ភ្នំពេញ៖ រដ្ឋាភិបាលជប៉ុន បានផ្តល់ថវិកាសរុបចំនួន ៦៦៥ ១៨៦ ដុល្លារអាម៉េរិកដល់អង្គការសកម្មភាពកំចាត់មីនជប៉ុន (JMAS) ក្រោមគ្រោងការណ៍ជំនួយឥតសំណងសម្រាប់គម្រោងអង្គការក្រៅរដ្ឋាភិបាលជប៉ុន។ ជំនួយនេះសម្រាប់គម្រោងគាំទ្រការស្ថាបនាឡើងវិញជាមួយការបោសសម្អាតគ្រាប់បែកចង្កោមនៅខេត្តស្ទឹងត្រែង ហៅកាត់ថា គម្រោង PRCS ។

កិច្ចសន្យាផ្តល់ជំនួយត្រូវបានចុះហត្ថលេខាកាលពីថ្ងៃទី៤ ​ខែកុម្ភៈ ឆ្នាំ២០២៦ ដោយ ឯកឧត្តម អ៊ូអិណុ អាត់ស៊ូស៊ី ឯកអគ្គរាជទូតវិសាមញ្ញ និងពេញសមត្ថភាពរបស់ប្រទេសជប៉ុនប្រចាំព្រះរាជាណាចក្រកម្ពុជា និងអ្នកតំណាងស្ថាប័នទទួលជំនួយសម្រាប់អនុវត្តគម្រោង ។

នៅក្នុងគម្រោងនេះ អង្គការ JMAS នឹងបោសសម្អាតតំបន់ដែលមានគ្រាប់បែកចង្កោមនៅលើផ្ទៃដីទំហំ ១៧០ហិកតា និងបង្រៀនមជ្ឈមណ្ឌលសកម្មភាពកំចាត់មីនកម្ពុជា (CMAC) អំពីវិធីសាស្ត្រដែលមានស័ក្តិសិទ្ធិភាព និងសុវត្ថិភាព ក្នុងការបោសសម្អាតគ្រាប់បែកចង្កោម។ មិនតែប៉ុណ្ណោះ គម្រោងនេះនឹងផ្តល់ការអប់រំអំពីការបញ្ចៀសពីហានិភ័យនៃគ្រាប់មីនដល់ប្រជាជនមូលដ្ឋាន និងបណ្តុះបណ្តាលកសិករអំពីការគ្រប់គ្រង និងច្ចេកវិទ្យាកសិកម្ម។

ឯកឧត្តម អ៊ូអិណុ អាត់ស៊ូស៊ី  បានថ្លែងថា៖ ជំនួយឥតសំណងសម្រាប់គម្រោងអង្គការក្រៅរដ្ឋាភិបាលជប៉ុន បានចាប់ផ្តើមតាំងពីឆ្នាំ២០០២ ដើម្បីគាំទ្រដល់អង្គការក្រៅរដ្ឋាភិបាលជប៉ុនក្នុងការអនុវត្តគម្រោងអភិវឌ្ឍន៍សេដ្ឋកិច្ច និងសង្គមរបស់ពួកគេនៅក្នុងប្រទេស ឬតំបន់កំពុងអភិវឌ្ឍ។ ក្នុងរយៈពេល២០ឆ្នាំចុងក្រោយនេះ ស្ថានទូតជប៉ុនបានផ្តល់ជំនួយជាង ១៦០គម្រោងនៅក្នុងប្រទេសកម្ពុជាតាមរយៈកម្មវិធីនេះ ហើយគម្រោងទាំងនេះផងដែរបានចូលរួមចំណែកដោយផ្ទាល់ក្នុងការកែលម្អគុណភាពជីវិតរបស់ប្រជាជនកម្ពុជា។

ឯកឧត្តមបានបន្តថា៖ អង្គការ JMAS បានចាប់ផ្តើមសកម្មភាពគាំទ្រការបោសសម្អាតមីន និងយុទ្ធភណ្ឌមិនទាន់ផ្ទុះនៅកម្ពុជាក្នុងឆ្នាំ២០០២ ហើយចាប់តាំងពីពេលនោះមក អង្គការបានបោសសម្អាតមីន និងយុទ្ធភណ្ឌមិនទាន់ផ្ទុះជាច្រើន ដោយសហការជាមួយនឹងមជ្ឈមណ្ឌលសកម្មភាពកំចាត់មីនកម្ពុជា (CMAC)។ ដោយឡែក សម្រាប់គម្រោងដែលបានចុះហត្ថលេខានាថ្ងៃទី០៤ ខែកុម្ភៈ ឆ្នាំ២០២៦នេះ អង្គការ JMAS នឹងបន្តធ្វើការបោសសម្អាតគ្រាប់បែកចង្កោមក្នុងខេត្តស្ទឹងត្រែង ព្រមទាំងផ្តល់ការអប់រំអំពីការជៀសវាងពីគ្រោះថ្នាក់ និងផ្តល់ ជំនួយផ្នែកកសិកម្ម។

ឯកឧត្តមបានសង្កត់ធ្ងន់ថា៖

«គម្រោងនេះ នឹងជួយកាត់បន្ថយអត្រាស្លាប់ និងរបួសរបស់ប្រជាជនដែលបណ្តាលមកពីគ្រាប់មីន និងយុទ្ធភណ្ឌមិនទាន់ផ្ទុះ ធានាបាននូវសុខសុវត្ថិភាពដល់ប្រជាជននៅតំបន់ទាំងនោះ និងលើកកម្ពស់ការអភិវឌ្ឍប្រកបដោយចីរភាពនៅក្នុងសហគមន៍មូលដ្ឋាន។ លើសពីនេះ កិច្ចខិតខំប្រឹងប្រែងនេះក៏នឹងរួមចំណែកដល់ការសម្រេចបាននូវការលុបបំបាត់តំបន់ដែលមានគ្រាប់បែបចង្កោម ដែលជាគោលដៅរបស់រដ្ឋាភិបាលកម្ពុជា»។

