សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ The Defense News ដែលជាទីភ្នាក់ងារផ្សព្វផ្សាយព័ត៌មានដ៏ធំមួយបានចេញផ្សាយថា មន្ទីរប៉ង់តាហ្គោន កាលពីចុងខែកក្កដាកន្លងទៅនេះ បានសម្រេចចិត្តផ្តល់កុងត្រាដែលមានទំហំទឹកប្រាក់ប្រមាណជា ៧,៨ពាន់លានដុល្លារ ទៅឲ្យក្រុមហ៊ុនចំនួន២ រួមមាន ក្រុមហ៊ុន Lockheed Martin និង ក្រុមហ៊ុន RTX Corporation ក្នុងការបង្កើនការផលិតគ្រាប់មីស៊ីលជាច្រើនពាន់គ្រាប់បន្ថែមទៀតដើម្បីយកទៅប្រើប្រាស់សម្រាប់កងកម្លាំងទ័ពអាកាសអាម៉េរិកផង សម្រាប់កងទ័ពជើងទឹកផង ជាពិសេសស ម្រាប់ចែកចាយ និងលក់បន្តទៅឲ្យសម្ព័ន្ធមិត្តរបស់ខ្លួនទាំងអស់នៅលើពិភពលោក។
នៅក្នុងកុងត្រាសម្រាប់ក្រុមហ៊ុន RTX Corporation ដែលមានតម្លៃរហូតទៅដល់ ៣,៥ពាន់លានដុល្លារ គឺជាកុងត្រាសម្រាប់ផលិតមីស៊ីលប្រភេទ AMRAAM ដែលជាម៉ូឌែលបាញ់ចេញពីយន្តហោះចម្បាំងប្រឆាំងនឹងយន្តហោះចម្បាំង ឬ Air to Air ។ វាគឺជាកុងត្រាដ៏ធំបំផុតជាប្រវត្តិសាស្ត្រសម្រាប់កម្មវិធីផលិតរបស់ AMRAAM ដោយក្នុងនោះក៏មានបញ្ចូលទាំងប្រព័ន្ធប្រមូល និងបញ្ជូនទិន្ន័យដោយស្វ័យប្រវត្តិសម្រាប់គាំទ្រផ្នែកវិស្វកម្ម ។
តាមផែនការមីស៊ីល AMRAAM នឹងត្រូវយកទៅផ្គត់ផ្គង់សម្ព័ន្ធមិត្តរបស់ខ្លួនទាំងនៅអឺរ៉ុបអាស៊ី និងមជ្ឈឹមបូព៍ាផងដែរបន្ទាប់ពីផ្គត់ផ្គង់ក្នុងស្រុករួចរាល់។ ក្នុងន័យនេះគេសង្កេតឃើញថា បណ្តាប្រទេសនៅក្នុងតំបន់ណាតូ ដែលកំពុងប្រើប្រាស់ និងបញ្ជាទិញមីស៊ីល AMRAAM មានដូចជា អង់គ្លេស អាល្លឺម៉ង់ ដាណឺម៉ាក ហុងគ្រី ប៊ែលហ្ស៊ិក អេស្ប៉ាញ ហូឡង់ លីទុយអានី ប៉ូឡូញ ស៊ុយអែត និងហ្វាំងឡង់ អ៊ុយក្រែន និងស្វីសផងដែរ។ សម្រាប់នៅតំបន់ឥណ្ឌូប៉ាស៊ីហ្វិកវិញ អាម៉េរិក នឹងផ្គត់ផ្គង់ទៅឲ្យសម្ព័ន្ធមិត្តរបស់ខ្លួន ដូចជា អូស្ត្រាលី ជប៉ុន កោះតៃវ៉ាន់ អ៊ីស្រាអែល និងគុយវ៉ែត។
ដោយឡែកសម្រាប់កុងត្រាមួយចំណែកធំទៀតដែលផ្តល់ឲ្យទៅក្រុមហ៊ុន Lockheed Martin គឺមានតម្លៃប្រមាណជា ៤,៣ពាន់លានដុល្លារ ដើម្បីផលិតមីស៊ីលប្រភេទ Joint Air-To-Surface Standoff Missile (JASSM) និងមីស៊ីល Long-Range Anti-Ship Missile (LRASM)។
មីស៊ីលទាំង២ប្រភេទនេះក៏ដូចជាគ្នានឹង AMRAAM ដែរ ពោលគឺសម្រាប់ផ្គត់ផ្គង់ឲ្យកងទ័ពអាកាស និងជើងទឹកអាម៉េរិក ហើយនឹងបន្តលក់ទៅឲ្យសម្ព័ន្ធមិត្ត ដូចជា ប៉ូឡូញ ហូឡង់ និងហ្វាំងឡង់ ព្រមទាំងជប៉ុនផងដែរ។
សូមជម្រាបដែរថា JASSM ជាមីស៊ីលចំងាយឆ្ងាយដែលអាចវាយប្រហារក្នុងចំងាយរហូតដល់ទៅ ៩២៦គីឡូម៉ែត្រ មានបំពាក់ជាមួយនឹងប្រព័ន្ធប្រឆាំងរ៉ាដាទំនើបៗ ហើយប្រើប្រាស់សម្រាប់ការវាយប្រហារចេញពីយន្តហោះចម្បាំងទៅនឹងទីតាំងដីគោក ខណៈដែលមីស៊ីល LRASM គឺជាមីស៊ីលសម្រាប់ទុកវាយប្រហារនាវាចម្បាំង និងគោលដៅនៅតាមផ្លូវទឹក ជាមួយនឹងល្បឿនលឿនជាងសម្លេង៕
Account
Security
Favourite Content