សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ នៅទីបំផុត កម្ពុជាបានចាប់ផ្ដើមនាំចេញគ្រាប់ធញ្ញជាតិ និងផ្លែឈើក្រៀមទៅកាន់ទីផ្សារប្រទេសអូស្ត្រាលីជាលើកដំបូង ដែលជាសញ្ញាមួយដ៏ល្អសម្រាប់ការពង្រីកទំហំពាណិជ្ជកម្មរវាងកម្ពុជា និងអូស្ត្រាលី ជាពិសេស ការបង្កើនសមត្ថភាពប្រកួតប្រជែងនៃការនាំចេញរបស់កម្ពុជា។
តាមសេចក្ដីប្រកាសព័ត៌មានរបស់ក្រសួងពាណិជ្ជកម្មកាលពីថ្ងៃចុងសប្ដាហ៍កន្លងទៅនេះបានឱ្យដឹងថា ការនាំចេញគ្រាប់ធញ្ញជាតិ និងផ្លែឈើក្រៀមទៅកាន់ប្រទេសអូស្ត្រាលីនាពេលនេះ ត្រូវបានធ្វើឡើងតាមរយៈក្រុមហ៊ុន រ៉ូយ៉ាល់ ត្រាស់ ត្រេឌីង ខូអិលធីឌី (RTT) ហើយកិច្ចព្រមព្រៀងនៃការនាំចេញជាផ្លូវការលើកដំបូងនេះ អាចសម្រេចទៅបានក្រោមកិច្ចគាំទ្រយ៉ាងខ្លាំងពីរដ្ឋាភិបាលប្រទេសអូស្ត្រាលីក្រោមកម្មវិធីភាពជាដៃគូ កម្ពុជា-អូស្ត្រាលី សម្រាប់ការអភិវឌ្ឍសេដ្ឋកិច្ចប្រកបដោយភាពធន់ (CAPRED) និងចិរភាព។
សូមបញ្ជាក់ថា ក្រុមហ៊ុន រ៉ូយ៉ាល់ ត្រាស់ ត្រេឌីង ខូអិលធីឌី (RTT) បាននាំចេញគ្រាប់ធញ្ញជាតិ និងផ្លែឈើក្រៀមទៅកាន់ទីផ្សារប្រទេសអូស្ត្រាលីមានទំហំជាង១២តោន ដែលសុទ្ធសឹងជាផលិតផលកសិកម្មកែច្នៃ រួមមាន ៖ គ្រាប់ស្វាយចន្ទី ស្វាយក្រៀម ខ្នុរក្រៀម ចេកក្រៀម និងត្រាវចំណិតក្រៀម។
ឯកឧត្តម ដេរិក យីប ឯកអគ្គរដ្ឋទូតអូស្ត្រាលីប្រចាំនៅកម្ពុជា បានថ្លែងថា អូស្ត្រាលី មានមោទនភាពក្នុងការធ្វើជាដៃគូអាជីវកម្ម ក៏ដូចជាពាណិជ្ជកម្មជាមួយកម្ពុជា ដើម្បីពង្រីកទំហំពាណិជ្ជកម្មឱ្យកាន់តែធំ និងមានភាពប្រកួតប្រជែង ឈានទៅកាន់ការទទួលបាននូវទីផ្សារថ្មីៗ ជួយគាំទ្រទៅដល់គោលដៅរបស់ប្រទេសកម្ពុជានូវការចាកចេញពីក្រុមប្រទេសដែលមានការអភិវឌ្ឍតិចតួចប្រកបដោយភាពជោគជ័យ។
ឯកឧត្តម សំហេង បូរ៉ា រដ្ឋលេខាធិការក្រសួងពាណិជ្ជកម្ម បានថ្លែងថា កិច្ចខិតខំប្រឹងប្រែងសហការដើម្បីជំរុញការនាំចេញផលិតផលកម្ពុជានាពេលនេះ គឺមានសារៈសំខាន់ណាស់ក្នុងការជំរុញវិស័យកែច្នៃកសិផលរបស់កម្ពុជា ជាពិសេសនៅក្នុងបរិយាកាសពាណិជ្ជកម្មសកល ដែលមិនមានភាពប្រាកដប្រជានាពេលបច្ចុប្បន្ន។ ជាមួយគ្នានេះ ឯកឧត្តម ក៏បានថ្លែងអគុណដល់ការគាំទ្រយ៉ាងខ្លាំងពីរដ្ឋាភិបាលអូស្ត្រាលី ដែលជួយឱ្យកម្ពុជាអាចសម្រេចបាននូវការនាំចេញផ្លែឈើក្រៀមទៅកាន់ទីផ្សារប្រទេសអូស្ត្រាលី។
ឯកឧត្តម សំហេង បូរ៉ា បានគូសបញ្ជាក់ថា ៖ តាមរយៈការប្តេជ្ញាចិត្តពីសំណាក់រាជរដ្ឋាភិបាលកម្ពុជា វិស័យឯកជន និងភាគីពាក់ព័ន្ធសំខាន់ៗផ្សេងទៀត ជឿជាក់ថា ភាពធន់នៃសេដ្ឋកិច្ចរបស់កម្ពុជា នឹងនៅបន្តទៅមុខយូរអង្វែង និងកាន់តែរឹងមាំ។
លោក ឈិន សុផល ប្រធានក្រុមប្រឹក្សាភិបាលនៃក្រុមហ៊ុន រ៉ូយ៉ាល់ ត្រាស់ ត្រេឌីង ខូអិលធីឌី បានថ្លែងថា ការនាំចេញនេះ បានបង្ហាញពីការកើនឡើងនៃសមត្ថភាពរបស់សហគ្រាសក្នុងស្រុក ក្នុងការឆ្លើយតបទៅនឹងតម្រូវការសកលលោក។ ការនាំចេញនាពេលនេះ គឺគ្រាន់តែជាចំណុចចាប់ផ្តើមប៉ុណ្ណោះ ហើយផលិតផលកម្ពុជាជាច្រើនផ្សេងទៀត នឹងអាចមានវត្តមានលើទីផ្សារអូស្ត្រាលី ក៏ដូចជាបណ្តាទីផ្សារលើប្រទេសដទៃទៀតនៅពេលខាងមុខ។
សូមបញ្ជាក់ដែរថា នៅឆ្នាំ២០២៤ ពាណិជ្ជកម្មទ្វេភារវីរវាងកម្ពុជា និងអូស្ត្រាលី ឈានទៅដល់ទំហំទឹកប្រាក់ប្រមាណជា ១.១ពាន់លានដុល្លាសហរដ្ឋអាម៉េរិក ដែលក្នុងនោះ ជាង៧០ភាគរយ នៃទឹកប្រាក់ពាណិជ្ជកម្មសរុប គឺជាការនាំចេញរបស់កម្ពុជា ទៅកាន់ប្រទេសអូស្ត្រាលី៕
Account
Security
Favourite Content