ភ្នំពេញ៖ នៅទសវត្សរ៍ចុងក្រោយនេះ ការធ្វើពិពិធកម្មសេដ្ឋកិច្ចកាន់តែមានវឌ្ឍនភាពល្អប្រសើរ ដោយក្នុងនោះគេបានសង្កេតឃើញថា កម្ពុជាមានដៃគូពាណិជ្ជកម្មកាន់តែច្រើនជាងមុន ហើយក៏មានការកើនឡើងនូវគម្រោងវិនិយោគក្នុងវិស័យដែលមានសក្តានុពល និងមានតម្លៃបន្ថែមខ្ពស់ក្រៅពីវិស័យកាត់ដេរ ដូចជាក្នុងផលិតកម្មគ្រឿងបង្គុំអេឡិចត្រូនិក និងដំឡើងរថយន្តជាដើម ដែលនាំឱ្យវិស័យកម្មន្តសាលទាំងកាត់ដេរ និងមិនមែនកាត់ដេរ ក្លាយជាវិស័យរួមចំណែកច្រើនជាងគេដល់កំណើនសេដ្ឋកិច្ច។

ឯកឧត្តម វង្សី វិស្សុត ឧបនាយករដ្ឋមន្ដ្រីប្រចាំការ និងជារដ្ឋមន្ដ្រីទទួលបន្ទុកទីស្ដីការគណៈរដ្ឋមន្ដ្រី បានថ្លែងដូច្នេះ​នៅក្នុងពិធីបិទសន្និបាតបូកសរុបលទ្ធផលការងារឆ្នាំ២០២៤ និងលើកទិសដៅការងារឆ្នាំ២០២៥ របស់ក្រសួងឧស្សាហកម្ម វិទ្យាសាស្ដ្រ បច្ចេកវិទ្យា និងនវានុវត្តន៍ នាព្រឹកថ្ងៃទី២៦ ខែកុម្ភ: ឆ្នាំ២០២៥ នាសណ្ឋា​គាររ៉េស៊ីដង់ សុខាភ្នំពេញ ។

ឯកឧត្តមឧបនាយករដ្ឋមន្ដ្រី បានមានប្រសាសន៍បញ្ជាក់ថា៖

«ការនាំចេញនៅឆ្នាំ២០២៤ សម្រេចបានកំណើន ១៥,៧% ហើយផលិតផលកម្ពុជាកាន់តែច្រើនកំពុងបោះជំហានចូលទៅកាន់ទីផ្សារតំបន់ និងអន្តរជាតិ។ នៅក្នុងដំណើរអភិវឌ្ឍរយៈពេលមធ្យម និងពេលវែងទៅមុខ កម្ពុជាត្រូវតែពង្រឹង និងពន្លឿនការអភិវឌ្ឍវិស័យឧស្សាហកម្មរបស់ខ្លួន ត្រូវធ្វើបរិវត្តកម្ម និងពិពិធកម្មរចនាសម្ព័ន្ធ ព្រមទាំងមូលដ្ឋានសេដ្ឋកិច្ចដែលបានទ្រទ្រង់កំណើនជាង២ទសវត្សរ៍កន្លងមកនេះឱ្យស្របតាមការវិវត្តនៃស្ថានភាពសង្គម-សេដ្ឋកិច្ចបច្ចុប្បន្នអាចបន្តទ្រទ្រង់កំណើនខ្ពស់ក្នុងរយៈពេលយូរ និងកាន់តែមានភាពធន់»។

ឯកឧត្តម វង្សី វិស្សុត បានលើកឡើងថា ទោះបីជាបានសម្រេចនូវសមិទ្ធផល និងវឌ្ឍនភាពគួរឱ្យគត់សម្គាល់ក្នុងឆ្នាំ២០២៤ ជាច្រើនក្ដី ក្រសួងឧស្សាហកម្ម វិទ្យាសាស្រ្ដ បច្ចេកវិទ្យា និងនវានុវត្ដន៍ បាននិងកំពុងប្រឈមបញ្ហាមួយចំនួនដែលត្រូវបង្កើនការយកចិត្តទុកដាក់ដោះស្រាយ ។

