សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពព័ត៌មានពីបរទេសបានរាយការណ៍ថា សហភាពអឺរ៉ុបបានបន្តអនុម័តទណ្ឌកម្មជុំទី ១៦ លើរុស្ស៊ី ដោយផ្តោតលើវិស័យសំខាន់ៗនៃសេដ្ឋកិច្ច និងបុគ្គលដែលពាក់ព័ន្ធក្នុងសង្គ្រាមជាមួយនឹងអ៊ុយក្រែន។
ស្របពេលដែលសង្រ្គាមបានឈានចូលដល់ឆ្នាំទី៣ មន្ត្រីសហភាពអឺរ៉ុបបានសង្កត់ធ្ងន់លើការធ្វើឱ្យសមត្ថភាពយោធារបស់ទីក្រុងម៉ូស្គូចុះខ្សោយ។ ទណ្ឌកម្មថ្មីនេះរួមមាន វិធានការរឹតបន្តឹងសេដ្ឋកិច្ច និងបុគ្គល ក្នុងគោលបំណងបង្ក្រាបដល់កងនាវាស្រមោលរបស់រុស្ស៊ី, បណ្តាញហិរញ្ញវត្ថុ, និងវិស័យយោធារបស់រុស្ស៊ី។
លោក Kaja Kallas ប្រធានគោលនយោបាយការបរទេសសហភាពអឺរ៉ុបបានលើកឡើងថា អស់រយៈពេល៣ឆ្នាំមកនេះ រុស្ស៊ី បានទម្លាក់គ្រាប់បែកលើអ៊ុយក្រែនដោយឥតឈប់ឈរ ប៉ុនប៉ងលួចទឹកដីដែលមិនមែនជារបស់ខ្លួន។ រាល់ការដាក់ទណ្ឌកម្ម គឺដើម្បីទប់ស្កាត់វិមានក្រឹមឡាំងពីការផ្តល់មូលនិធិសម្រាប់ធ្វើសង្គ្រាម។
ទន្ទឹមនឹងនេះ ក្រុមប្រឹក្សាសហភាពអឺរ៉ុបបានដាក់ទណ្ឌកម្មលើបុគ្គល និងអង្គភាពចំនួន ៨៣ ដែលពាក់ព័ន្ធនឹងសង្គ្រាមជាមួយអ៊ុយក្រែន ខណៈដែលការពង្រីកលក្ខណៈវិនិច្ឆ័យដើម្បីកំណត់គោលដៅលើកងនាវាស្រមោលរបស់រុស្ស៊ី ដែលព្យាយាមគេចពីទណ្ឌកម្មលើការនាំចេញប្រេងក៏កំពុងយកចិត្តទុកដាក់។ បច្ចុប្បន្ននេះ នាវាសរុបចំនួន ១៥៣ គ្រឿងត្រូវបានរឹតបន្តឹងក្រោមវិធានការរបស់សហភាពអឺរ៉ុប។ មិនត្រឹមតែប៉ុណ្ណោះ សហភាពអឺរ៉ុបបានបង្កើនការរឹតបន្តឹងលើធនាគារសំខាន់ៗក្នុងតំបន់ចំនួន ១៣ និងហាមឃាត់ស្ថាប័នហិរញ្ញវត្ថុបរទេសពីការប្រើប្រាស់ប្រព័ន្ធផ្ញើសារហិរញ្ញវត្ថុរបស់រុស្ស៊ីដែលមានឈ្មោះថា SPFS ។ លើសពីនេះ អង្គភាពចំនួន ៥៣ ត្រូវបានបញ្ចូលទៅក្នុងបញ្ជីនៃអ្នកផ្គត់ផ្គង់យោធារបស់រុស្ស៊ី។ ទណ្ឌកម្មនេះក៏រួមបញ្ចូលការរឹតបន្តឹងពាណិជ្ជកម្មថ្មីលើបច្ចេកវិទ្យាដ្រូន សារធាតុគីមី និងកម្មវិធី software សម្រាប់ការអភិវឌ្ឍអាវុធរបស់រុស្ស៊ីផងដែរ។
ការរឹតបន្តឹងបន្ថែមទៀតត្រូវបានដាក់លើការនាំចូលអាលុយមីញ៉ូម និងការនាំចេញវត្ថុធាតុដើមក្នុងវិស័យឧស្សាហកម្មរបស់រុស្ស៊ី ដែលជាប្រភពចំណូលដ៏សំខាន់សម្រាប់ទីក្រុងម៉ូស្គូ។ មិនត្រឹមតែប៉ុណ្ណោះ ប្រព័ន្ធផ្សព្វផ្សាយរុស្ស៊ីចំនួន ៨ ត្រូវបានដកហូតអាជ្ញាប័ណ្ណផ្សាយរបស់សហភាពអឺរ៉ុប ខណៈដែលទណ្ឌកម្មថ្មីនឹងរឹតបន្តឹងកំពង់ផែ បណ្តាញដឹកជញ្ជូន និងអាកាសចរណ៍របស់រុស្ស៊ី។ បន្ថែមពីនេះ ទណ្ឌកម្មថាមពលត្រូវបានពង្រីកបន្ថែមទៀត ដោយហាមឃាត់ការផ្ទុកបណ្តោះអាសន្ននៃប្រេងឆៅរបស់រុស្ស៊ីនៅក្នុងសហភាពអឺរ៉ុប និងរឹតបន្តឹងកម្មវិធី software ដែលប្រើសម្រាប់ការរុករកប្រេង និងឧស្ម័ន៕
Account
Security
Favourite Content