បរទេស​៖ យោងតាមប្រភពព័ត៌មានពី East Asia Forum បានរាយការណ៍ថា វៀតណាម ទទួលបានអត្ថប្រយោជន៍ពីការផ្លាស់ប្តូរខ្សែសង្វាក់ផ្គត់ផ្គង់ចេញពីប្រទេសចិនដោយសារពន្ធរបស់សហរដ្ឋអាមេរិក ប៉ុន្តែការរឹតបន្តឹងពាណិជ្ជកម្មមួយចំនួនរបស់ Donald Trump អាចផ្តល់ការលំបាកដល់វៀតណាមផងដែរ។

វៀតណាម ជាប្រទេសមានសេដ្ឋកិច្ចរីកចម្រើនមួយនៅអាស៊ីអាគ្នេយ៍ ប៉ុន្តែការជំរុញកម្លាំងពលកម្មទៅក្នុងការងារផលិតកម្មដែលមានតម្លៃទាបកំពុងស្ថិតនៅក្រោមការគំរាមកំហែងពីឧបសគ្គផ្នែកបច្ចេកវិទ្យា និងកម្លាំងពលកម្ម ដោយសារការគាំពារនិយមរបស់លោកខាងលិច។ នៅឆ្នាំ២០២៤ សេដ្ឋកិច្ចវៀតណាមទំនងជាមានអត្រាកំណើនដ៏រឹងមាំពី ៦​ ទៅ ៦,៥ ភាគរយ ប៉ុន្តែការវិនិយោគលើហេដ្ឋារចនាសម្ព័ន្ធ AI និងការអភិវឌ្ឍន៍បច្ចេកវិទ្យាដ៏សំខាន់គឺជារឿងចាំបាច់ដើម្បីធានាកំណើនសេដ្ឋកិច្ចនាពេលអនាគត។ ធនាគារពិភពលោក (World Bank) និងមូលនិធិរូបិយវត្ថុអន្តរជាតិ (IMF) ព្យាករណ៍ថា កំណើនរបស់វៀតណាមអាចរក្សាស្ថិរភាពប្រហែល ៦ ភាគរយនៅឆ្នាំ២០២៥ ដោយសារការនាំចេញពីចិនទៅកាន់សហរដ្ឋអាមេរិកភាគច្រើនបង្វែរទិសដៅនាំចេញពីអាស៊ីអាគ្នេយ៍វិញ ហើយវៀតណាមនៅតែជាអ្នកទទួលប្រយោជន៍ដ៏សំខាន់។ គួរឲ្យបញ្ជាក់ដែរថា វៀតណាម មានអត្រាអតិផរណា ៤ ភាគរយ, បំណុលទាប, អតិរេកពាណិជ្ជកម្ម, និងលំហូរនៃការវិនិយោគផ្ទាល់ពីបរទេស (FDI) នៅតែបន្តមាន ប៉ុន្តែ FDI ដែលបានចុះបញ្ជីថ្មីកើនឡើងត្រឹមតែ ១ ឬ ២ ភាគរយប៉ុណ្ណោះក្នុងឆ្នាំ២០២៤។

វៀតណាម មានសមត្ថភាពផ្លាស់ប្តូរការងារឲ្យមនុស្សបានជាងមួយលាននាក់ក្នុងមួយឆ្នាំ ដោយសារផ្លាស់ប្តូរពីការងារកសិដ្ឋានទៅរោងចក្រ និងការងារក្នុងទីក្រុងផ្សេងទៀត ហើយគំរូនេះបានជំរុញផលិតភាពការងារ និងកំណើនផលិតផលក្នុងស្រុកសរុបដែលធ្លាក់ចុះ។ យ៉ាងណាមិញ ​​កម្លាំងពលកម្ម​វ័យ​ក្មេងមានចំនួន​តិច​តួច​ក្នុង​ការងារផ្នែក​ដំឡើង​ ដែលធ្វើឲ្យ​ការនាំ​ចេញ​របស់​វៀតណាម​​ឈាន​ដល់​កម្រិតមួយ​មានដែនកំណត់។ ក្នុងចន្លោះឆ្នាំ២០១៨ ដល់ឆ្នាំ ២០១៩ ការងារក្នុងផ្នែកផលិតកម្មបានកើនឡើងចំនួន ១,៣ លាននាក់ ប៉ុន្តែចាប់ពីឆ្នាំ២០២២ ដល់ឆ្នាំ២០២៣ ចំនួននេះកើនឡើងត្រឹមតែ ២ សែននាក់ប៉ុណ្ណោះ។ ជាលទ្ធផល កំណើនផលិតផលក្នុងស្រុកសរុបបានធ្លាក់ចុះពី ៧,៤ ភាគរយក្នុងឆ្នាំ២០១៩ មកត្រឹម ៥ ភាគរយនៅឆ្នាំ២០២៣ ។

