បរទេស៖ យោងតាមប្រភពព័ត៌មានពី CNN បានរាយការណ័៍ថា ចិនបានបើកការស៊ើបអង្កេតលើក្រុមហ៊ុនផលិតបន្ទះឈីបរបស់អាម៉េរិក Nvidia​ ជុំវិញការចោទប្រកាន់ថា ក្រុមហ៊ុននេះបានរំលោភលើច្បាប់ប្រឆាំងការផ្តាច់មុខ ឬ Anti-monopoly Law ។

Nvidia ត្រូវបានបង្កើតឡើងក្នុងឆ្នាំ១៩៩៣ ហើយដំបូងឡើយត្រូវបានស្គាល់ថា ជាក្រុមហ៊ុនផលិតបន្ទះឈីបកុំព្យូទ័រដែលដំណើរការក្រាហ្វិក ជាពិសេសសម្រាប់ហ្គេមកុំព្យូទ័រ និងជាក្រុមហ៊ុនផ្គត់ផ្គង់ថាមពលដល់បញ្ញាសិប្បនិម្មិតដ៏ធំបំផុតមួយរបស់ពិភពលោកផងដែរ។ ការស៊ើបអង្កេតនេះកើតឡើងចំពេលដែលសហរដ្ឋអាម៉េរិក និងចិនកំពុងមានជម្លោះផ្នែកឧស្សាកម្មឈីប ដែលមានសារៈសំខាន់សម្រាប់សន្តិសុខជាតិ។

កាលពីថ្ងៃចន្ទ ទូរទស្សន៍ជាតិរបស់ចិន CCTV បានរាយការណ៍ថា រដ្ឋាភិបាលចិនជឿជាក់ថា ការទិញរបស់ Nvidia ពីក្រុមហ៊ុនបណ្តាញអ៊ីស្រាអ៊ែល Mellanox គឺជាសកម្មភាពបំពានច្បាប់ប្រឆាំងលើការផ្តាច់មុខរបស់ចិន ប៉ុន្តែសកម្មភាពនៃការរួមបញ្ចូលដែលបំពានច្បាប់មិនត្រូវបានរៀបរាប់លម្អិតនោះទេ។

Anti-monopoly Law គឺជាច្បាប់នៃការប្រកួតប្រជែងដែលមានគោលបំណងផ្តល់ឲ្យអ្នកធ្វើអាជីវកម្មនីមួយៗអាចប្រកួតប្រជែងដោយស្មើភាពគ្នា និងយុត្តិធម៌ក្នុងសេដ្ឋកិច្ចទីផ្សារ និងហាមមិនឲ្យអ្នកណាមួយអាចកំណត់តម្លៃទីផ្សារ និងប្រកួតប្រជែងផ្តាច់មុខតែម្នាក់ឯងនោះទេ។ ការស៊ើបអង្កេតលើ Nvidia អាចប៉ះពាល់ដល់ក្រុមហ៊ុនក្នុងការបន្តផ្តល់ថាមពល AI ជុំវិញពិភពលោក ហើយអាចស្ថិតនៅក្រោមការត្រួតពិនិត្យប្រឆាំងនឹងការទុកចិត្តនៅក្នុងសហរដ្ឋអាម៉េរិកផងដែរ។

នៅក្នុងថ្ងៃចន្ទដដែល ភាគហ៊ុនរបស់ Nvidia បានធ្លាក់ចុះតិចជាង ២ ភាគរយនៅក្នុងការជួញដូរមុនទីផ្សារ។ នៅក្នុងឆ្នាំ ២០២៤ នេះ ភាគហ៊ុនរបស់ Nvidia ទទួលបានការចាប់អារម្មណ៍បំផុតមួយនៅក្នុងទីផ្សារ ដោយបានកើនឡើងជិត ២០០ ភាគរយ ដោយសារការរីកចំម្រើនរបស់ AI បានជំរុញឱ្យមានតម្រូវការសម្រាប់បន្ទះឈីប។ តម្លៃទីផ្សាររបស់ Nvidia មានច្រើនជាង ៣ ទ្រីលានដុល្លារអាម៉េរិក ដែលស្ថិតនៅលំដាប់ទីពីរបន្ទាប់ពី Apple។

