ភ្នំពេញ ៖ កាលពីពេលថ្មីៗនេះ សមាគមស្វាយចន្ទីកម្ពុជា (សសក) បានរៀបចំព្រឹត្តិការណ៍ផ្គូផ្គង​អាជីវកម្ម​នៅវិទ្យាស្ថាន ពហុបច្ចេកទេស ខេត្តកំពង់ធំ នៃក្រសួងការងារ និងបណ្តុះបណ្តាលវិជ្ជាជីវៈ។ គោលបំណងសំខាន់នៃព្រឹត្តិការណ៍នេះ គឺដើម្បីបង្កើនការទិញលក់គ្រាប់ស្វាយចន្ទីឆៅក្នុងស្រុក និងកាត់​បន្ថយលំហូរចេញប្រហែល ៣០ភាគរយនៃផលិតកម្មចន្ទីសរុបរបស់កម្ពុជាទៅកាន់ទីផ្សារ​ខាងក្រៅ។ ក្នុងនោះ ស្ថាប័នហិរញ្ញវត្ថុជាដៃគូអភិវឌ្ឍន៍សំខាន់ៗ ដូចជា ធនាគារវីង ធនាគារស្ថាបនាលីមីតធីត ធនាគារ ARDB ធនាគារ សហគ្រាសធុនតូចនិងមធ្យម និងសហគ្រិនខ្មែរ ក៏បានចូលរួមក្នុងការ​ពិភាក្សា​​ផងដែរ។

សម្រាប់កិច្ចដំណើរការនៃព្រឹត្តិការណ៍នេះក៏ទទួលបានការគាំទ្រពី EU – German Capsafe , HEKS / EPER Cambodia, គម្រោង ASCEP , WCS , Oxfam, និង Pearl – FAO ដែលស្ថាប័នទាំងអស់នេះ​បានដើរ​តួនាទីយ៉ាងសកម្មក្នុងការសម្របសម្រួលកិច្ចខិតខំប្រឹងប្រែងផ្គូផ្គង​អាជីវកម្ម។

ក្នុងឱកាសនេះ ឯកឧត្តមបណ្ឌិត សួង ណយ ដែលជាអនុប្រធានគណៈកម្មាធិការជាតិ​ជំរុញ​ចលនាភូមិមួយ ផលិត​ផលមួយ និងជាប្រធានក្រុមការងារអភិវឌ្ឍន៍សេដ្ឋកិច្ចមូលដ្ឋាន និងទីផ្សារ​ផលិតផលខ្មែរ​ខេត្តកំពង់ធំ បានឱ្យដឹងថា អ្នកចូលរួមទាំងអស់សុទ្ធតែបានចរចាទិញលក់​ផលិតកម្មតាមកិច្ចសន្យា និងប្ដេជ្ញា​ប្រឹងប្រែងធ្វើ​ការងារ​បន្តក្នុងគោលបំណងទប់លំហូរគ្រាប់ឆៅ ៣០% មិនឲ្យចាល់លើទីផ្សារ​ដោយប្រើ​យន្តការ​ទិញស្តុក ព្រមទាំងកែច្នៃជាផលិតផលសម្រេច ដើម្បីលក់នៅលើ​ទីផ្សារក្នុងស្រុក និងនាំចេញទៅក្រៅ​ប្រទេស​ដោយផ្ទាល់។

យ៉ាងណាមិញ ដើម្បីដំណោះស្រាយការខ្ចះខាតទុន ឯកឧត្តមបណ្ឌិតបានបង្កើតគំនិតផ្ដួចផ្ដើមថ្មីមួយ ដោយបំផុស​អ្នកដាំដំណាំស្វាយចន្ទី និងអ្នកប្រមូលទិញស្តុកដើម្បីនាំចេញ យកគ្រាប់ចន្ទីមកចូល​ជាភាគហ៊ុន ជាមួយសហគ្រាសកែច្នៃ ដើម្បីចែកផលចំណេញ។

ឯកឧត្តមបន្តគូសបញ្ជាក់ថា៖

«គំនិតផ្តួចផ្តើមមួយនេះត្រូវបានសារទរដែលមិននឹកស្មានដល់ ហើយពួកគាត់ក៏បានចាប់ផ្ដើមទាក់ទង​គ្នា​ចូលហ៊ុ​នជាគ្រាប់ចន្ទី ដោយអ្នកខ្លះរហូតដល់១០តោន។»

ជាមួយគ្នានេះ ដើម្បីចូលរួមជួយផ្នែកប្រភពទុន ធនាគារ ARDB ការិយាល័យចល័តខេត្តកំពង់ធំឯណោះ​ ក៏បានចូលរួម​ផ្សព្វផ្សាយ​ពីគោលការណ៍ឥណទានរបស់ធនាគារ​ ARDB ក្នុងកម្មវិធី “​ ជំនួបធុរ​:​កិច្ចត្រៀមរដូវ​កាលថ្មីឆ្នាំ២០២៦​ រវាង​ក្រុមហ៊ុន​ប្រមូលទិញគ្រាប់ស្វាយចន្ទី​ និងសហគមន៍កសិកម្ម ឈ្មួញកណ្តាល​ កសិករ​ជាសមាជិកសមាគមន៍ស្វាយចន្ទីកម្ពុជា”​ ព្រមទាំងបានបេីកគណនីសន្សំជូនសមាជិកដែល​បានចូលរួមផងដែរ។

យោងតាមទិន្នន័យផ្ទៃដីដាំដុះដំណាំស្វាយចន្ទីជាតិប្រចាំឆ្នាំ២០២៤ កម្ពុជាមានផ្ទៃដីដាំដុះដំណាំ​ស្វាយចន្ទីសរុបជាង៥៨ម៉ឺនហិកតា ដែលអាចផ្ដល់ទិន្នផលជាមធ្យមប្រមាណ ១,៥តោន ក្នុង ១ហិកតា៕