លើសពីនេះ ភាពស្មុគស្មាញ​ដែល​សេដ្ឋកិច្ច​វៀតណាមនឹង​ប្រឈមមុខ​ គឺការដាក់ពន្ធគយរបស់លោក Donald Trump ខណៈដែលលោកមិនសប្បាយចិត្តចំពោះការនាំចូលរបស់សហរដ្ឋអាមេរិកលើសពីការនាំចេញទៅកាន់ប្រទេសជាក់លាក់មួយ។ ជំរឿនអាមេរិកបានរាយការណ៍ថា ឱនភាពពាណិជ្ជកម្មជាមួយវៀតណាមមានចំនួន ១០ ពាន់លានដុល្លារក្នុងមួយខែនាឆ្នាំ២០២៤។ មិនត្រឹមតែប៉ុណ្ណោះ ការនាំចេញរបស់វៀតណាមទាំងនោះរួមមានទាំងទំនិញនាំចូលពីចិនដែលត្រូវបានកែច្នៃតិចតួចដើម្បីចៀសវាងការជាប់ពន្ធលើការនាំចេញរបស់ចិនដោយផ្ទាល់ទៅកាន់សហរដ្ឋអាមេរិក។ ថ្វីត្បិត​វៀតណាម​មិន​ឧបត្ថម្ភធន​ដល់​ការ​នាំ​ចេញ​ទាំង​នោះ ប៉ុន្តែចិន​អាច​ឧបត្ថម្ភធន​ការ​នាំ​ចេញ​របស់​ខ្លួន​តាម​រយៈ​វៀតណាម។ តាមរយៈការដើរតួជាឈ្មួញកណ្តាល វៀតណាម ទទួលបានអត្ថប្រយោជន៍ផ្នែកសេដ្ឋកិច្ចពីការកើនឡើងនៃទំហំពាណិជ្ជកម្ម និងការនាំចេញ ដែលជំរុញឱ្យមានការបង្កើតការងារ ទិន្នផលផលិតកម្មខ្ពស់ និងកំណើនសេដ្ឋកិច្ចទាំងមូល។ ប្រសិនបើមានការរឹតបន្តឹងលើសកម្មភាពនេះ វានឹងជះឥទ្ធិពលអវិជ្ជមានដល់សេដ្ឋកិច្ចវៀតណាម និងធ្វើឱ្យកំណើនសេដ្ឋកិច្ចរបស់ខ្លួនធ្លាក់ចុះ។ ជាក់ស្តែង កាលពីសប្តាហ៍មុន Donald Trump បានប្រកាសពីការដាក់ពន្ធលើការនាំចេញម៉ិកស៊ិក និងកាណាដាពាក់ព័ន្ធនឹងការនាំចូលរបស់ចិន ហើយវៀតណាមទំនងជាប្រឈមមុខនឹងការរឹតបន្តឹងស្រដៀងគ្នា។ ការរឹតបន្តឹងលើការនាំចេញរបស់វៀតណាម ខណៈដែលវិស័យអចលនទ្រព្យកំពុងយឺតយ៉ាវនឹងបង្អាក់កំណើននៃការចំណាយរបស់អ្នកប្រើប្រាស់ប្រហែល ៤ ភាគរយក្នុងមួយឆ្នាំ ហើយការលក់របស់ក្រុមហ៊ុនក្នុងស្រុកនឹងធ្លាក់ចុះ។

ប្រសិនបើវៀតណាមបន្ថែមតម្លៃខ្លួនឯងថែមទៀត ជាពិសេសក្រុមហ៊ុនក្នុងស្រុក នោះវានឹងជួយដល់ការចរចាពន្ធ ប៉ុន្តែវានៅមិនទាន់គ្រប់គ្រាន់នោះទេ។ សេដ្ឋកិច្ចវិទូចិនម្នាក់បានលើកឡើងថា តម្លៃក្រុមហ៊ុនក្នុងស្រុកនៅមានកម្រិតទាបសម្រាប់ការនាំចេញរបស់វៀតណាម ជាពិសេសសម្រាប់វិស័យអេឡិចត្រូនិកដែលកំពុងរីកចម្រើនយ៉ាងឆាប់រហ័ស។ នេះមានន័យថា ក្រុមហ៊ុនក្នុងស្រុករួមចំណែកតិចក្នុងការផលិតទំនិញនាំចេញ ដោយសារភាគច្រើននៃទំនិញទាំងនោះមានសមាសធាតុនាំចូល ឬសហគ្រាសវិនិយោគពីបរទេស។ ផលិតផលអេឡិចត្រូនិកជាច្រើនត្រូវបានផលិត ឬ ផ្តុំក្នុងប្រទេសវៀតណាម ប៉ុន្តែគ្រឿងបន្លាស់ និងបច្ចេកវិទ្យាទាំងនោះគឺនាំចូលពីបរទេស៕