ភ្នំពេញ៖ ការតាំងពិព័រណ៍ឧស្សាហកម្មសម្លៀកបំពាក់ និងវាយនភ័ណ្ឌកម្ពុជាអន្តរជាតិ (CTG) និងពិព័រណ៍ឧស្សាហកម្មគ្រឿងយន្តកម្ពុជាអន្តរជាតិ (CIMIF) នឹងវិលត្រឡប់មកសាជាថ្មីម្តងទៀត ដែលការតាំងពិព័រណ៍នេះនឹងប្រព្រឹត្តទៅចាប់ពីថ្ងៃទី០៦ ដល់ថ្ងៃទី០៩ ខែសីហា ឆ្នាំ២០២៥ នៅមជ្ឈមណ្ឌលសន្និបាត និងពិព័រណ៍កោះពេជ្រ រាជធានីភ្នំពេញ។

ការតាំងពិព័រណ៍នេះរៀបចំដោយក្រុមហ៊ុន Yorkers Trade & Marketing Service Co., Ltd. សហរៀបចំដោយសភាពាណិជ្ជកម្មកម្ពុជា (CCC) និងសមាគមវាយនភ័ណ្ឌសម្លៀកបំពាក់ ស្បែកជើង និងផលិតផលធ្វើដំណើរក្នុងកម្ពុជា (TAFTAC) និងទទួលបានការគាំទ្រជាផ្លូវការពីក្រសួងពាណិជ្ជកម្ម ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងក្រុមប្រឹក្សាអភិវឌ្ឍន៍កម្ពុជា (CDC)។

សូមជ្រាបថា ការឈរលើសេដ្ឋកិច្ចដែលកំពុងរីកចម្រើននាពេលបច្ចុប្បន្ននេះ វិស័យផលិតកម្មរបស់កម្ពុជាត្រូវបានគេគ្រោងថា នឹងមានការលូតលាស់ចំនួន ៨.៦% នៅឆ្នាំ២០២៥ ខណៈដែលផលិតផលឧស្សាហកម្មនឹងកើនឡើងចំនួន ៩.៣% នៅឆ្នាំ ២០២៦។ ក្នុងពេលដែលវិស័យកាត់ដេរសម្លៀកបំពាក់ និងស្បែកជើងនៅតែជាកំណើនស្នូលនៃសេដ្ឋកិច្ច ថែមទាំងមានវិស័យថ្មីៗដូចជា ឧបករណ៍អេឡិចត្រូនិក ការកែច្នៃអាហារ និងគ្រឿងសង្ហារឹមបែបម៉ូឌុល ក៏កំពុងទទួលបានកំណើនចំណាប់អារម្មណ៍ផងដែរ។

ជាមួយគ្នានេះដែរ យុទ្ធនាការរបស់រដ្ឋាភិបាលកម្ពុជា ដែលកំពុងអនុវត្ត រួមមានការធ្វើឱ្យប្រសើរឡើងនៃហេដ្ឋារចនាសម្ព័ន្ធ ការគាំទ្រដល់អាជីវកម្មតូចមធ្យម (SME) និងការផ្លាស់ប្តូរទៅជាប្រព័ន្ធឌីជីថល (5G, cloud និងការផលិតឆ្លាតវៃ) ដែលកំពុងជួយលើកកម្ពស់សេដ្ឋកិច្ចរបស់កម្ពុជាឱ្យក្លាយជាគន្លងឧស្សាហកម្មក្នុងតំបន់ដែលកំពុងឈានទៅមុខគេ។ ដោយឡែក គោលនយោបាយយុទ្ធសាស្ត្រដូចជា យុទ្ធសាស្ត្រអភិវឌ្ឍន៍ស្បែក​ជើង និងកាបូបឆ្នាំ ២០២២–២០២៧ ក៏ជាសញ្ញាសំខាន់មួយ បង្ហាញពីការរីកចម្រើនឡើងតាមខ្សែសង្វាក់ផលិតផលកម្មក្នុងស្រុកផងដែរ។

