សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បាងកក ៖ យោងតាមប្រភពពី Vietnam Plus បានរាយការណ៍ពីការព្យាករណ៍របស់សេដ្ឋវិទូថា ថៃអាចប្រឈមមុខនឹងបញ្ហាសំខាន់ៗមួយចំនួនដែលរារាំងដល់កំណើនសេដ្ឋកិច្ចរបស់ខ្លួននៅឆ្នាំ២០២៥ នេះ។
យោងតាមលោក Aat Pisanwanich អ្នកជំនាញផ្នែកសេដ្ឋកិច្ចអន្តរជាតិ និងកិច្ចការអាស៊ាន និងជាទីប្រឹក្សានៅ Intelligence Research Consultant Co Ltd បានព្យាករណ៍ថា ប្រទេសថៃអាចនឹងប្រឈមមុខនឹងបញ្ហាសំខាន់ៗចំនួន ៥ ដែលអាចរារាំងកំណើនសេដ្ឋកិច្ចរបស់ខ្លួននៅឆ្នាំនេះរួមមាន៖ បំណុលគ្រួសារ, គោលនយោបាយលើការវិនិយោគ និងអត្រាការប្រាក់, ឥទ្ធិពលពី Trumponomics 2.0, ការធ្លាក់ចុះសេដ្ឋកិច្ចចិន និងភាពតានតឹងភូមិសាស្ត្រនយោបាយ។
សេដ្ឋវិទូរូបនេះបានព្យាករណ៍ថា ការកាន់អំណាចជាលើកទីពីររបស់ Donald Trump នឹងកាត់បន្ថយផលិតផលសរុបក្នុងស្រុក (GDP) របស់ថៃចន្លោះ ០,៣ ភាគរយទៅ ០,៥ ភាគរយ។ នៅឆ្នាំនេះ សេដ្ឋកិច្ចថៃត្រូវបានព្យាករណ៍ថាកើនឡើងនៅចន្លោះ ២,២ ភាគរយដល់ ២,៧ ភាគរយ ក្នុងរយៈពេល ៧ឆ្នាំជាប់គ្នាដែលកំណើនទាបជាង ៣ ភាគរយ។
លោក Aat Pisanwanich បន្ថែមថា ការដំឡើងពន្ធគយរបស់សហរដ្ឋអាម៉េរិកដែលបានអនុវត្តក្រោម Trumponomics 2.0 ទំនងជានឹងកាត់បន្ថយការនាំចេញរបស់ថៃទៅកាន់សហរដ្ឋអាម៉េរិកពី ៥ ទៅ ១០ភាគរយ ដែលនឹងធ្វើឱ្យការនាំចេញធ្លាក់ចុះ ២ ភាគរយ។ លើសពីនេះ ឱនភាពពាណិជ្ជកម្មរបស់ថៃជាមួយសហរដ្ឋអាមេរិកត្រូវបានព្យាករណ៍ថានឹងធ្លាក់ចុះនៅត្រឹម ២៧,៥ ពាន់លានបាត (៨០២,២ លានដុល្លារអាម៉េរិក) នៅឆ្នាំនេះ ហើយការនាំចូលពីសហរដ្ឋអាម៉េរិកអាចនឹងកើនឡើងទ្វេដង។
លោក Aat ក៏បានបញ្ជាក់ពីឥទ្ធិពលរបស់ចិនចំពោះសេដ្ឋកិច្ចពិភពលោក និងសេដ្ឋកិច្ចថៃផងដែរ ដោយសារអត្រាកំណើនសេដ្ឋកិច្ចដែលកំពុងបន្តធ្លាក់ចុះរបស់ចិន បានជះឥទ្ធិពលដល់តម្រូវការទំនិញ និងកាត់បន្ថយចំនួនទេសចរចិន។ ទន្ទឹមនឹងនេះ យុទ្ធសាស្រ្តរបស់ប្រទេសចិនក្នុងការរក្សាកម្រិតផលិតកម្មដើម្បីសម្រេចបាននូវគោលដៅកំណើនសេដ្ឋកិច្ច ៥ ភាគរយអាចបង្កហានិភ័យបន្ថែមទៀតដល់ដៃគូពាណិជ្ជកម្មរបស់ខ្លួន ព្រោះវានាំឱ្យកំណើននៃការហូរចូលផលិតផលចិនទៅទីផ្សារប្រទេសដៃគូពាណិជ្ជកម្មរបស់ខ្លួនក្នុងនោះមានប្រទេសថៃផងដែរ។ អ្នកជំនាញបានក្រើនរំលឹកថា ប្រសិនបើកំណើនសេដ្ឋកិច្ចរបស់ចិនទាបជាង ៥ ភាគរយនៅឆ្នាំ២០២៥ វានឹងប៉ះពាល់ដល់ការនាំចេញរបស់ថៃទៅកាន់ប្រទេសចិន និងកាត់បន្ថយចំនួនភ្ញៀវទេសចរចិនមកត្រឹម ៧ លាននាក់ប៉ុណ្ណោះនៃចំនួនភ្ញៀវទេសចរបរទេសសរុបដែលរំពឹងទុកពី ៣២ ទៅ ៣៤ លាននាក់។
លោកបានបន្ថែមថា សម្ពាធពីខាងក្រៅនៅឆ្នាំ២០២៥ អាចនាំឱ្យមានកំណើននៃការបិទក្រុមហ៊ុន ឬ អាជីវកម្មក្នុងចំណោមសហគ្រាសធុនតូច និងមធ្យម ឬ អាជីវកម្មមួយចំនួនទៀតអាចត្រូវបានគ្រប់គ្រងដោយវិនិយោគិនបរទេស។ មិនត្រឹមតែប៉ុណ្ណោះ ការអនុវត្តប្រមូលពន្ធលើតម្លៃបន្ថែមមិនសាកសមសម្រាប់ស្ថានភាពសេដ្ឋកិច្ចថៃបច្ចុប្បន្ននោះទេ ខណៈដែលប្រទេសនេះខ្វះគម្រោងវិនិយោគសំខាន់ៗ ដើម្បីជំរុញកំណើនសេដ្ឋកិច្ច។ ការបែងចែកថវិកាសម្រាប់វិធានការប្រជានិយម ឬ ជួយប្រជាជនមិនអាចជំរុញសេដ្ឋកិច្ចប្រកបដោយប្រសិទ្ធភាពនោះទេ ហើយអត្រាភាពអត់ការងារធ្វើត្រូវបានព្យាករណ័ថានឹងកើនឡើងដោយសារតែការធ្លាក់ចុះនៃសេដ្ឋកិច្ច ការបិទក្រុមហ៊ុន និងការធ្លាក់ចុះក្នុងចំណោមអាជីវកម្មថៃ៕
Account
Security
Favourite Content