ភ្នំពេញ ៖ ម្ចាស់ និងថ្នាក់ដឹកនាំមន្ទីរពេទ្យ ព្រមទាំងគ្លីនិកដៃគូឯកជនជាង ១០០នាក់ទទួលបានការបណ្តុះបណ្តាលជំនាញទីផ្សារឌីជីថល និងការគ្រប់គ្រងមន្ទីរពេទ្យ ព្រមទាំងសេវាសុខាភិបាលឌីជីថល ដើម្បីឱ្យបណ្តាមន្ទីរពេទ្យ និងគ្លីនិកឯកជនដៃគូចូលរួមទាំងអស់មានជំនាញទីផ្សារ និងគ្រប់គ្រង់ស្ថាប័នប្រតិបត្តិករ សេវាសុខាភិបាលឯកជនឌីជីថលពេញលេញ សម្រាប់យកទៅផ្សព្វផ្សាយទីផ្សារសេវាកម្មលើប្រព័ន្ធអ៊ីនធឺណែត លើបណ្តាញសង្គម និងពង្រីកអាជីវកម្មមន្ទីរពេទ្យ និងគ្លីនិកឯកជននៅក្នុងសម័យឌីជីថល និង AI ។

វគ្គបណ្តុះបណ្តាលនេះបានធ្វើឡើងកាលពីថ្ងៃចុងសប្ដាហ៍កន្លងទៅ ដោយក្រុមហ៊ុនបច្ចេកវិទ្យាសុខាភិបាលឌីជីថល ពេទ្យយើង និងក្រុមហ៊ុនបច្ចេកវិទ្យាសេវាកម្មអ៊ីនធឺណែតឈានមុខគេ ANGKOR DATA COMMUNICATION ។ ក្រៅអំពីជំនាញទីផ្សារឌីជីថល និងការគ្រប់គ្រងមន្ទីរពេទ្យ គ្លីនិកបែបឌីជីថល ក្នុងសិក្ខាបណ្តុះបណ្តាលរយៈពេលមួយថ្ងៃនេះ ក៏បានផ្តល់ការបង្វឹកនូវគន្លឹះសំខាន់ៗលើការគ្រប់គ្រង និងចាត់​ចែង​ហិរញ្ញវត្ថុតាមប្រព័ន្ធឌីជីថល ដោយប្រើប្រាស់ប្រព័ន្ធស្តង់ដារហិរញ្ញវត្ថុទទួលស្គាល់ជាអន្តរជាតិសម្រាប់ម្ចាស់មន្ទីរពេទ្យ និងគ្លីនិក និងច្បាប់ព័ន្ធដារសម្រាប់វិស័យសុខាភិបាល និងអនុវត្តការបង់ពន្ធដារលើប្រព័ន្ធឌីជីលថស្វ័យប្រវត្តិពីវាគ្មិនឧទ្ទេសជំនាញមានបទពិសោធន៍លើការគ្រប់គ្រងហិរញ្ញវត្ថុ និងច្បាប់ពន្ធដារ ។

លោកស្រី ប៉ុង លីមសាន ប្រធាននាយកប្រតិបត្តិ ក្រុមហ៊ុន ពេទ្យយើង ហ៊ែលថេក បានធ្វើបទអន្តរាគមន៍បង្ហាញពីតួនាទីស្នូលរបស់បច្ចេកវិទ្យាសម្រាប់ជាជម្រើសថ្មី ក្នុងការគ្រប់គ្រងស្ថាប័នអាជីវកម្ម មន្ទីរពេទ្យ និងគ្លីនិកបែបឌីជីថល នវានុវត្តន៍ និងពង្រីកវិសាលភាព សេវាកម្មលឿន ងាយស្រួល និងមានសប្រសិទ្ធភាពខ្ពស់ដល់ម្ចាស់ និងថ្នាក់ដឹកនាំមកពីមន្ទីរពេទ្យដៃគូទាំងអស់ ។

លោកស្រី ប៉ុង លីមសាន បានលើកយកដំណោះស្រាយបច្ចេកវិទ្យា និងនវានុវត្តន៍ថ្មីៗរបស់ក្រុមហ៊ុនពេទ្យយើង ដែលក្រុមហ៊ុនបានដាក់ឱ្យដំណើរការ និងគ្រោងដាក់ឱ្យដំណើរ ការតាមមន្ទីរពេទ្យដៃគូ បង្ហាញដល់អ្នកចូលរួមដោយផ្តោតលើភាពងាយស្រួស ប្រសិទ្ធិភាព និងអត្ថប្រយោជន៍សម្រាប់ម្ចាស់ និងអ្នកគ្រប់គ្រងមន្ទីរពេទ្យជំនាន់ថ្មី ជំនាន់សតវត្សរ៍ឌីជីថល និង AI ។

លោកស្រីបានលើកឡើងថា៖

«ពេទ្យយើង ផ្តោតលើប្រសិទ្ធភាពក្នុងការគ្រប់គ្រងតាមរយៈដំណោះស្រាយស្វ័យប្រវត្តិលើមុខងារនីមួយៗ ។ ជាមួយដំណោះស្រាយពីពេទ្យយើង យើងក៏មានប្រព័ន្ធសេវាកម្មជួយឱ្យមន្ទីរពេទ្យ គ្លីនិកដៃគូអាចបង្កើតប្រភពចំណូល ពង្រីកអាជីវកម្មបានរហ័ស និងងាយស្រួលជាងមុនផងដែរ តាមរយៈប្រព័ន្ធអែបពេទ្យយើង e-Health ID ដែលអនុញ្ញាតឱ្យអ្នកជំងឺណាត់ជួប និងពិគ្រោះជំងឺអនឡាញបាន »។

