សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពព័ត៌មានពី China Daily បានរាយការណ៍ថា ប្រធានាធិបតីចិន លោក ស៊ី ជីនពីង បានប្តេជ្ញាចិត្តថា ទីក្រុងប៉េកាំងនឹងខិតខំប្រឹងប្រែងកសាងសហគមន៍ចិន-កម្ពុជា ដែលមានគុណភាព និងស្តង់ដារកម្រិតខ្ពស់ ជាមួយនឹងអនាគតរួមគ្នាក្នុងយុគសម័យថ្មី។
នៅរសៀលថ្ងៃទី៣ ខែធ្នូ ឆ្នាំ២០២៤ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា បានអញ្ជើញចូលរួមក្នុងកិច្ចជំនួបកម្រិតខ្ពស់ជាមួយនឹងប្រធានាធិបតីចិន លោក ស៊ី ជីនពីង នៅផ្ទះភ្ញៀវរដ្ឋ (Diaoyutai) នៃរដ្ឋធានីប៉េកាំង សាធារណរដ្ឋប្រជាមានិតចិន។
គួបញ្ជាក់ដែរថា សម្តេចតេជោ ហ៊ុន សែន បានចាប់ផ្តើមដំណើរទស្សនកិច្ចរយៈពេល ៣ថ្ងៃនៅប្រទេសចិនកាលពីថ្ងៃចន្ទ ហើយក៏ជាដំណើរទស្សនកិច្ចជាលើកដំបូងរបស់សម្តេចទៅប្រទេសចិន ក្នុងតួនាទីជាប្រធានព្រឹទ្ធសភាកម្ពុជា និងប្រធានគណបក្សកម្ពុជា។ ប្រធានាធិបតីចិន លោក ស៊ី ជីនពីង បានគូសបញ្ជាក់អំពីចំណងមិត្តភាពដ៏យូរអង្វែងរវាងចិន និងកម្ពុជា ដោយកត់សម្គាល់ថា ទំនាក់ទំនងរវាងប្រទេសទាំងពីរមានភាពជិតស្និទ្ធជាមួយនឹងផលប្រយោជន៍រួមសម្រាប់ប្រជាជនទាំងពីរប្រទេស។ លោកបានអំពាវនាវឱ្យប្រទេសទាំងពីរបង្កើនការផ្លាស់ប្តូរគ្នាទៅវិញទៅមក ដោយគណបក្សកុម្មុយនិស្តចិន (CPC) មានឆន្ទៈក្នុងការពង្រឹងកិច្ចសហប្រតិបត្តិការជាមួយគណបក្សប្រជាជនកម្ពុជា (CPP) ក្នុងកិច្ចទំនាក់ទំនងជាយុទ្ធសាស្ត្រ និងការបណ្តុះបណ្តាលមន្ត្រី ព្រមទាំងជួយកម្ពុជាស្វែងរកផ្លូវអភិវឌ្ឍន៍ដែលសមស្របនឹងលក្ខខណ្ឌជាតិរបស់ខ្លួនផងដែរ។
ប្រធានាធិបតីចិន លោក ស៊ី ជីនពីង បានលើកឡើងថា ប្រទេសចិនបានត្រៀមខ្លួនរួចជាស្រេចក្នុងការធ្វើការជាមួយកម្ពុជា ដើម្បីពង្រឹងក្របខ័ណ្ឌកិច្ចសហប្រតិបត្តិការត្បូងពេជ្រឆកោណ Diamond Hexagon និងបង្កើតផែនការសហប្រតិបត្តិការលើការអភិវឌ្ឍន៍ច្រករបៀងអភិវឌ្ឍន៍ឧស្សាហកម្ម ច្រករបៀងមច្ឆា និងអង្ករ។ ប្រធានាធិបតីរូបនេះក៏បានសង្កត់ធ្ងន់ផងដែរអំពីតម្រូវការក្នុងការធានាការអនុវត្តប្រកបដោយជោគជ័យនូវគម្រោងកិច្ចសហប្រតិបត្តិការសំខាន់ៗ ដើម្បីជំរុញការតម្រង់ទិសប្រកបដោយគុណភាពខ្ពស់រវាងគំនិតផ្តួចផ្តើមខ្សែក្រវ៉ាត់ និងផ្លូវ និងយុទ្ធសាស្ត្រមន្ទីរបញ្ចកោណរបស់កម្ពុជា។
