សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពព័ត៌មានពី BBC បានរាយការណ៍ថា សហរដ្ឋអាម៉េរិកនឹងបន្ទាបពន្ធពី ២៥% មកនៅត្រឹម ១៥% លើការនាំចូលទំនិញពីកូរ៉េខាងត្បូងបន្ទាប់ពីឈានដល់កិច្ចព្រមព្រៀងពាណិជ្ជកម្មជាមួយនឹងកូរ៉េខាងត្បូង។
ការដំឡើងពន្ធឆ្លើយតបឲ្យមានភាពស្មើគ្នារបស់ប្រធានាធិបតីអាម៉េរិក Donald Trump ជិតថ្ងៃផុតកំណត់ថ្ងៃទី ១ ខែសីហា ហើយប្រទេសនានាចាំបាច់ត្រូវប្រញាប់ចរចាជាមួយនឹងអាម៉េរិកដើម្បីឈានដល់កិច្ចព្រមព្រៀងជាមួយមហាអំណាចមួយនេះ ឬពួកគេត្រូវបានវាយប្រហារដោយពន្ធគយខ្ពស់។ ប្រសិនបើកូរ៉េខាងត្បូងមិនបានធ្វើកិច្ចព្រមព្រៀងនោះទេ ការនាំចេញរបស់ពួកគេទៅអាម៉េរិកនឹងត្រូវប្រឈមនឹងការយកពន្ធ ២៥%។ មិនត្រឹមតែប៉ុណ្ណោះ ទីក្រុងសេអ៊ូលកាន់តែមានសម្ពាធ បន្ទាប់ពីប្រទេសជប៉ុនឈានដល់កិច្ចព្រមព្រៀងពាណិជ្ជកម្មជាមួយនឹងអាម៉េរិក និងត្រូវបានបន្ទាបពន្ធមកត្រឹម ១៥%។
យ៉ាងណាមិញ Donald Trump បានប្រកាសពីការបន្ទាប់ពន្ធលើការនាំចូលពីកូរ៉េខាងត្បូងពី ២៥% មកត្រឹម ១៥% កាលពីថ្ងៃពុធកន្លងទៅនេះ។ នៅក្នុងផ្នែកមួយនៃកិច្ចព្រមព្រៀងពាណិជ្ជកម្មនេះ ទីក្រុងសេអ៊ូលនឹងវិនិយោគទំហំ ៣៥០ ពាន់លានដុល្លារនៅក្នុងទឺកដីអាម៉េរិក ត្រូវបានចាត់ទុកថាជាជោគជ័យមួយសម្រាប់កូរ៉េខាងត្បូងដែលមានអតិរេកពាណិជ្ជកម្មយ៉ាងហោចណាស់ ៥៦ ពាន់លានដុល្លារជាមួយអាម៉េរិកកាលពីឆ្នាំមុន។ លើសពីនេះ អត្រាពន្ធ ១៥% នឹងគ្របដណ្តប់ទាំងរថយន្ត និងគ្រឿងអេឡិចត្រូនិក ដែលជាការនាំចេញសំខាន់ពីររបស់ទីក្រុងសេអ៊ូលទៅកាន់អាម៉េរិក ប៉ុន្តែដែកថែប និងអាលុយមីញ៉ូម នឹងត្រូវយកពន្ធ ៥០% ស្របតាមអត្រាពិភពលោកជាទូទៅដែល Trump បានកំណត់។
ទោះជាយ៉ាងណាក្តី មេដឹកនាំថ្មីរបស់កូរ៉េខាងត្បូងលោក Lee Jae Myung បង្ហាញពីភាពរីករាយចំពោះកិច្ចព្រមព្រៀងនេះ ដោយសារវានឹងធ្វើឱ្យប្រទេសរបស់លោកមានជំហរស្មើគ្នាជាមួយនឹងប្រទេសដទៃទៀត។ ក្នុងចំណោមទឹកប្រាក់ចំនួន ៣៥០ ពាន់លានដុល្លារនោះ កូរ៉េខាងត្បូងបានសន្យាថានឹងវិនិយោគនៅសហរដ្ឋអាមេរិក ១៥០ ពាន់លានដុល្លារជួយអាម៉េរិកក្នុងការកសាងនាវារួមទាំង នាវាចម្បាំងផងដែរ។ នេះជាចំណុចកណ្តាលនៃយុទ្ធសាស្ត្ររបស់កូរ៉េខាងត្បូង ខណៈដែលវាមានឧស្សាហកម្មផលិតកប៉ាល់ដែលកំពុងរីកចម្រើន និងបានសាងសង់នាវាច្រើនជាងប្រទេសផ្សេងទៀតក្នុងពិភពលោកបន្ទាប់ពីចិន។ តាមរយៈការជួយក្នុងវិស័យនេះ អាមេរិកអាចដោះស្រាយកង្វល់សន្តិសុខរបស់ខ្លួនបានមួយផ្នែក ខណៈពេលដែលកូរ៉េខាងត្បូងក៏បានជំរុញឧស្សាហកម្មរបស់ខ្លួនផងដែរ។ មិនត្រឹមតែប៉ុណ្ណោះ វានៅមានការវិនិយោគជាច្រើនទៀតដូចជាការជួយអាមេរិកផលិតរថយន្ត គ្រឿងអេឡិចត្រូនិក និងអាគុយសម្រាប់ថយន្តអគ្គិសនីជាដើម។
គួរឲ្យបញ្ជាក់ដែរថា កិច្ចព្រមព្រៀងនេះក៏មិនប៉ះពាល់ដល់សម្ព័ន្ធភាពយោធារបស់កូរ៉េខាងត្បូងជាមួយនឹងអាម៉េរិកនោះទេ ដោយសារនាពេលកន្លងមក Trump ធ្លាប់គំរាមដកទ័ពអាម៉េរិកចេញពីកូរ៉េខាងត្បូង លុះត្រាតែប្រទេសនេះចំណាយប្រាក់បន្ថែមសម្រាប់ការរៀបចំនេះ បន្ទាប់ពីទីក្រុងវ៉ាស៊ីនតោនចំណាយប្រាក់រាប់ពាន់លានដុល្លារក្នុងការជួយការពារកូរ៉េខាងត្បូងពីកូរ៉េខាងជើង។ វាគឺជាការគំរាមកំហែងមួយសម្រាប់ទីក្រុងសេអ៊ូល ហើយអ្នកចរចាតែងតែគិតអំពីដំណោះស្រាយសម្រាប់បញ្ហានេះរួមជាមួយនឹងពន្ធគយ៕
Account
Security
Favourite Content