នាឱកាសនោះផងដែរ ក្រុមហ៊ុនបច្ចេកវិទ្យាសុខាភិបាល ពេទ្យយើង ឯ.ក និងក្រុមហ៊ុន ANGKOR DATA COMMUNICATION បានចុះអនុសារណៈយោគយល់គ្នា ដើម្បីបន្តធ្វើកិច្ចសហការគ្នានាំយកនូវអត្ថប្រយោជន៍បច្ចេកវិទ្យាអ៊ីនធឺណែត និងចំណេះដឹងបច្ចេកវិទ្យាថ្មីៗ ដើម្បីផ្តល់ជូនដល់គ្លីនិក និងមន្ទីរពេទ្យដៃគូរបស់ពេទ្យយើង ដោយភ្ជាប់នូវលក្ខខណ្ឌអត្ថប្រយោជន៍ សេវា និងតម្លៃពិសេស ដើម្បីលើកកម្ពស់សេវាសុខាភិបាលឌីជីថល ។ ពេទ្យយើង ជាមួយមន្ទីរពេទ្យដៃគូ ក៏បានផ្តល់លក្ខខណ្ឌ និងសេវាពិគ្រោះ និងព្យាបាលជំងឺ ក្នុងតម្លៃពិសេសជូនដល់ក្រុមហ៊ុន ANGKOR DATA COMMUNICATION និងអតិថជនទាំងអស់របស់ក្រុមហ៊ុនផងដែរ ដែលចុះឈ្មោះប្រើ និងណាត់ពិគ្រោះ និងព្យាបាលជំងឺនៅតាមមន្ទីរពេទ្យដៃគូរបស់ពេទ្យយើង នៅទូទាំងប្រទេស និងនៅក្រៅប្រទេស ។

ពេទ្យយើង ជាក្រុមហ៊ុនបច្ចេកវិទ្យាសុខាភិបាលឌីជីថលឈានមុខគេមួយនៅកម្ពុជា និងនៅទីផ្សារអន្តរជាតិចាប់តាំង ២០១៥ និងជាក្រុមហ៊ុនជ័យលាភីបច្ចេកវិទ្យាសុខាភិបាលថ្នាក់ជាតិ និងអន្តរជាតិផងដែរ ។ ពេទ្យយើងត្រូវបានផ្តួចផ្តើមបង្កើតឡើង ក្នុងទិសដៅចូលរួមចំណែកកសាងប្រព័ន្ធសុខាភិបាលឌីជីថលនៅកម្ពុជា និងបណ្តាប្រទេសក្នុងតំបន់ និងពិភព លោកដែលកំពុងតែត្រូវការបច្ចេកវិទ្យាសុខាភិបាលសម្រាប់អភិវឌ្ឍន៍បន្ថែមផ្នែកបច្ចេកវិទ្យាសុខាភិបាលឌីជីថលរបស់ខ្លួន ដើម្បីជំរុញឱ្យមានទិន្នន័យព្យាបាលឌីជីថលសម្រាប់អ្នកជំងឺគ្រប់រូបនៅលើប្រព័ន្ធបច្ចេកវិទ្យាឌីជីថលដ៏មានសុវត្ថិភាព ។ ប្រព័ន្ធគ្រប់គ្រងមន្ទីរពេទ្យឌីជីថល ពេទ្យយើងក្លៅ (Coud-based Pethyoeung Software) មានវេជ្ជបណ្ឌិត និងអ្នកផ្តល់សេវាសុខាភិបាលជិត ៧០០០០នាក់ចុះឈ្មោះប្រើប្រាស់ប្រព័ន្ធគ្រប់គ្រងមន្ទីរពេទ្យឌីជីថលពេទ្យយើង និងអ្នកជំងឺ និងអ្នកទទួលសេវាសុខាភិបាលជាង ៥លាននាក់មានកំណត់ត្រាវេជ្ជសាស្ត្រឌីជីថលច្បាស់លាស់ ។

អ្នកជំងឺ ឬអ្នកប្រើប្រាស់សេវាសុខាភិបាលចុះឈ្មោះប្រើអែប Pethyoeung e-Health ID ទាំងអស់អាចរក្សា និងគ្រប់គ្រងកំណត់ត្រាវេជ្ជផ្ទាល់ខ្លួនដោយសុវត្តិភាព អាចណាត់ជួបវេជ្ជបណ្ឌិតជំនាញ ទទួលសាររំលឹកការណាត់ជួនវេជ្ជបណ្ឌិត សាររំលឹកម៉ោងត្រូវលេបថ្នាំ សាររំលឹកមកចាក់វ៉ាក់ស៊ាំង និងពិនិត្យផ្ទៃពោះ អត្ថបទថែទាំសុខភាពខ្លីៗប្រចាំថ្ងៃ និងអាចស្កែន QR កូដបង់ថ្លៃសេវាពិនិត្យ និងព្យាបាលជំងឺលើទូរស័ព្ទដៃដោយស្វ័យប្រវត្តិ ៕