គួរឲ្យបញ្ជាក់ដែរថា ប្រទេសចិនគឺជាដៃគូពាណិជ្ជកម្មដ៏ធំរបស់កម្ពុជា និងជាប្រភពនៃការវិនិយោគដ៏ធំបំផុតអស់រយៈពេលជាច្រើនឆ្នាំមកហើយ។ កិច្ចព្រមព្រៀងពាណិជ្ជកម្មសេរីទ្វេភាគីត្រូវបានចុះហត្ថលេខារវាងប្រទេសទាំងពីរបានចូលជាធរមាននៅថ្ងៃទី ១ ខែមករា ឆ្នាំ២០២២ ហើយក៏ជាការរៀបចំពាណិជ្ជកម្មសេរីទ្វេភាគីលើកដំបូងរបស់កម្ពុជា។
ក្នុងអំឡុងពេលនៃកិច្ចពិភាក្សារវាងភាគីទាំងពីរ ប្រធានាធិបតីចិន លោក ស៊ី ជីនពីង បានសន្យាបន្តគាំទ្រដល់កម្ពុជាក្នុងការដើរតួនាទីឲ្យកាន់តែធំនៅក្នុងកិច្ចការអន្តរជាតិ និងតំបន់។ ទីក្រុងប៉េកាំងគាំទ្រសមាគមប្រជាជាតិអាស៊ីអាគ្នេយ៍ក្នុងការរក្សាស្វ័យភាពជាយុទ្ធសាស្រ្តរបស់ខ្លួន និងរក្សាបាននូវភាពជាកណ្តាលរបស់ខ្លួន ហើយប្រទេសចិនប្រឆាំងយ៉ាងម៉ឺងម៉ាត់ចំពោះគំនិតនៃសង្រ្គាមត្រជាក់។
ទន្ទឹមនឹងនេះ សម្តេចអគ្គមហាសេនាបតីតេជោ ហ៊ុន សែន បានគូសបញ្ជាក់ថា ចំណងមិត្តភាពជាមួយប្រទេសចិន គឺជាការឯកភាពនយោបាយយ៉ាងម៉ឺងម៉ាត់របស់គណបក្សប្រជាជនកម្ពុជា និងមិនមានការផ្លាស់ប្តូរនោះទេបើទោះបីជាមានការផ្លាស់ប្ដូររបបដឹកនាំរបស់កម្ពុជាក៏ដោយ។ សម្តេចលើកឡើងថា ចិនគឺជាមិត្តដ៏គួរឱ្យទុកចិត្តបំផុតរបស់កម្ពុជា ហើយកម្ពុជាកោតសរសើរចំពោះការគាំទ្រ និងជំនួយរយៈពេលវែងរបស់ប្រទេសចិនសម្រាប់ការអភិវឌ្ឍនយោបាយ សេដ្ឋកិច្ច និងសង្គមរបស់ប្រទេសកម្ពុជា។ សម្តេចក៏បានមានប្រសាសន៍ដែរថា កម្ពុជាមានឆន្ទៈក្នុងការពង្រឹងការផ្លាស់ប្តូរពីបក្សមួយទៅបក្សជាមួយប្រទេសចិនឲ្យកាន់តែស៊ី ដើម្បីរក្សាបាននូវទំនុកចិត្តគ្នាទៅវិញទៅមកខាងផ្នែកនយោបាយ ជំរុញកិច្ចសហប្រតិបត្តិការជាក់ស្តែងលើវិស័យផ្សេងៗ និងលើកកម្ពស់ការផ្លាស់ប្តូរយុវជន និងប្រជាជន។ លើសពីនេះ ចំណងមិត្តភាពរវាងចិន និងកម្ពុជា បានឈានដល់កម្រិតថ្មីមួយទៀតគឺ “ភាពជាដៃគូគ្រប់អាកាសធាតុ និងជាមិត្តភាពដែកថែបដ៏រឹងមាំ”។
គួរជម្រាបដែរថា ចាប់តាំងពីខែមករា រហូតដល់ខែសីហា ក្នុងឆ្នាំ២០២៤ ពាណិជ្ជកម្មទ្វេភាគីកម្ពុជា-ចិន បានកើនឡើង ១៩,៩ ភាគរយ ឬ ១១,៨១ ពាន់លានដុល្លារ បើធៀបនឹងរយៈពេលដូចគ្នាកាលពីឆ្នាំមុន។ នេះបើយោងតាមស្ថិតិអគ្គនាយកដ្ឋានគយ និងរដ្ឋាករកម្ពុជា បានបង្ហាញកាលពីពេលកន្លងទៅនេះ៕
Account
Security
Favourite Content