នៅក្នុងខែនេះ សង្រ្គាមឈីបរវាងអាម៉េរិក-ចិនកាន់តែក្តៅគគុក បន្ទាប់ពីរដ្ឋបាលលោក Biden បានដាក់ការរឹតបន្តឹងបន្ថែមទៀតលើការលក់បន្ទះឈីបបច្ចេកវិទ្យាខ្ពស់ទៅកាន់ប្រទេសចិន។ ទោះបីជាប្រព័ន្ធដំណើរការក្រាហ្វិកដែល Nvidia ផលិត មានភាពខុសប្លែកពីបន្ទះឈីបអង្គចងចាំក៏ដោយ ប៉ុន្តែវាក៏ជាបច្ចេកវិទ្យាដ៏សំខាន់ដែលជួយផ្តល់ថាមពលដល់ AI ផងដែរ។ ការគ្រប់គ្រងការនាំចេញថ្មីរបស់រដ្ឋបាលអាម៉េរិកគឺជាជុំទីបីនៃការរឹតបន្តឹងការលក់បន្ទះឈីបទៅកាន់ប្រទេសចិន ដោយសហរដ្ឋអាម៉េរិកបារម្ភថា ចិនអាចប្រើប្រាស់ AI ដើម្បីទទួលបានអត្ថប្រយោជន៍ផ្នែកយោធា។ មន្ត្រីជាន់ខ្ពស់អាម៉េរិកបានចោទប្រកាន់ចិនថាបានលួចកម្មវិធី AI ដែលផលិតដោយអាម៉េរិក ប៉ុន្តែទីក្រុងប៉េកាំងបដិសេធចំពោះករណីនេះ។ មន្ត្រីក្រសួងពាណិជ្ជកម្មអាម៉េរិកជឿជាក់ថា ការរឹតបន្តឹងនេះនឹងធ្វើឱ្យការអភិវឌ្ឍន៍បន្ទះឈីប AI របស់ចិនយឺត ហើយអ្នកជំនាញឧស្សាហកម្មជឿថាផែនការរបស់រដ្ឋាភិបាលសហរដ្ឋអាម៉េរិកនឹងមានប្រសិទ្ធភាព។

យ៉ាងណាមិញ ​ក្រសួង​ពាណិជ្ជកម្ម​ចិន​បាន​រិះគន់​ចំពោះការ​រឹតបន្តឹង​របស់​សហរដ្ឋ​អាម៉េរិក ដោយ​ចាត់ទុកថា ពួកគេ​បាន​បង្កការ​គំរាមកំហែង​យ៉ាង​ខ្លាំងចំពោះ​ស្ថិរភាព​នៃ​ខ្សែសង្វាក់​ផ្គត់ផ្គង់​ពិភពលោក។​ កាលពី​សប្តាហ៍​មុន រដ្ឋាភិបាល​ចិន​បាន​សងសឹក​ទៅវិញ​ដោយ​ហាមឃាត់​ការ​លក់វត្ថុធាតុ ឬ សម្ភារៈ​ចាំបាច់​សម្រាប់​ផលិត​បន្ទះ​ឈី​បរួម​មាន ហ្គាលីយ៉ូម និងហ្គេម៉ាញ៉ូម។ កាលពីឆ្នាំមុន ចិនក៏បានទប់ស្កាត់ការលក់វត្ថុធាតុទាំងនោះផងដែរ ប៉ុន្តែនៅតែមានចន្លោះប្រហោងដែលបង្កឲ្យមានការលួចលក់បន្ត។

គួរឲ្យបញ្ជាក់ដែរថា ទាំងចិន និងសហរដ្ឋអាម៉េរិកកំពុងព្យាយាមជំរុញការអភិវឌ្ឍន៍ និងការផលិត microprocessors ផ្ទាល់ខ្លួនក្នុងស្រុករៀងៗខ្លួន។ តាមរយៈច្បាប់ CHIPS រដ្ឋបាល Biden បានចំណាយប្រាក់រាប់ពាន់លានដុល្លារទៅក្នុងក្រុមហ៊ុន Intel និងក្រុមហ៊ុនដទៃទៀត ដើម្បីបង្កើនការផលិតបន្ទះឈីបក្នុងស្រុក និងកាត់បន្ថយការពឹងផ្អែករបស់អាម៉េរិកលើប្រទេសចិន និងប្រទេសផ្សេងទៀតសម្រាប់បច្ចេកវិទ្យា។ កាលពីខែឧសភា ចិនបានប្រកាសពីផែនការបង្កើតមូលនិធិវិនិយោគរបស់រដ្ឋលើឧស្សាហកម្មឈីបដ៏ធំបំផុតមិនធ្លាប់មានរបស់ខ្លួនក្នុងតម្លៃ ៤៧,៥ ពាន់លានដុល្លារ ដែលផ្តល់មូលនិធិដោយកាធនាគាររដ្ឋធំបំផុតចំនួន ៦៕