បរទេស៖ យោតាមប្រភពព័ត៌មានពី AP News បានរាយការណ៍ថា សេដ្ឋកិច្ចចិន បានបង្ហាញពីកំណើនយឺតក្នុងខែកក្កដា ដោយសាររងសម្ពាធពន្ធពីអាម៉េរិក ខណៈដែលទិន្នផលរោងចក្រ និងការលក់រាយមានការធ្លាក់ចុះ ស្របពេលដែលវិបត្តិវិស័យអចលនទ្រព្យនៅមិនទាន់បានធូរស្រាលនៅឡើយ។

យោងតាមទិន្នន័យដែលចេញផ្សាយកាលពីថ្ងៃសុក្រ បានបង្ហាញថា ការនាំចេញរបស់ចិនបានកើនឡើង ៧,២% នៅក្នុងខែកក្កដាបើធៀបនឹងរយៈពេលដូចគ្នាកាលពីឆ្នាំមុន ខណៈពេលដែលការនាំចូលកើនឡើងក្នុងល្បឿនដ៏លឿនបំផុត ដោយសារអាជីវកម្មប្រញាប់ប្រញាល់ទាញយកអត្ថប្រយោជន៍ពីការផ្អាកយកពន្ធគ្នាទៅវិញទៅមករវាងអាម៉េរិក និងចិនក្នុងរយៈពេល ៩០ ថ្ងៃ។ យ៉ាងណាមិញ សម្ពាធពន្ធរបស់អាម៉េរិកបានធ្វើឲ្យអ្នកផលិតនៅចិនកាត់បន្ថយការវិនិយោគ ការជួល និងផលិតកម្ម ខណៈដែលពួកគេកំពុងបង្កើនការនាំចេញទៅកាន់អាស៊ីអាគ្នេយ៍ អាហ្រ្វិក និងតំបន់ផ្សេងទៀត ដើម្បីជួយទូទាត់នឹងការបាត់បង់អាជីវកម្មទៅកាន់អាម៉េរិក។

យ៉ាងណាក៏ដោយ ទោះបីជាផលិតកម្មឧស្សាហកម្មខ្សោយជាងមុន និងមានការរំខានពីទឹកជំនន់ដល់សកម្មភាពអាជីវកម្មក៏ដោយ ប៉ុន្តែការនាំចេញនៅតែជាចំណុចសំខាន់របស់សេដ្ឋកិច្ចចិន។ របាយការណ៍របស់ការិយាល័យស្ថិតិលើកឡើងថា សេដ្ឋកិច្ចចិនបានបង្ហាញពីភាពធន់​ និងភាពរឹងមាំគួរឱ្យកត់សម្គាល់ប្រឆាំងនឹងបរិយាកាសខាងក្រៅដ៏ស្មុគស្មាញ និងផលប៉ះពាល់ពីអាកាសធាតុក្នុងស្រុក។ កំណើននៃទិន្នផលឧស្សាហកម្មបានធ្លាក់ចុះពី ៦,៨% នៅក្នុងខែមិថុនាមកត្រឹម ៥,៧% ក្នុងខែកក្កដា ដែលជាកម្រិតទាបរយៈពេល ៨ ខែ។ នៅក្នុងខែកក្កដា ការលក់រាយមានអត្រា ៣,៧% ប៉ុណ្ណោះ ដែលជាអត្រាយឺតបំផុតក្នុងរយៈពេលប្រាំពីរខែ និងធ្លាក់ចុះពីអត្រា ៤,៨% នៅក្នុងខែមិថុនា។ តម្លៃទំនិញប្រើប្រាស់បានកើនឡើង ០,៤% ក្នុងខែកក្កដាធៀបនឹងខែមុន។​ បន្ថែមពីនេះ អត្រាគ្មានការងារធ្វើបានកើនឡើងដល់ ៥,២%។

Lynne Song អ្នកវិភាគមកពីក្រុមហ៊ុន ING Economics បានលើកឡើងថា ៖ សកម្មភាពសេដ្ឋកិច្ចរបស់ចិនបានធ្លាក់ចុះនៅក្នុងខែកក្កដា ទាំងការលក់រាយ ការវិនិយោគទ្រព្យសកម្មថេរ និងកំណើនឧស្សាហកម្មទាំងអស់ បានឈានដល់កម្រិតទាបបំផុតនៅក្នុងឆ្នាំនេះ។

លោកបន្តថា ៖ ការវិនិយោគលើវិស័យអចលនទ្រព្យបានធ្លាក់ចុះដល់ទៅ ១២% ក្នុងរយៈពេល ៧ ខែដំបូងនៃឆ្នាំនេះ ខណៈតម្លៃ​លំនៅឋាន​ទើប​សាងសង់​ថ្មី​ក្នុង​ទីក្រុង​ធំៗ​បាន​ធ្លាក់​ចុះ ១,១%។ វិ​បត្តិអចលនទ្រព្យ​នៅ​បន្ត​អូសបន្លាយចាប់តាំងពីមានការរាតត្បាតកូវីដ-១៩ និងបណ្តាលឱ្យអ្នកអភិវឌ្ឍន៍រាប់សិបនាក់ជាប់បំណុល ខណៈដែលវាធ្លាប់ជាកត្តាជំរុញកំណើនសេដ្ឋកិច្ចដ៏សំខាន់មួយ។ យ៉ាងណាក្ដី ទោះបីជារដ្ឋាភិបាលចិនបានចាត់វិធានការនានាដើម្បីស្រោចស្រង់វិស័យនេះ និងទាក់ទាញពលរដ្ឋឱ្យចូលទៅក្នុងទីផ្សារវិញក៏ដោយ ប៉ុន្តែការលក់នៅតែខ្សោយ ដោយសារទ្រព្យសម្បត្តិរបស់ពលរដ្ឋភាគច្រើនជាប់ទាក់ទងនឹងអចលនទ្រព្យ។ ដូច្នោះហើយ ការធ្លាក់ចុះនៃការចំណាយរបស់ពលរដ្ឋគឺមានឥទ្ធិពលខ្លាំងដល់ទីផ្សារអចលនទ្រព្យ៕