សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្នុងអំឡុងខែ កក្កដា ឆ្នាំ២០២៤នេះ ក្រសួងរៀបចំដែនដី នគរូបនីយកម្ម និងសំណង់ បានដាក់ដំណើរការសាកល្បងដោយជោគជ័យនូវសេវាសាធារណៈតាមប្រព័ន្ធឌីជីថលក្នុងរាជធានីភ្នំពេញ និង ខេត្តសៀមរាប ។ ក្រោយទទួលបានជោគជ័យនូវការដាក់ឱ្យប្រើប្រាស់សេវាសាធារណៈតាមប្រព័ន្ធនេះ ក្រសួងរៀបចំដែនដី នគរូបនីយកម្ម និងសំណង់ មានផែនការដាក់ដំណើរការនេះឱ្យបានគ្រប់ខេត្តទូទាំងប្រទេសត្រឹមសប្ដាហ៍ទី១ ឆ្នាំ២០២៥ ។
បើតាមឯកឧត្តម គិត ច័ន្ទគ្រឹស្នា អនុរដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ និងជាប្រធានក្រុមការងារបរិវត្តកម្មឌីជីថល បានឱ្យដឹងថា គិតចាប់ពីដាក់ដំណើរការសេវាអនឡាញ នៅរាជធានីភ្នំពេញ និងខេត្តសៀមរាប រហូតមកដល់បច្ចុប្បន្ននេះ អ្នកចុះឈ្មោះប្រើប្រាស់សេវាអនឡាញ រួមមាន ប្រព័ន្ធលក់/អំណោយផ្ដាច់ ហីប៉ូតែក មានចំនួន១៨៦០នាក់ ដោយក្នុងនោះ រាជធានីភ្នំពេញប្រតិបត្តិការចំនួន ១៣ ៥៤៩ប្រតិបត្តិការនៅសៀមរាប មានចំនួន ២០៨ប្រតិបត្តិការ ព្រោះសៀមរាបបានចាប់ផ្ដើមដាក់ដំណើរការនៅខែវិច្ឆិកា ។
ឯកឧត្តមបន្តថា ក្រសួងរៀបចំដែនដី នគរូបនីយកម្ម និងសំណង់ មានផែនការដាក់សេវាអនឡាញ ប្រព័ន្ធលក់ អំណោយផ្ដាច់ ហីប៉ូតែក និងបញ្ចាំឱ្យបានគ្រប់ខេត្តទូទាំងប្រទេស នៅដើមខែមករា ឆ្នាំ ២០២៥ ក្នុងនោះ សម្រាប់សប្ដាហ៍នេះ (សប្ដាហ៍ទី២នៃខែធ្នូ ២០២៤ ) នឹងដាក់ដំណើរការសេវាអនឡាញនៅខេត្តកណ្ដាល បាត់ដំបង ប៉ៃលិន បន្ទាយមានជ័យ ឧត្តរមានជ័យ ហើយនៅសប្ដាហ៍ទី៣ នៃខែធ្នូ ឆ្នាំ ២០២៤ ក្រសួងមានផែនការដាក់ដំណើរការសេវាអនឡាញនេះ នៅខេត្តកំពង់ធំ ព្រះវិហារ ស្ទឹងត្រែង រតនគិរី ក្រចេះ និងមណ្ឌលគិរី ។ ដោយឡែកនៅសប្ដាហ៍ទី៤នៃខែធ្នូ ក្រសួងមានផែនការដាក់ដំណើរការសេវាអនឡាញនៅខេត្តកំពង់ឆ្នាំ ពោធិ៍សាត់ កំពង់ចាម ត្បូងឃ្មុំ ព្រៃវែង ស្វាយរៀង ហើយនៅសប្ដាហ៍ទី១ នៃខែមករា ឆ្នាំ ២០២៥ ខេត្តចំនួន៦ទៀតនឹងដាក់ដំណើរការនូវសេវានេះ រួមមានខេត្តកំពង់ស្ពឺ កោះកុង ព្រះសីហនុ តាកែវ កំពត និងខេត្តកែប ។
លោកជំទាវ សេង សុមេត្តា រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ បានមានប្រសាសន៍ថា ការអនុវត្តសេវាអនឡាញរបស់ក្រសួងរៀបចំដែនដី នគរូបនីយកម្ម និងសំណង់ គឺបានចាប់ផ្ដើមតាំងពីដើមអាណត្តិទី៧ ដោយបានធ្វើបច្ចុប្បន្នសេវាដែលមានស្រាប់ជាបន្តបន្ទាប់ ហើយក៏ធ្វើបច្ចុប្បន្ននូវសេវាផ្សេងទៀតដែលជាសេវាស្រាល មិនទាមទារលិខិតបទដ្ឋានច្រើន មិនទាមទារឱ្យមានការចូលរួមដែលធ្វើឱ្យមានភាពសាំញ៉ាំច្រើន ឱ្យទៅជាសេវាអនឡាញវិញ ។
លោកជំទាវបញ្ជាក់ថា ៖
«យើងចាប់ផ្ដើមធ្វើជាបណ្ដើរៗនៅតាមខេត្ត ទៅតាមពេលវេលា ប៉ុន្តែចុងបញ្ចប់នៃផែនការគឺត្រូវធ្វើឱ្យគ្រប់នូវអ្វីដែលបានគ្រោង និងដាក់ផែនការ ។ ជាមួយគ្នានេះ យើងបានឃើញថាសេវាដែលបានដាក់ឱ្យប្រើប្រាស់កន្លងមក មានបងប្អូនពលរដ្ឋមួយចំនួន មិនទាន់បានអនុវត្តឱ្យបានទូលំទូលាយ ដូច្នេះហើយក្រុមការងារតែងតែរកដំណោះស្រាយជាប្រចាំដើម្បីរកមូលហេតុដែលនាំឱ្យការអនុវត្តមិនទាន់បានទូលំទូលាយ ។ ជាលទ្ធផល ក្រោយពេលតាមដានជាប្រចាំ ក៏បានឃើញថា សេវាអនឡាញដែលបានដាក់ទៅឃើញមានការប្រើប្រាស់ច្រើនជាបណ្ដើរៗ»៕
Account
Security
Favourite Content