បរទេស៖ យោងតាមប្រភពព័ត៌មានពី CNN បានរាយការណ៍ថា ប្រធានាធិបតីអាម៉េរិក Donald Trump បានបញ្ចុះបញ្ចូល និងជំរុញឱ្យសម្ព័ន្ធមិត្តណាតូ (NATO) បញ្ឈប់ការទិញប្រេងពីរុស្ស៊ី ហើយលោកក៏មានគម្រោងដំឡើងពន្ធលើបណ្តាប្រទេសនានាដែលនៅតែបន្តទិញប្រេងរបស់រុស្ស៊ីថែមទៀតផង។

កាលពីថ្ងៃសៅរ៍ចុងសប្ដាហ៍កន្លងទៅ លោក Trump បានបង្ហោះនៅលើ Truth Social ថា ៖

«ខ្ញុំត្រៀមខ្លួនរួចជាស្រេចក្នុងដាក់ទណ្ឌកម្មធ្ងន់ៗលើប្រទេសរុស្ស៊ីនៅពេលដែលសមាជិកណាតូទាំងអស់យល់ព្រមធ្វើដូចការលើកឡើងរបស់ខ្ញុំដោយការឈប់ទិញប្រេងពីរុស្ស៊ី។ ដូចដែលអ្នកបានដឹងហើយថា ការប្តេជ្ញាចិត្តរបស់ណាតូក្នុងការយកជ័យជំនះលើរុស្ស៊ីគឺតិចជាង ១០០% ហើយមានភាពតក់ស្លុតដែលអ្នកខ្លះនៅបន្តទិញប្រេងពីរុស្សី! វាធ្វើឱ្យអំណាចនៃការចរចារបស់អ្នកធ្លាក់ចុះយ៉ាងខ្លាំង ដោយសារតែនៅតែពឹងផ្អែកប្រេងរុស្ស៊ី។ ទោះយ៉ាងណាក៏ដោយ ខ្ញុំបានត្រៀមខ្លួនរួចជាស្រេច ហើយនៅរង់ចាំតែការសម្រេចចិត្តរបស់អ្នកដែលជាសមាជិកណាតូថា បញ្ចប់ការទិញប្រេងពីរុស្ស៊ីនៅពេលណាតែប៉ុណ្ណោះ»។

មិនត្រឹមតែប៉ុណ្ណោះ Trump ក៏បានអំពាវនាវឱ្យណាតូដាក់សម្ពាធលើប្រទេសចិនផងដែរ ដោយជឿជាក់ថានេះ បើសិនណាតូដំឡើងពន្ធពី ៥០% ទៅ ១០០% លើប្រទេសចិន គឺជាផ្នែកមួយដែលអាចបញ្ចប់សង្គ្រាមរុស្ស៊ី-អ៊ុយក្រែន។ សង្រ្គាមរុស្ស៊ី-អ៊ុយក្រែន នឹងបញ្ចប់យ៉ាងឆាប់រហ័ស ប្រសិនបើជំហានទាំងនោះត្រូវបានចាត់វិធានការ។ យ៉ាងណាមិញ វាមិនទាន់ច្បាស់ទេថា តើប្រទេសណាតូនឹងចាត់វិធានការទាំងនេះបានដែរឬទេ? ទន្ទឹមនឹងនេះ Trump ក៏កំពុងពិចារណាដាក់ទណ្ឌកម្មធ្ងន់ធ្ងរ រួមមានទាំងវិស័យធនាគារ ប្រេង និងការដំឡើងពន្ធផងដែរទៅលើបណ្តាប្រទេសដែលនៅគាំទ្រ និងទិញប្រេងរបស់រុស្ស៊ី។ ជាក់ស្តែង ប្រធានាធិបតីអាម៉េរិករូបនេះបានដំឡើងពន្ធទ្វេដងទៅលើប្រទេសឥណ្ឌារហូតដល់ ៥០% គ្រប់មុខទំនិញនាំចូលក្នុងទឹកដីអាម៉េរិក ពាក់ព័ន្ធនឹងការបន្ត​ទិញ​ប្រេង​ពី​រុស្ស៊ី។

កាលពីសប្តាហ៍មុន Trump ក៏បានបញ្ចុះបញ្ចូលសហភាពអឺរ៉ុប (EU) ឱ្យដំឡើងពន្ធពី ៥០% ទៅ ១០០% លើទាំងប្រទេសចិន និងឥណ្ឌាផងដែរ។ យ៉ាងណាមិញ គេមើលឃើញថា សហភាព​អឺរ៉ុបអាចនឹងមិនធ្វើតាមសំណូមពររបស់ប្រធានាធិបតីអាម៉េរិករូបនេះទេ ដោយសារពួកគេ​កំពុង​ស្ថិត​ក្នុង​ដំណាក់កាល​ចុងក្រោយ​នៃ​ការ​ចរចាលើ​កិច្ចព្រមព្រៀង​ពាណិជ្ជកម្ម​ជាមួយ​ប្រទេស​ឥណ្ឌា។

គួរឲ្យបញ្ជាក់ដែរថា រុស្ស៊ី​ គឺជា​អ្នក​ផ្គត់ផ្គង់​ប្រេង​ដ៏ធំ​បំផុត​របស់​សហភាព​អឺរ៉ុប​មុន​ពេល​មានសង្គ្រាមជាមួយនឹង​អ៊ុយក្រែន​ឆ្នាំ២០២២។ ចាប់តាំងពីពេលនោះមក តំបន់អឺរ៉ុបបានហាមឃាត់ការនាំចូលប្រេងពីរុស្ស៊ីតាមសមុទ្រ ក៏ដូចជាផលិតផលប្រេងចម្រាញ់ ដូចជា ប្រេងម៉ាស៊ូតជាដើម។ ជាលទ្ធផល ការនាំចូលប្រេងពីរុស្ស៊ីទៅកាន់អឺរ៉ុបបានធ្លាក់ចុះយ៉ាងខ្លាំងមកត្រឹម ១,៧២ ពាន់លានដុល្លារសម្រាប់ត្រីមាសទីមួយនៃឆ្នាំ២០២៥ ខណៈដែលកាលពីត្រីមាសទីមួយក្នុងឆ្នាំ២០២១ មានទំហំរហូតដល់ប្រមាណ ១៦,៤ ពាន់លានដុល្លារអាម៉េរិក។ បន្ថែមពីនេះ ការនាំចូលឧស្ម័នធម្មជាតិរាវពីរុស្ស៊ីបានធ្លាក់ចុះពី ២២% នៃឆ្នាំ២០២១ មកត្រឹម ១៩% នៅឆ្នាំ២០២៥។ យ៉ាងណាមិញ តំបន់អឺរ៉ុបទំនងជាមិនចង់ពាក់ព័ន្ធនឹងការដាក់សម្ពាធលើឥណ្ឌា និងចិននោះទេ បើទោះបីជាពួកគេជាអ្នកទិញប្រេងដ៏ធំបំផុតរបស់រុស្ស៊ីក៏ដោយ ហើយពួកគេចង់បញ្ចៀសពីសង្គ្រាមពាណិជ្ជកម្ម ជាពិសេសជាមួយប្រទេសចិន៕