ឯកឧត្តមឯកអគ្គរាជទូត បានបន្ថែមថា៖ តាមរយៈកិច្ចអភិវឌ្ឍធនធានមនុស្ស និងការពង្រឹងសមត្ថភាពអនុវត្តទាក់ទងនឹងការបោសម្អាតគ្រាប់មិនទាន់ផ្ទុះ នឹងអាចដំណើរការបានលឿន ប្រកបដោយសុវត្ថិភាពជាងមុន ដែលមិនត្រឹមតែនៅក្នុងខេត្តស្ទឹងត្រែងប៉ុណ្ណោះទេ ប៉ុន្តែថែមទាំងនៅក្នុងតំបន់ផ្សេងទៀតដែលមាននៅសល់គ្រាប់មិនទាន់ផ្ទុះផងដែរ។

លោក URANO Shigeyuki ប្រធានតំណាង អង្គការសកម្មភាពកំចាត់មីនជប៉ុន ប្រចាំនៅកម្ពុជាបានមានប្រសាសន៍ថា «JMAS» បានធ្វើសកម្មភាពប្រតិបត្តិការរបស់ខ្លួន ចាប់តាំងពីឆ្នាំ២០០២មកម្លេះ ក្នុងការបោសសម្អាតមីន និងកាកសំណល់ជាតិផ្ទុះពីសង្គ្រាម ដោយមានកិច្ចសហប្រតិបត្តិការជាដៃគូរយ៉ាងស្អិតល្មួតជាមួយនឹងមជ្ឈមណ្ឌលសកម្មភាពកំចាត់មីនកម្ពុជា «CMAC» និងរួមមានទាំងភាគីពាក់ព័ន្ធផ្សេងៗទៀត ។

លោកបានជម្រាបផងដែរថា៖ ប្រតិបត្តិការរបស់គម្រោង PRCS នេះ គឺជាគម្រោងដែលមានទីតាំងនៅក្នុងខេត្តស្ទឹងត្រែង ដែលជាខេត្តមួយដែលមានផ្ទៃដីភាគច្រើនកំពុងរងផលប៉ះពាល់ដោយសារគ្រាប់បែកចង្កោម ។ ដើម្បីជម្រុញឱ្យ ប្រតិបត្តិការបោសសម្អាតគ្រាប់អនុវត្តទៅបានលឿន និងមានសុវត្ថិភាព យើងបាននឹងកំពុងធ្វើការប្រើប្រាស់គ្រឿងចក្រកំទេច និងបំផ្ទុះគ្រាប់បែកចង្កោម ដែលត្រូវបានរកឃើញ ។ លើសពីនេះទៀត គម្រោងនេះនឹងប្រើប្រាស់ម៉ាស៊ីនរាវរកគ្រាប់បែក ដែលមានប្រសិទ្ធិភាពខ្ពស់ អាចរាវរកគ្រាប់បែកចង្កោមដែលបានទម្លាក់រាយប៉ាយដោយយន្តហោះ បានយ៉ាងឆាប់រហ័ស ។

ចំពោះផ្នែកកសិកម្មវិញ ដើម្បីបង្កើនទិន្នផលដំណាំ ក្នុងតំបន់ដែលរងគ្រោះដោយសារគ្រាប់មីន និងគ្រាប់យុទ្ធភ័ណ្ឌមិនទាន់ផ្ទុះ យើងមានសកម្មភាពផ្តល់ចំណេះដឹងបច្ចេកទេសកសិកម្មផ្សេងៗ ដូចជា៖ របៀបប្រើប្រាស់ជី របៀបលើករងដំណាំ និងការជ្រើសរើសដំណាំដាំដុះឱ្យសមស្របទៅនិងតំបន់ តាមរយៈកម្មវិធីបណ្តុះបណ្តាលនិងការចុះ បង្រៀនដោយផ្ទាល់ជូនដល់ប្រជាកសិករតាមមូលដ្ឋាន ។ ដូចនេះ ប្រជាជនអាចរស់នៅប្រកបដោយសុខសុវត្ថិភាពនិង ជួយកាត់បន្ថយភាពក្រីក្រ ព្រមទាំងអាចជួយស្តារសេដ្ឋកិច្ច និងកសិកម្មមូលដ្ឋានឡើងវិញ តាមរយៈការគាំទ្រពីទីប្រឹក្សា បច្ចេកទេសកសិកម្មជប៉ុន ។

លើសពីនេះ ចាប់ពីនិទាឃរដូវនេះតទៅជេម៉ាស់នឹងអនុវត្តគម្រោងឯករាជ្យផ្ទាល់ខ្លួននៅក្នុងប្រទេសកម្ពុជា ដោយមានជំនួយពីក្រុមហ៊ុនដៃគូរ ដើម្បីបោសសម្អាតមីននៅក្នុងខេត្តបាត់ដំបង ជាតំបន់ដែលរងការប៉ះពាល់គ្របដ ណ្តប់ដោយសារដីមានគ្រាប់មីន និងយុទ្ធភណ្ឌមិនទាន់ផ្ទុះ ។ ទោះប្បីជាគម្រោងប្រតិបត្តិការមានទ្រង់ទ្រាយតូចក្តី យើងនឹងធ្វើការបោសសម្អាតមីនដោយប្រើប្រាស់គ្រឿងចក្រវាយកំទេចមីនរួមបញ្ចូលគ្នាជាមួយនិងកំលាំងមនុស្ស ៕