ភ្នំពេញ ៖ ដោយមើលឃើញពីសក្តានុពលនៃការប្រើប្រាស់បច្ចេកវិទ្យាក្នុងវិស័យកសិកម្មដោយការដាំដំណាំលើទឹក បច្ចុប្បន្ននេះមានបណ្ដាប្រទេសជាច្រើន បាន និងកំពុងជំរុញឱ្យកសិកររបស់ខ្លួនសិក្សាស្វែងយល់ពីការប្រើប្រាស់ ដើម្បីសម្រួលដល់ការធ្វើកសិកម្ម និងបង្កើនផលិតផលផងដែរ។

យោងតាមគេហទំព័រ Daviteq បានបង្ហាញថា នៅពេលដែលកសិករប្រើប្រាស់បច្ចេកវិទ្យា ដើម្បីអនុវត្តប្រព័ន្ធកសិកម្មដាំដំណាំលើទឹក ទាំងរុក្ខជាតិ, ដំណាំ ឬផ្លែឈើ អាចលូតលាស់បានយ៉ាងឆាប់រហ័ស គុណភាពផលិតផលល្អ និងទិន្នផលប្រមាណ ៣០ ទៅ ៤០ % ខ្ពស់ជាងការដាំដុះធម្មតា។ ក្នុងន័យនេះ កម្ពុជាក៏មានប្រជាពលរដ្ឋមួយចំនួនបានចាប់ផ្តើមអនុវត្តន៍ប្រើប្រាស់បច្ចេកវិទ្យានៅក្នុងកសិកម្មដាំលើទឹកផងដែរ ដែលគេអាចស្វែងយល់ពីដំណើរវិវត្តរបស់កសិកម្មដាំលើទឹកថា វាមានបម្រែបម្រួលយ៉ាងណាក្នុងរយៈកាលកន្លងមកនេះ ជាមួយនឹងការស្វែងយល់បន្ថែមពីដំណើរវិវត្តន៍របស់កសិកម្មដាំលើទឹកពីមជ្ឈមណ្ឌលកម្ពុជា ៤.០ ដូចខាងក្រោមនេះ ៖

ការដាំលើទឹក (Hydroponic) បានកកើតជាយូរណាស់មកហើយ ប៉ុន្តែពុំទាន់មានការដាក់ឈ្មោះ និងការឱ្យនិយមន័យជាក់លាក់នោះទេ។ ជាឧទាហរណ៍ The Hanging Gardens of Babylon គឺជាសួនច្បារអច្ឆរិយៈមួយក្នុងចំណោមសួនអច្ឆរិយៈទាំងប្រាំពីរនៃពិភពលោក ដែលសួនច្បារនេះត្រូវបានសាងសង់នៅសតវត្សរ៍ទី ៦ ហើយប្រភពប្រព័ន្ធធារាសាស្ត្រត្រូវពឹងផ្អែកទាំងស្រុងលើទន្លេ Euphrates។

ទន្ទឹមនេះ ទីតាំងដែលសាងសង់សួនច្បារនេះមានសភាពជាវាលខ្សាច់ស្ងួតហែង និងពុំមានដីនោះទេ ដូចនេះ ការណ៍ដែលអាចសាងសង់សួនច្បារលើទឹកនេះបានជោគជ័យគឺប្រើប្រព័ន្ធធារាសាស្ត្រទាំងស្រុងដែលអាចនិយាយបានថាជាជោគជ័យដំបូងក្នុងការដាំលើទឹក។ នៅក្នុងសតវត្សរ៍ទី១០ ក៏មានការកត់ត្រាពីជនជាតិ Aztecs បានបង្កើតសួនច្បារបណ្តែតទឹកនៅក្បែរបឹង និងការប្រើប្រាស់ប្រព័ន្ធដាំលើទឹកសម្រាប់វាលស្រែ ដែលពុំមានដីដោយជនជាតិចិននៅក្នុងសតវត្សរ៍ទី ១៣ ផងដែរ។

ការសិក្សា និងការឱ្យនិយមន័យកសិកម្មដាំលើទឹកកាន់តែមានភាពច្បាស់លាស់នៅចន្លោះឆ្នាំ១៩២០ ដល់ ១៩៣០ ដោយលោក William F. Gericke ដែលបានពង្រីកការពិសោធន៍ ដើម្បីសិក្សាបន្ថែមលើអាហារូបត្ថម្ភ និងដំណាំពាណិជ្ជកម្ម។ គ្រានោះលោកបានបង្កើតពាក្យ “hydroponics” ជាពាក្យដែលយកចេញមកពីពាក្យ Greek “hydro” មានន័យថាទឹក និង “ponos” មានន័យថា ពលកម្ម ឬ “ដំណើរការរបស់ទឹក”។

លោក William F. Gericke បានធ្វើឱ្យទ្រឹស្ដីរុក្ខជាតិអាចដាំដុះបានដោយប្រើប្រាស់សារធាតុចិញ្ចឹម និងប្រើប្រាស់ទឹកមកជំនួសដីកាន់តែល្បីខ្លាំងឡើង ហើយលោកបានបង្ហាញអ្នកដែលមិនយល់ស្របនឹងគំនិតរបស់ខ្លួនតាមរយៈការដាំដើមប៉េងប៉ោះកម្ពស់ ២៥ ហ្វីត ដោយប្រើតែទឹក និងសារធាតុចិញ្ចឹមតែប៉ុណ្ណោះ។ លទ្ធផលដ៏គួរឱ្យភ្ញាក់ផ្អើលមួយនេះ បានជំរុញឱ្យមានការស្រាវជ្រាវបន្ថែមទៀតនៅក្នុងវិស័យនេះ។

