ភ្នំពេញ​ ៖ យោងតាមរបាយការណ៍របស់ក្រសួងពាណិជ្ជកម្មបានបង្ហាញថា ក្នុងរយៈពេល៣ខែនៃត្រីមាសទី១ ឆ្នាំ២០២៦ កម្ពុជារកចំណូលបានជាង ៣៥៨ លានដុល្លារពីការនាំចេញគ្រាប់ស្វាយចន្ទី ដែលមានការកើនឡើងប្រមាន ២២ ភាគរយ បើប្រៀបធៀបទៅនឹងរយៈពេលដូចគ្នាក្នុងឆ្នាំ២០២៥កន្លងទៅនេះដែលមានត្រឹម ២៩២ លានដុល្លារប៉ុណ្ណោះ។ នៅក្នុងចំណោមប្រទេសទាំង១០ ដែលជាគោលដៅនាំចេញគ្រាប់ស្វាយចន្ទីរបស់កម្ពុជា ប្រទេសវៀតណាមឈរនៅលំដាប់កំពូលទី១ នៃការនាំចេញដែលមានទំហំរហូតដល់ប្រមាណ ៣៥៦,៨៣ លានដុល្លារ ស្មើនឹងជាង៩០ភាគរយនៃទំហំសរុប។

លោក អួន ស៊ីឡុត ប្រធានសមាគមស្វាយចន្ទីកម្ពុជា​​ បានមានប្រសាសន៍ប្រាប់បណ្តាញព័ត៌មាន AMS ថា ​​ការប្រមូលផលគ្រាប់ស្វាយចន្ទី​ឆ្នាំនេះត្រូវបានពន្យារពេល ដោយសារតែរងនូវឥទ្ធិពលអាកាសធាតុ ដែលផ្ទុយពីការព្យាកររបស់សមាគម។​

ប្រធានសមាគមរូបនេះបានបញ្ជាក់ទៀតថា តម្លៃគ្រាប់ស្វាយចន្ទីឆ្នាំនេះទទួលបានថ្លៃ ដោយកាលពីខែមករា មានតម្លៃ ៧ ២០០រៀលក្នុងមួយគីឡូក្រាម, ខែកុម្ភៈ ៦ ៣00 រៀល, ខែមីនា ៦​ ២០0 រៀល និងខែមេសាទទួលបានតម្លៃ ៦០​០០រៀលក្នុងមួយគីឡូក្រាម ដែលតម្លៃនេះជាតម្លៃល្អបំផុតក្នុងរយៈពេល៥ឆ្នាំចុងក្រោយនេះ។ យ៉ាងណាក៏ដោយ ពាក់ព័ន្ធទៅនឹងបញ្ហាអាកាសធាតុ លោក អួន ស៊ីឡុត បានលើកឡើងថា ការប្រែប្រួលអាកាសធាតុមួយរយៈកន្លងមកនេះបានធ្វើឱ្យប៉ះពាល់ដល់ទិន្នផល ពោលគឺប្រមូលផលបានតិចជាងឆ្នាំមុន​ គាប់ជួនប្រទេសអាហ្វ្រិកបិទការនាំចេញដើម្បីទុកកែឆ្នៃក្នុងស្រុកបានក្លាយជាកត្តាធ្វើឱ្យតម្លៃគ្រាប់ស្វាយចន្ទីឆៅនៅកម្ពុជាកើនឡើងខ្ពស់ផងដែរ។

សូមជម្រាបថា បើទោះបីជាបញ្ហាអាកាសធាតុបានជះឥទ្ធិពលដល់ការប្រមូលទិន្នផលគ្រាប់ស្វាយចន្ទីពិតមែន ​ប៉ុន្តែ ប្រធានសមាគមស្វាយចន្ទីកម្ពុជាបានអះអាងថា​ មិនមែនជាបញ្ហាធំពេកនោះទេ ត្បិតការប្រមូលផលនៅតែស្ថិតក្នុងចំណុចវិជ្ជមាន ហើយទទួលបានតម្លៃខ្ពស់ ដែលជាសញ្ញាល្អសម្រាប់គ្រាប់ស្វាយចន្ទីនៅកម្ពុជា ។

លោក ជុត ច័ន្ទណាវុធ ម្ចាស់ចម្ការស្វាយចន្ទីមួយកន្លែងស្ថិតនៅឃុំពពក ស្រុកទឹកផុស ខេត្តកំពង់ឆ្នាំង​​ បានប្រាប់​ AMS ឱ្យដឹងថា​ តម្លៃគ្រាប់ស្វាយចន្ទីឆ្នាំនេះឡើងខ្ពស់ និងជាតម្លៃដែលកសិករចង់បាន​ ប៉ុន្តែជាអកុសល ការប្រមូលផលបែរជាធ្លាក់ចុះ។

លោកបញ្ជាក់ថា​ ទិន្នផលឆ្នាំនេះបើធៀបនឹងឆ្នាមុនៗអាចធ្លាក់ចុះច្រើនដោយសារតែកត្តាអាកាសធាតុ ជាពិសេស នៅពេលវាចេញផ្កា​ ស្រាប់តែមានភ្លៀងធ្លាក់ខ្លាំង​ បណ្តាលឱ្យជ្រុះផ្កាអស់​ ហើយនៅកាន់ផ្លែក៏មិនល្អដែរ​ វាមានស្នាមអុជខ្មៅៗ ដែលធ្វើឱ្យអ្នកទិញទម្លាក់តម្លៃទីផ្សារ។

យោងតាម​សមាគមស្វាយចន្ទី​ គិតមកដល់ពេលបច្ចុប្បន្ននេះ ​កម្ពុជា​មានផ្ទៃដីដាំដុះស្វាយចន្ទីសរុបប្រមាណ ​៧៤ ម៉ឺនហិកតា ខណៈដែលក្នុងឆ្នាំ២០២៥ កម្ពុជាប្រមូលផលស្វាយចន្ទីឆៅបានចំនួន ១ ០២០ ៧៥៧ តោន ក្នុងនោះការនាំចេញទៅវៀតណាមមានបរិមាណ ១ ០០០ ៧៥៧ តោន គិតជាទឹកប្រាក់ ១,៥ពាន់លានដុល្លារ (កើន ២៧%បើធៀបឆ្នាំ២០២៤) ហើយគិតត្រឹមដើមឆ្នាំ២០២៥ដដែល កម្ពុជាមានសហគ្រាសកែច្នៃស្វាយចន្ទីចំនួន ៥២ ក្នុងនោះមាន ៦ ជារោងចក្រធុនមធ្យម (សមត្ថភាពផលិត ៧ ០០០ តោន ទៅ ១៤០ ០០០ តោនក្នុងមួយឆ្នាំ)។ ចំណែក ៤៦ សហគ្រាសផ្សេងទៀតជាសិប្បកម្មលក្ខណៈគ្រួសារតូចៗប៉ុណ្ណោះ ៕