ឯកឧត្តមឧបនាយករដ្ឋមន្ដ្រីប្រចាំការ បានធ្វើការកាត់សម្គាល់នូវបញ្ហាប្រឈមគន្លឹះៗមួយចំនួន រួមមាន ១)- ចំនួនអង្គភាពសេដ្ឋកិច្ចបម្រើសកម្មភាពផលិតកម្ម កម្មន្ដសាល ដែលបានចុះបញ្ជីផ្លូវការមានចំនួនប្រមាណ ១៦% នៃចំនួនអង្គភាពសេដ្ឋកិច្ចបម្រើសកម្មភាពផលិតកម្ម កម្មន្ដសាលសរុប ២)- ភាគច្រើនលើសលុបប្រមាណ ៩៧% នៃសហគ្រាសធុនតូច និងមធ្យមគឺនៅតែស្ថិតនៅវិស័យសេដ្ឋកិច្ចក្រៅប្រព័ន្ធ និងភាគច្រើនមិនទាន់មានលទ្ធភាពក្នុងការតភ្ជាប់ជាមួយ សហគ្រាសធុនធំ និងក្រុមហ៊ុនវិនិយោគបរទេស ៣)- ការចុះបញ្ជីផលិតផល និងចុះបញ្ជីសុវត្ថិភាពផលិតផល សញ្ញាបញ្ជាក់ផលិតផល និងស្ដង់ដារផលិតផលនៅមានចំនួនតិច ៥)- ការតបណ្ដាញផ្គត់ផ្គង់ទឹកស្អាតធ្វើឡើងភាគច្រើននៅទីប្រជុំជន និងមិនទាន់ពង្រីកបណ្ដាញនៅទីជនបទ និង ៦)- ការអភិវឌ្ឍវិស័យវិទ្យាសាស្រ្ដ បច្ចេកវិទ្យា និងនវានុវត្ដន៍ នៅមានកម្រិតយោងតាម Global Innovation Index ឆ្នាំ២០២៤ កម្ពុជាត្រូវចាត់ថ្នាក់លេខរៀងទី ១០៣ ក្នុងចំណោម ១៣៣ ប្រទេស ជាដើម។

ក្រសួងឧស្សាហកម្មបាន និងកំពុងយកចិត្តទុកដាក់លើកកម្ពស់សហគ្រិនភាពនិងការអភិវឌ្ឍសហគ្រាសធុនតូច និងមធ្យម ការងារអភិវឌ្ឍសេដ្ឋកិច្ចក្រៅប្រព័ន្ធ ក្នុងការបង្កើតការងារសមរម្យថ្មី និងតម្រង់ទិសថ្មី រួមជាមួយការបង្កើតនិងកែសម្រួល ក្របខ័ណ្ឌគតិយុត្ត និងបទប្បញ្ញត្តិគាំទ្រពាក់ព័ន្ធនានា ដើម្បីរួមចំណែកត្រៀមកម្ពុជាក្នុងដំណើរចាកចេញពីឋានៈប្រទេសមានការអភិវឌ្ឍន៍តិចតួចនៅឆ្នាំ២០២៩ដោយជោគជ័យ។

ឯកឧត្តម ហែម វណ្ណឌី រដ្ឋមន្រ្តីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានមានប្រសាសន៍ថា៖ ក្រសួងឧស្សាហកម្ម បានដាក់ចេញនូវទិសដៅយុទ្ធសាស្ត្រចំនួន ៧៖ទី១. ការធ្វើពិពិធកម្មវិស័យឧស្សាហកម្មកម្ពុជាឱ្យក្លាយជាឧស្សាហកម្មមានផលិតភាពខ្ពស់,ទី២. ការអភិវឌ្ឍ និងទំនើបកម្មសហគ្រាសធុនមីក្រូ តូច មធ្យម និងសិប្បកម្ម,ទី៣. ការអភិវឌ្ឍគុណវុឌ្ឍិ និងការពង្រឹងការអនុវត្តនៃហេដ្ឋារចនាសម្ព័ន្ធគុណភាពជាតិ,ទី៤. ការពង្រឹងការគ្រប់គ្រង និងជំរុញការអភិវឌ្ឍវិស័យទឹកស្អាត,ទី៥. ការពង្រឹងតួនាទីវិស័យ វ.ប.ន. ដើម្បីលើកកម្ពស់សមត្ថភាពក្នុងវិស័យសាធារណៈ និងឯកជន,ទី៦. ការជំរុញការអភិវឌ្ឍសេដ្ឋកិច្ចក្រៅប្រព័ន្ធឱ្យរីកធំធាត់ និងមានលទ្ធភាពឈានចូលក្នុងប្រព័ន្ធ, និងទី៧. ការពង្រឹង និងលើកកម្ពស់សមត្ថភាពស្ថាប័ន៕