សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ ទំហំនៃការនាំចេញផលិតផលសម្លៀកបំពាក់របស់ប្រទេសចិនទៅកាន់ទីផ្សារសហរដ្ឋអាម៉េរិកកាលពីខែឧសភាកន្លងទៅនេះ បានបង្ហាញពីការបន្តធ្លាក់ចុះយ៉ាងខ្លាំងមិនធ្លាប់មានក្នុងរយៈពេល២២ឆ្នាំចុងក្រោយ។ តួលេខកាលពីខែឧសភានេះ មានចំនួនតិចតួចខ្លាំងធៀបទៅនឹងទំហំប្រចាំខែដែលរោងចក្រចិនធ្លាប់តែនាំចេញទៅអាម៉េរិកក្នុងរយៈពេលជាង២ទសវត្សរ៍ ហើយកត្តាបង្កធំជាងគេនោះគឺជាការដំឡើងពន្ធគយរបស់រដ្ឋាភិបាលទីក្រុងវ៉ាស៊ិនតោនទៅលើទំនិញរបស់ប្រទេសចិន។
រ៉យទ័រ ដែលបានចេញផ្សាយអត្ថបទនៅសប្តាហ៍នេះក៏បានសរសេរដែរថា ប្រទេសចិន គឺជាអ្នកនាំចូលផលិតផលសម្លៀកបំពាក់ច្រើនជាងគេបំផុតរបស់សហរដ្ឋអាម៉េរិកជាច្រើនឆ្នាំមកហើយ ប៉ុន្តែចំណែកទីផ្សាររបស់ចិនបានចាប់ផ្តើមធ្លាក់ចុះចាប់តាំងតែពីទំនាក់ទំនងពាណិជ្ជកម្មរវាងមហាអំណាចទាំងពីរបានដាំក្បាលចុះនៅក្នុងរយៈពេលចុងក្រោយនេះ។
កាលពីខែមេសាកន្លងទៅនេះ ប្រធានាធិបតីអាម៉េរិក លោក Donald Trump បានសម្រេចអនុវត្តគោលការណ៍ពន្ធថ្មីបន្ថែមដល់ទៅ១៤៥ភាគរយទៅលើគ្រប់ប្រភេទទំនិញរបស់ចិន។ ជាលទ្ធផល បណ្តាក្រុមហ៊ុនអ្នកលក់រាយរបស់អាម៉េរិកបាននាំគ្នាងាកទៅរកប្រទេសដែលជាអ្នកផលិតជំនួសចិនវិញ ដែលក្នុងនោះរួមមានដូចជា វៀតណាម បង់ក្លាដេស និងឥណ្ឌាជាដើម។
សូមជម្រាបថា តួលេខនៅក្នុងខែឧសភា កាន់តែយ៉ាប់យឺនខណៈដែល៤ខែចុងក្រោយនេះតួលេខនាំចេញសម្លៀកបំពាក់របស់ចិនបានធ្លាក់ចុះជាបន្តបន្ទាប់។ អាម៉េរិក នាំចូលសម្លៀកបំពាក់ពីចិនបានត្រឹមតែ៥៥៦លានដុល្លារកាលពីខែឧសភា ធៀបទៅនឹងតួលេខដែលធ្វើបានកាលពីខែមេសា ប្រមាណជា៧៩៦លានដុល្លារ។ នេះបើយោងតាមទិន្នន័យដែលបានបង្ហាញដោយគណកម្មការពាណិជ្ជកម្មអន្តរជាតិរបស់អាម៉េរិក U.S. International Trade Commission (USITC)។
សម្រាប់ពេលនេះ គេនៅមិនទាន់អាចមើលឃើញនោះទេថា ប្រទេសណានឹងអាចទាញយកផលចំណេញពីឱកាសនេះបាននៅឡើយទេ ប៉ុន្តែសម្រាប់ប្រទេសជិតខាងអាម៉េរិក គឺ មិចស៊ីកូ ហាក់ដូចជាកំពុងមានសកម្មភាពនាំចូលសម្លៀកបំពាក់មកអាម៉េរិកកើនឡើងជាងមុន ជាពិសេស ក្នុងខែឧសភាកន្លងមកនេះ។ USITC បានបង្ហាញថា ការនាំចូលផលិតផលសម្លៀកបំពាក់ពីប្រទេសមិចស៊ីកូ ក្នុងខែឧសភាមានចំនួន ២៥៩លានដុល្លារ ពោលគឺស្ថិតនៅក្នុងអត្រាកើនឡើងប្រមាណជា១២ភាគរយធៀបទៅនឹងពេលវេលាដូចគ្នាកាលពីឆ្នាំទៅ៕
Account
Security
Favourite Content