បរទេស៖ សហភាពអឺរ៉ុប បានពន្យារពេលចុះកិច្ចព្រមព្រៀងពាណិជ្ជកម្មសេរីដ៏ធំមួយជាមួយបណ្តាប្រទេសនៅអាម៉េរិកខាងត្បូងបន្ទាប់ពីមានការតវ៉ាពីសំណាក់កសិករក្នុងតំបន់ ជាមួយនឹងការប្រឆាំងនៅនាទីចុងក្រោយដោយបារាំង និងអ៊ីតាលី នេះបើយោងតាមសេចក្ដីរាយការណ៍ពី Al Jazeera។

កាលពីថ្ងៃព្រហស្បតិ៍ សប្ដាហ៍នេះ ប្រធានគណៈកម្មាធិការអឺរ៉ុប លោក Paula Pinho បានបញ្ជាក់ថា ការចុះហត្ថលេខាលើកិច្ចព្រមព្រៀងពាណិជ្ជកម្មរវាងសហភាពអឺរ៉ុប (EU) និងតំបន់អាម៉េរិកខាងត្បូង Mercosur នឹងត្រូវពន្យារពេលរហូតដល់ខែមករា ឆ្នាំ២០២៦ ខណៈដែលកិច្ចព្រមព្រៀងនេះបានចំណាយពេលប្រហែល ២៥ ឆ្នាំដើម្បីចរចា។ កាលពីដំបូង ប្រធានគណៈកម្មការ Ursula von der Leyen រំពឹងថានឹងធ្វើដំណើរទៅកាន់ប្រទេសប្រេស៊ីលដើម្បីចុះហត្ថលេខាលើកិច្ចព្រមព្រៀងនៅថ្ងៃសៅរ៍សប្ដាហ៍នេះ ប៉ុន្តែចាំបាច់ត្រូវការសម្លេងគាំទ្រច្រើនពីសមាជិក។

លោកស្រី Von der Leyen ប្រធានក្រុមប្រឹក្សាអឺរ៉ុប និងលោក Antonio Costa រួមជាមួយនាយករដ្ឋមន្ត្រីអ៊ីតាលី លោក Giorgia Meloni បានយល់ព្រមពន្យារពេលកិច្ចព្រមព្រៀងនេះ ដោយផ្អែកលើលក្ខខណ្ឌមួយចំនួនដែលអ៊ីតាលីបានគាំទ្រថាគួរបោះឆ្នោតនៅក្នុងខែមករា។ លើសពីនេះ​ ប្រធានាធិបតីបារាំង លោក Emmanuel Macron ក៏បានប្រឆាំងនឹងកិច្ចព្រមព្រៀងនេះផងដែរ ហើយបានអំពាវនាវឱ្យមានការពិភាក្សាបន្ថែមទៀតនៅក្នុងខែមករា។ លោក Macron កំពុងពិភាក្សាជាមួយនឹងសមាជិកផ្សេងទៀត ដូចជា អ៊ីតាលី ប៉ូឡូញ បែលហ្ស៊ិក អូទ្រីស និងអៀរឡង់ អំពីការពន្យារពេលលើកិច្ចចុះហត្ថលេខានេះ ដោយលើកហេតុផលថា កសិករក្នុងតំបន់កំពុងប្រឈមមុខនឹងបញ្ហាធំរួចហើយ។

កិច្ចព្រមព្រៀងពាណិជ្ជកម្មរវាងសហភាពអឺរ៉ុប ជាមួយតំបន់អាម៉េរិកខាងត្បូង Mercosur អាចនឹងបង្កើតជាតំបន់ពាណិជ្ជកម្មសេរីដ៏ធំបំផុតរបស់ពិភពលោក ដែលអាចជួយឱ្យអឺរ៉ុបចំនួន ២៧ ប្រទេស នាំចេញយានយន្ត គ្រឿងចក្រ និងស្រាកាន់តែច្រើនទៅកាន់អាម៉េរិកឡាទីន ចំពេលមានភាពតានតឹងពាណិជ្ជកម្មសកលកំពុងកើតមាន។ យ៉ាងណាមិញ ផែនការនេះកំពុងជួបភាពរង្គោះរង្គើរនៅក្នុងតំបន់ជាពិសេសបារាំង និងអ៊ីតាលី ដែលកំពុងភ័យខ្លាចលំហូរចូលនៃទំនិញតម្លៃទាប ដែលអាចប៉ះពាល់ដល់កសិករអឺរ៉ុប ខណៈដែលអាល្លឺម៉ង់ អេស្បាញ និងបណ្តុំប្រទេសន័រឌិក (Nordic) បានលើកឡើងថា វាអាចនឹងធ្វើឱ្យការនាំចេញរងផលប៉ះពាល់ដោយសារពន្ធរបស់អាម៉េរិក និងការកាត់បន្ថយការពឹងផ្អែកលើរ៉ែសំខាន់ៗរបស់ប្រទេសចិន។

លោក Dominic Kane អ្នករាយការណ៍ពីទីក្រុងប៊ែកឡាំងរបស់ Al Jazeera បានលើកឡើងថា អាល្លឺម៉ង់ អេស្បាញ និងបណ្តុំប្រទេសន័រឌិក កំពុងធ្វើការបញ្ចុះបញ្ចូលសមាជិកផ្សេងទៀតឲ្យយល់ព្រមចំពោះកិច្ចព្រមព្រៀងមួយនេះ។ យ៉ាងណាមិញ ​រដ្ឋាភិបាល​បារាំង និង​អ៊ីតាលី នៅតែ​ប្រឆាំង ដោយសារ​ព្រួយបារម្ភពី​វិស័យ​កសិកម្ម​ដ៏​មាន​ឥទ្ធិពល​របស់​ពួកគេ ជាពិសេសបសុសត្វ និង សាច់គោ ដែលនាំចូលពីបណ្តាប្រទេស Mercosur នឹងមានតម្លៃថោកជាង។ ជាលទ្ធផល កិច្ចព្រមព្រៀងនេះមិនទាន់ត្រូវបានចុះហត្ថលេខានៅឡើយនោះទេក្នុងខែធ្នូនេះទេ ដោយទំនងជាត្រូវពន្យារពេលរហូតដល់ពាក់កណ្តាលខែមករា ឆ្នាំ២០២៦។ ការសម្រេចចិត្តពន្យារពេលនេះបានកើតឡើងប៉ុន្មានម៉ោងបន្ទាប់ពីកសិករជិះត្រាក់ទ័របិទផ្លូវ និងបាញ់កាំជ្រួចក្នុងទីក្រុងប្រ៊ូសែល ដើម្បីតវ៉ានឹងកិច្ចព្រមព្រៀងនេះ ខណៈដែលប៉ូលិសបានប្រើឧស្ម័នបង្ហូរទឹកភ្នែក និងកាណុងបាញ់ទឹកដើម្បីទប់ទល់បាតុករ។ សូមបញ្ជាក់ថា កសិករខ្លះដែលជាក្រុមបាតុករបានធ្វើដំណើរមកពីឆ្ងាយ ដូចជា ប្រទេសអេស្ប៉ាញ និងប៉ូឡូញ ហើយពួកគេបានយកដំឡូង និងស៊ុតទៅគប់ដាក់ប៉ូលីស ខណៈដែលអ្នកខ្លះដុតកង់ឡាន និងមឈូសឈើក្លែងក្លាយដែលមានសរសេរពាក្យថា “កសិកម្ម”៕