បរទេស ៖ យោងតាមប្រភពព័ត៌មានពី Bloomberg បានរាយការណ៍ថា​ ប្រទេសចិនកំពុងពិចារណាលើការបញ្ចេញលុយយ៉ាងហោចណាស់ ១ ទ្រីលានយ័ន (១៣៧ ពាន់លានដុល្លារ) ទៅក្នុងការររៀបចំទីក្រុង និងកម្មវិធីលំនៅដ្ឋានតម្លៃសមរម្យក្នុងគោលបំណងធ្វើឱ្យទីផ្សារអចលនទ្រព្យដែលកំពុងជួបការលំបាករបស់ខ្លួនងើបឡើងវិញ។

ធនាគារកណ្តាលរបស់ចិន​ The People’s Bank of China គ្រោងនឹងបញ្ជូនមូលនិធិទាំងនេះតាមរយៈធនាគារអភិវឌ្ឍន៍ចិន ដោយមានគោលបំណងជួយដល់ពលរដ្ឋ​ក្នុងការស្វែងរកការទិញផ្ទះ។ ការផ្លាស់ប្តូរនេះគាំទ្រដោយឧបនាយករដ្ឋមន្ត្រី He Lifeng បង្ហាញពីកិច្ចខិតខំប្រឹងប្រែងរួមគ្នា​ ដើម្បីទប់ទល់នឹងការធ្លាក់ចុះយ៉ាងខ្លាំងនៅក្នុងវិស័យអចលនទ្រព្យ ដែលបានជះឥទ្ធិពលយ៉ាងខ្លាំងដល់កំណើនសេដ្ឋកិច្ច និងទំនុកចិត្តរបស់អ្នកប្រើប្រាស់។

លើសពីនេះ គំនិតផ្តួចផ្តើមដែលបានស្នើឡើងពាក់ព័ន្ធនឹងការប្រើប្រាស់ហិរញ្ញវត្ថុដូចជា ប្រាក់កម្ចីបន្ថែមកិច្ចសន្យា (PSL) និងប្រាក់កម្ចីពិសេស។ ប្រសិនបើត្រូវបានអនុវត្តកម្មវិធីនេះអាចជាជំហានដ៏សំខាន់មួយនៅក្នុងយុទ្ធសាស្ត្ររបស់រដ្ឋាភិបាលក្នុងការធ្វើឱ្យទីផ្សារអចលនទ្រព្យមានស្ថិរភាពឡើងវិញ ដែលបានធ្លាក់ចុះដ៏ធ្ងន់ធ្ងរបំផុតក្នុងរយៈពេលជាច្រើនទសវត្សរ៍។

បន្ទាប់ពីមានការធ្លាក់ចុះនៃវិស័យអចលនទ្រព្យ ការព្រួយបារម្ភអំពីទីផ្សារបានកើនឡើងទាក់ទងនឹងស្ថានភាពហិរញ្ញវត្ថុរបស់អ្នកអភិវឌ្ឍន៍។ គោលបំណងនៃការបញ្ចេញកញ្ចប់លុយមិនត្រឹមតែធ្វើឱ្យទីផ្សារអចលនទ្រព្យមានភាពរស់រវើកប៉ុណ្ណោះទេ ប៉ុន្តែថែមទាំងជំរុញឱ្យការអភិវឌ្ឍន៍ប្រកបដោយតុល្យភាព និងនិរន្តរភាពបន្ថែមទៀតសម្រាប់រយៈពេលវែង។ កម្មវិធីប្រាក់កម្ចីបន្ថែមកិច្ចសន្យា PSL អនុញ្ញាតឱ្យធនាគារកណ្តាលផ្តល់មូលនិធិដែលមានតម្លៃទាបដល់អ្នកអភិវឌ្ឍន៍ដែលចូលរួមក្នុងគម្រោងជួសជុលអគារ។ ទន្ទឹមនឹងនោះ វាតម្រូវឱ្យអ្នកអភិវឌ្ឍន៍ប្រើប្រាស់មូលនិធិដើម្បីទទួលបានដីពីរដ្ឋាភិបាលមូលដ្ឋាន ហើយបន្ទាប់មកផ្តល់ជូនជាទឺកប្រាក់ដល់ប្រជាពលរដ្ឋដែលរងផលប៉ះពាល់ដោយការរុះរើ។

អ្នកវិភាគជឿថា មូលនិធិនេះអាចបង្កើតបានជាង ១០ ទ្រីលានយ័នក្នុងការវិនិយោគផ្ទាល់សរុប ដែលជំរុញការវិនិយោគឯកជននៅក្នុងវិស័យនេះ។ លោក Bruce Pang ប្រធានសេដ្ឋវិទូនៅ Jones Lang LaSalle Inc. បានសង្កត់ធ្ងន់ថា នេះមិនមែនដើម្បីជំរុញកំណើនទេ ប៉ុន្តែជាការផ្តល់នូវការអភិវឌ្ឍន៍ប្រកបដោយតុល្យភាពសម្រាប់រយៈពេលយូរជាងនេះ។

ទោះជាយ៉ាងណាក្តី គេកត់សំគាល់ថាកម្មវិធី PSL មានប្រវត្តិចម្រូងចម្រាស ដោយត្រូវបានដាក់អនុវត្តដំបូងក្នុងឆ្នាំ ២០១៤ ដើម្បីទប់ទល់នឹងការធ្លាក់ចុះនៃទីផ្សារអចលនទ្រព្យ ប៉ុន្តែវាបានប្រឈមនឹងការរិះគន់ចំពោះការរួមចំណែកដល់វិបត្តិអចលនទ្រព្យនៅតាមបណ្តាទីក្រុងកម្រិតទាប។ នៅពេលដែលគម្រោងបានបញ្ចប់ឆ្នាំ២០១៩ ធនាគារកណ្តាលបានបញ្ឈប់ការផ្តល់មូលនិធិ PSL របស់ខ្លួន។ យ៉ាងណាមិញ កម្មវិធីនេះបានចាប់ផ្តើមឡើងវិញសម្រាប់រយៈពេលខ្លីកាលពីឆ្នាំមុន ដើម្បីជួយដល់ធនាគារអភិវឌ្ឍន៍ចិនក្នុងការផ្តល់ហិរញ្ញប្បទានសម្រាប់អភិវឌ្ឍន៍ហេដ្ឋារចនាសម្ព័ន្ន ដែលផ្តល់អាទិភាពដល់សេវាសាធារណៈជាជាងការរកប្រាក់ចំណេញ។

បើទោះបីជាមានភាពប្រសើរឡើងនៅក្នុងត្រីមាសទីបីក៏ដោយ ប៉ុន្តែសេដ្ឋកិច្ចធំទីពីររបស់ពិភពលោកមួយនេះនៅតែមានភាពរអាក់រអួលក្នុងការងើបឡើងវិញ៕