាំចេញទៅថៃ។

លោកបណ្ឌិតបញ្ជាក់ថា ទំនាក់ទំនង​ពាណិជ្ជកម្ម​រវាង​កម្ពុជា-​ថៃ ​គឺ​មាន​លក្ខណៈ​បំពេញ​គ្នា​ទៅវិញទៅមក ដោយ​ថៃ​ជា​អ្នក​ផ្គត់ផ្គង់​ផលិត​ផល​កែច្នៃ ប្រេងឥន្ធនៈ និង​ទំនិញ​ប្រើប្រាស់នៅលើទីផ្សារ ចំណែក​កម្ពុជា​​ផ្គត់ផ្គង់​វត្ថុធាតុដើម និង​ផលិតផល​កសិកម្ម ។

យោងតាមទិន្នន័យរបស់អគ្គនាយកដ្ឋានគយ និងរដ្ឋាករកម្ពុជាបានឱ្យដឹងថា នៅក្នុងរយៈពេល៤ខែ ឆ្នាំ២០២៥កន្លងទៅនេះ ការធ្វើពាណិជ្ជកម្មកម្ពុជា-ថៃ សម្រេចបានទំហំជាង ១,៤៩៤លានដុល្លារកើនឡើងជាង៦% បើធៀបនឹងរយៈពេលដូចគ្នាកាលពីឆ្នាំ២០២៤ ក្នុងនោះកម្ពុជានាំចេញទៅថៃមានទំហំជាង ៣២៧លានដុល្លារ ខណៈថៃនាំចូលមកម្ពុជាវិញមានទំហំជាង ១,១៦៦លានដុល្លារ។ បើគិតរយៈពេលពេញ១ឆ្នាំ២០២៤ កន្លងទៅ ការធ្វើពាណិជ្ជកម្មទ្វេភាគីរបស់ប្រទេសទាំងពីរសម្រេចបានទំហំសរុប ៤,២៨៨លានដុល្លារ ក្នុងនោះកម្ពុជានាំចេញទៅថៃមានទំហំ ៨៤៤លានដុល្លារ ហើយថៃនាំចូលមកម្ពុជាវិញមានទំហំជាង ៣,៤៤៣លានដុល្លារ៕