ភ្នំពេញ៖ លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត បានអញ្ជើញចូលរួមប្រមូលកសិផលដែលកើតចេញពីចលនា «យើងរួមគ្នាដើម្បីជាតិ» ដែលបានកើតចេញពីគំនិតផ្តួចផ្តើមពីលោកជំទាវផ្ទាល់ ក្នុងនាមជាអគ្គស្នងការនៃសមាគមមគ្គុទ្ទេសក៍ កាយឫទ្ធិនារីកម្ពុជា បន្ទាប់ពីបានពង្រីកសួនបន្លែ និងទទួលផលយ៉ាងឆាប់រហ័សនៅក្នុងវត្តអារាម សាលារៀន និងសហគមន៍ដទៃទៀត។

សូមជម្រាបថា នៅតាមសាលារៀន និងសហគមន៍នានាទូទាំងរាជធានីភ្នំពេញ ១៧០កន្លែង ភាគច្រើនចាប់ផ្តើមប្រមូលផល-កសិផលសរីរាង្គ កាលពីថ្ងៃថ្ងៃអាទិត្យ ទី១៨ ខែមករា ឆ្នាំ២០២៦ ដែលជាផ្នែកមួយនៃកិច្ចខិតខំប្រឹងប្រែង ដើម្បីផ្តល់ស្បៀងអាហារស្រស់ៗដល់កងកម្លាំងជួរមុខ និងជនស៊ីវិល ដែលត្រូវបានផ្លាស់ទីលំនៅ ដោយសារភាពតានតឹងនៅតាមព្រំដែន។ ក្រៅពីរាជធានីភ្នំពេញ លោកជំទាវបណ្ឌិត ក៏បានបំផុសចលនា «យើងរួមគ្នាដើម្បីជាតិ» នៅតាមសាខា កាយឫទ្ធិនារីកម្ពុជាទាំងអស់ ទូទាំងប្រទេស ដើម្បីបង្កើនទឹកចិត្ត ខ្មែរស្រឡាញ់ខ្មែរ ខ្មែររួមគ្នាតែមួយ ។

លោកជំទាវបណ្ឌិត ពេជ ចន្ទមុន្នី បានបង្ហាញពីមោទនភាព និងក្ដីរីករាយចំពោះចលនានៃការដាំបន្លែទូទាំងប្រទេសក្រោមស្មារតីស្នេហាជាតិ និងខ្មែរតែមួយ ដើម្បីគាំទ្រវីរកងទ័ពនៅសមភូមិមុខ នគរបាលជាតិ និងជនភៀសសឹក។

លោកជំទាវបណ្ឌិត ពេជ ចន្ទមុន្នី បានមានប្រសាសន៍ថា៖

«ថ្ងៃមុនយើងដាំ ថ្ងៃនេះយើងប្រមូលផលជាស្រេច! ត្រឹមមួយប៉ប្រិចភ្នែកសោះ កសិផលបន្លែជាច្រើនដាំដោយទឹកចិត្ត បេះដូងខ្មែរក្នុងចលនា “យើងរួមគ្នាដើម្បីជាតិ” ត្រូវបានប្រមូល និងវេចខ្ចប់ប្រកបដោយគុណភាព ទុកជូនវីរកងទ័ពជួរមុខ វីរនគរបាលជាតិ និងប្រជាជនភៀសសឹកកម្ពុជា»។

ក្នុងឱកាសនេះ លោកជំទាវបណ្ឌិត បានថ្លែងអំណរគុណចំពោះកម្លាំងសាមគ្គីយ៉ាងផុលផុសក្នុងចលនាដាំបន្លែ ទាំងនៅតាមគេហ​ដ្ឋាន វត្តអារាម សាលារៀន និងសហគមន៍នានា ដើម្បីគាំទ្រវីរកងទ័ព ដែលកំពុងឈរការពារបូរណភាពទឹកដី ក៏ដូចជាជនភៀសឹក ដើម្បីឱ្យពួកគេមានបន្លែស្រស់បរិភោគ ហើយជាបន្លែសុវត្ថិភាពជំនួយដល់សុខភាព។ តាមរយៈចលនាគាំទ្រវីរយុទ្ធជនកម្ពុជា ក៏ដូចជាការជួយអ្នកភៀសសឹកនឹងបន្តស្ថិតក្នុងដួងចិត្តរបស់ប្រជាពលរដ្ឋខ្មែរគ្រប់រូប ហើយបន្តសហការគ្នា ដើម្បីកម្ពុជាមានកម្លាំងដ៏ខ្លាំងក្លា ថែរក្សាការពារប្រទេសជាតិ។

សូមជម្រាបថា ដំណាំដាំដោយទឹកចិត្តបេះដូងខ្មែរ ក្នុងស្មារតីរួមគ្នាដើម្បីជាតិខ្មែរ ត្រូវបានប្រមូលផល និងធ្វើការវេចខ្ចប់យ៉ាងល្អស្អាត ត្រៀមចែកជូនដល់វីរកងទ័ព វីរនគរបាលជាតិ និងប្រជាជនភៀសសឹកតាមជំរំនានា ។ ដោយឡែក ការប្រ​មូ​លផលដំណាំបន្លែនៅសាលាបឋមសិក្សាភ្នំពេញថ្មី រួមមាន ស្ពៃក្រញាញ់ ស្ពៃតឿ សាឡាត់ ត្រកួន និងខាត់ណាដើម ប្រមាណជាងមួយតោន រួមជាមួយការប្រមូលផលដំណាំបន្លែពីសាលារៀនផ្សេងៗទៀតនៅទូទាំងរាជធានីភ្នំពេញ ដើម្បីដឹកជញ្ជូនយកទៅដោយផ្ទាល់ សម្រាប់ឧបត្ថម្ភដល់កងកម្លាំងការពារទឹកដីតាមព្រំដែននៅសមរភូមិមុខក្នុងខេត្តព្រះវិហារ និងខេត្តផ្សេងៗទៀតនៅតាមបណ្ដោយព្រំដែនកម្ពជា-ថៃ។