ក្រោយមកទៀត នៅចន្លោះឆ្នាំ១៩៤០ ដល់ ឆ្នាំ១៩៥០ យោធាសហរដ្ឋអាមេរិកបានធ្វើឱ្យមានការជឿនលឿនលើកសិកម្មដាំលើទឹកបន្ថែមទៀត ហើយការបង្កើតនូវគំនិតថ្មីៗទាំងនេះកើតចេញមកពីតម្រូវការមិនអាចខ្វះបាន។ ជាឧទាហរណ៍ Wake Island ជាកោះដែលមានប្រភេទដីមិនមានសមត្ថភាពក្នុងការផលិតដំណាំ និងដីពោរពេញដោយថ្ម ដែលបានរារាំងដល់ការធ្វើកសិកម្មបែបប្រពៃណី។ ជម្រើសដ៏ល្អ កងទ័ពអាកាសអាមេរិកបានប្រើប្រាស់ប្រព័ន្ធកសិកម្មដាំលើទឹក ដោយប្រើប្រាស់ទំហំទីតាំង ១២០ ហ្វីត ដែលអាចទទួលបានទិន្នផលស្រស់ ៩០ផោន/សប្តាហ៍។ យ៉ាងណាមិញ ទ្រឹស្ដីកសិកម្មដាំលើទឹកទាំងអស់នេះ ជាមូលដ្ឋានសម្រាប់ការលូតលាស់របស់ កសិកម្មដាំលើទឹកពេលបច្ចុប្បន្ននេះ។ បច្ចុប្បន្ន កសិកម្មដាំលើទឹកបានវិវត្តខ្លួនមួយកម្រិតទៀត ដោយបានប្រើប្រាស់បច្ចេកវិទ្យាទំនើប ដែលបានធ្វើឱ្យរុក្ខជាតិលូតលាស់លឿនរឹងមាំ និងមានសុខភាពល្អជាងមុន។

កសិកម្មដាំលើទឹកបែបទំនើប

កសិកម្មដាំលើទឹក គិតមកដល់បច្ចុប្បន្ននេះគឺរក្សាបាននូវទម្រង់ដដែល ប៉ុន្តែអ្វីដែលប្រែប្រួលនោះគឺការបន្ថែមនូវការប្រើប្រាស់បច្ចេកវិទ្យាមកសម្រួលដល់ការធ្វើកសិកម្មលើទឹកនេះ។ ការប្រើប្រាស់បច្ចេកវិទ្យាសម្រាប់កសិកម្មដាំបន្លែលើទឹកអាចឱ្យយើងធ្វើការតាមដានត្រួតពិនិត្យ និងធ្វើស្វ័យប្រវត្តិកម្មនៅក្នុងប្រព័ន្ធកសិកម្មដាំលើទឹកបានជាច្រើនផ្នែក។ ការប្រើប្រាស់ឧបករណ៍បញ្ជា បរិយាកាស និងការភ្ជាប់ឧបករណ៍ចាប់សញ្ញានៅក្នុងប្រព័ន្ធកសិកម្មដាំលើទឹកអាចអនុញ្ញាតឱ្យអ្នកដាំដុះត្រួតពិនិត្យ និងគ្រប់គ្រងទិន្នន័យសំខាន់ៗ ដូចជា កម្ដៅ សំណើម សីតុណ្ហភាពទឹក កម្រិតសារធាតុចិញ្ចឹម ឧស្ម័ន CO2 និង កម្រិតពន្លឺជាដើម។ បន្ថែមពីនេះទៀត ការរួមបញ្ចូលគ្នានូវឧបករណ៍ចាប់សញ្ញា ជាមួយនឹងស្វ័យប្រវត្តិកម្មលើផ្នែកសំខាន់ៗ ដូចជាប្រព័ន្ធធារាសាស្ត្រ រ៉ហូរខ្យល់ និងភ្លើងបំភ្លឺ កសិកម្មដាំលើទឹកអាចបង្កើនប្រសិទ្ធភាពក្នុងការថែទាំដំណាំ និងបង្កើនទិន្នផលបានច្រើនជាងវិធីសាស្ត្របែបបុរាណ។ ការត្រួតពិនិត្យគ្រប់គ្រងលើទិន្នន័យដែលទទួលបានពីបច្ចេកវិទ្យាទាំងអស់នេះ អាចឱ្យយើងបំពេញចន្លោះខ្វះខាត ឬកំហុសឆ្គង ព្រមទាំងជួយសម្រួលដល់ការថែរក្សាប្រព័ន្ធអេកូឡូស៊ី ដែលបានផ្តល់ផលល្អដល់ការលូតលាស់របស់ រុក្ខជាតិ ដំណាំ ឬផ្លែឈើជាដើម ហើយការប្រើប្រាស់ទឹកក៏តិចជាងការដាំដុះ បែបបុរាណប្រមាណជា៩០% ផងដែរ។ បើប្រៀបធៀបទៅនឹងកសិកម្ម ដាំលើទឹកបែបទំនើប កសិកម្មដាំលើទឹកបុរាណទាមទារកម្លាំងពលកម្មច្រើន ដើម្បីធ្វើការថែទាំឱ្យបានដិតដល់។ ចំពោះកសិកម្មដាំលើទឹកបែបទំនើប យើងអាចប្រើប្រាស់បច្ចេកវិទ្យា ដើម្បីធ្វើការគ្រប់គ្រងសកម្មភាពផ្សេងៗបាន ដោយគ្រាន់តែបញ្ជាសកម្មភាពទាំងនោះតាមរយៈកម្មវិធីក្នុងទូរស័ព្ទដៃ ឬ ផ្ទាំងបញ្ជាជាដើម៕