សូមជម្រាបថា បន្ទាប់ពីខកខានអស់រយៈពេលជិត៦ឆ្នាំ ការតាំងពិព័រណ៍ CTG & CIMIF 2025 គឺជាវេទិកាដ៏សំខាន់មួយសម្រាប់អ្នកជំនាញ អ្នកធ្វើការច្នៃប្រឌិត និងវិនិយោគិន ដើម្បីស្វែងយល់អំពីទិដ្ឋភាពឧស្សាហកម្មផលិតកម្ម ដែលកំពុងរីកចម្រើនយ៉ាងឆាប់រហ័សនៅប្រទេសកម្ពុជា។ ព្រឹត្តិការណ៍ពិព័រណ៍​ នឹងមានចំនួនស្តង់ដែលដាក់បង្ហាញជាង២០០ស្តង់ មកពីប្រទេស និងតំបន់ចំនួន១៥ផេ្សងៗគ្នា រួមមាន អាល់ហ្សេរី បង់ក្លាដេស កម្ពុជា ចិន ឥណ្ឌា ជប៉ុន ប៉ូឡូញ សិង្ហបុរី អាហ្វ្រិកខាងត្បូង អេស្ប៉ាញ ស្វីស តៃវ៉ាន់ តួកគី សហរដ្ឋអាមេរិក និងវៀតណាម នឹងដាក់បង្ហាញបច្ចេកវិទ្យាចុងក្រោយបំផុត លើផ្ទៃដីនៃការតាំងពិព័រណ៍ជាង ៦,០០០ម៉ែត្រការ៉េ។

ការតាំងពិព័រណ៍ដ៏មានឥទ្ធិពល CTG & CIMIF 2025 ដើរតួយ៉ាងសំខាន់ក្នុងវិស័យឧស្សាហកម្មអន្តរជាតិ។ នៅពេលដែលវិស័យផលិតកម្មរបស់កម្ពុជាកំពុងចូលទៅក្នុងយុគសម័យថ្មីនៃការរីកចម្រើនទំនើប និងភាពចម្រុះ CTG 2025 និង CIMIF 2025 ត្រៀមបង្ហាញបច្ចេកវិទ្យាឈានមុខគេក្នុងវិស័យ សម្លៀកបំពាក់ វាយនភ័ណ្ឌ ប្លាស្ទិក ការបោះពុម្ព ឧស្សាហកម្មយានយន្ត និងផ្នែកកសិកម្ម។​

ក្នុងព្រឹត្តិការណ៍ពិព័រណ៍នេះនឹងមានកម្មវិធីសំខាន់ៗលើកិច្ចពិភាក្សាលើប្រធានបទរួមមាន ការអភិវឌ្ឍឧស្សាហកម្មប្រកបដោយនិរន្តរភាព រៀប​ចំដោយក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនាវានុវត្តន៍។ កិច្ចពិភា​ក្សាស្តីពីឱកាសធុរកិច្ច និងវិនិយោគនៅកម្ពុជា ដោយក្រសួងពាណិជ្ជកម្ម។ កិច្ចពិភាក្សាស្តីពីការព្រងឹងប្រព័ន្ធឧស្សាហកម្មផលិតកម្មក្នុង ប្រទេសកម្ពុជា តួនាទីនៃការប្រើប្រាស់ម៉ាស៊ីនស័្វយប្រវត្តិ និងបច្ចេកវិទ្យាជំនាន់ថ្មីក្នុងខ្សែសង្វាក់ផលិត​កម្មដោយសភាពាណិជ្ជកម្មកម្ពុជា។

តាមរយៈការលើកកម្ពស់កិច្ចសហការអន្តរជាតិ ការបង្ហាញនូវនវានុវត្តន៍ និងការជំរុញការផ្លាស់ប្តូរទៅឌីជីថល ពិព័រណ៍ទាំងនេះនឹងមានតួនាទីសំខាន់ក្នុងការប្រែប្រួលនាពេលអនាគតសម្រាប់វិស័យឧស្សាហកម្មរបស់កម្ពុជា។ CTG & CIMIF 2025 មិនត្រឹមតែនៅជាការបង្ហាញផលិតផលពាណិជ្ជកម្មប៉ុណ្ណោះទេ ប៉ុន្តែជាវេទិកាយុទ្ធសាស្ត្រមួយ ដែលគាំទ្រយ៉ាងសកម្មដល់ចក្ខុវិស័យរយៈវែងរបស់កម្ពុជា ក្នុងការក្លាយជាប្រទេសមានចំណូលមធ្យមខ្ពស់ក្នុងឆ្នាំ២០៣០ និងប្រទេសមានចំណូលខ្ពស់នៅឆ្នាំ២០៥០។

ពិព័រណ៍ឧស្សាហកម្មគ្រឿងយន្តកម្ពុជាអន្តរជាតិលើកទី៩, ពិព័រណ៍ឧស្សាហកម្មសម្លៀកបំពាក់ និងវាយនភ័ណ្ឌកម្ពុជាអន្តរជាតិ លើកទី៩ មានទីតាំងនៅមជ្ឈមណ្ឌលសន្និបាត និងពិព័រណ៍កោះពេជ្រ រាជធានីភ្នំពេញ ពីថ្ងៃទី០៦ ដល់ថ្ងៃទី០៨ ខែសីហា ឆ្នាំ២០២៥ និងថ្ងៃទី០៩ ខែសីហា ជាកម្មវិធីពិសេស ៕