សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ព្រះសីហនុ ៖ យោងតាមរបាយការណ៍របស់រដ្ឋបាលខេត្តព្រះសីហនុ បានឱ្យដឹងថា បច្ចុប្បន្ន នៅក្នុងខេត្តព្រះសីហនុទាំងមូលមានតំបន់សេដ្ឋកិច្ចពិសេសចំនួន១៦ទីតាំង ប៉ុន្តែដំណើរការចំនួន៥ទីតាំង។ ក្នុងតំបន់សេដ្ឋកិច្ចពិសេសនៅខេត្តព្រះសីហនុទាំង៥ទីតាំងនេះ មានរោងចក្រសហគ្រាសកំពុងដំណើរការ និងមានកិច្ចសន្យាជួលចំនួន ២៨៤រោងចក្រ មានទុនវិនិយោគសរុបចំនួន ២,៦៥ពាន់លានដុល្លារអាមេរិក និងបានផ្ដល់កម្លាំងពលកម្មសរុបចំនួន ៤៦ ០១៨នាក់។ ក្រៅពីនេះ នៅក្នុងខេត្តព្រះសីហនុ មានសហគ្រាសធុនតូច មធ្យម និងសិប្បកម្មចំនួន ១ ២៣២ទីតាំងទៀត ដែលមានទុនវិនិយោគសរុបជាង៣០លានដុល្លារអាមេរិក ផ្ដល់កម្លាំងពលកម្មសរុបចំនួន ៦ ១៧២នាក់ផងដែរ ។
ឯកឧត្តម ម៉ាង ស៊ីណេត អភិបាលនៃគណៈអភិបាលខេត្តព្រះសីហនុ បានមានប្រសាសន៍ថា សក្ដានុពលក្នុងខេត្តព្រះសីហនុដែលអាចទាក់ទាញការវិនិយោគពីក្នុង និងក្រៅប្រទេស រួមមាន អាកាសយានដ្ឋានអន្តរជាតិ ផ្លូវជាតិ ផ្លូវល្បឿនលឿនភ្នំពេញ ព្រះសីហនុ ផ្លូវដែក កំពង់ផែសមុទ្រទឹកជ្រៅ ដែលរាជរដ្ឋាភិបាលបាន និងកំពុងសាងសង់ចំណតផែកុងតឺន័រទឹកជ្រៅថ្មី ជំហានទី១ និងគ្រោងសាងសង់ចំណតផែនកុងតឺន័រ ទឹកជ្រៅជំហានទី២ និងជំហានទី៣បន្ថែមទៀត ដែលអនុញ្ញាតឱ្យកំពង់ផែរបស់កម្ពុជាមានសមត្ថភាពទទួលការចូលចតរបស់នាវាដឹកទំនិញលើពិភពលោកស្ទើរតែ១០០ភាគរយ ។
ឯកឧត្តមបន្តថា រាជរដ្ឋាភិបាលបានកំណត់ក្នុងផែនការរៀបចំដែនដី ខេត្តព្រះសីហនុ ចក្ខុវិស័យឆ្នាំ២០៣៨ គឺរៀបចំ និងអភិវឌ្ឍ ខេត្តព្រះសីហនុ ជាទីក្រុងស្នូលនៃប៉ូលសេដ្ឋកិច្ចជាតិ ប្រកបដោយចីរភាព នៅតំបន់ឆ្នេរសមុទ្រកម្ពុជា ក្នុងការជំរុញកំណើនសេដ្ឋកិច្ច អភិវឌ្ឍធុរកិច្ច ពាណិជ្ជកម្ម និងទេសចរណ៍ប្រកបដោយភាពរស់រវើក ឆ្លាត និងបរិយាបន្ន ។ តាមរយៈការអភិវឌ្ឍទីក្រុងទំនើបបៃតងប្រកបដោយភាពច្នៃប្រឌិតរស់រវើក និងបរិស្ថានរស់នៅល្អប្រសើរបំផុត តំបន់សេដ្ឋកិច្ចពិសេសគំរូពហុបំណង មជ្ឈមណ្ឌលហិរញ្ញវត្ថុអន្តរជាតិ និងមជ្ឈមណ្ឌលជាតិ រមណីយដ្ឋានឆ្នេរសមុទ្រ និងកោះដែលស្អាតបំផុតលើសកលលោកសម្រាប់ការស្នាក់នៅ លម្ហែកាយ និងការសំរាកកម្សាន្តរួមទាំងជាមជ្ឈមណ្ឌលគាំទ្រឧស្សាហកម្មផលិតកម្មបែបបច្ចេកវិទ្យាទំនើប នវានុវត្តន៍ ច្រកចេញចូលអន្តរជាតិ និងភស្តុភារកម្មជាតិ ដែលមានទំនាក់ទំនងជាមួយទីផ្សារអាស៊ាន និងសកលលោក នឹងផ្ដល់ការងារយ៉ាងសំបូរបែប ។
ឯកឧត្តម ជា កុកហុង ប្រធានលេខាធិការដ្ឋាន នៃគណៈកម្មាធិការសម្របសម្រួលរៀបចំផែនការមេអភិវឌ្ឍន៍ខេត្តព្រះសីហនុ បានមានប្រសាសន៍ថា នៅក្នុងឆ្នាំ២០២៥ខាងមុខ រាជរដ្ឋាភិបាលនឹងប្រកាសដាក់ឱ្យអនុវត្តនូវផែនការមេអភិវឌ្ឍន៍ខេត្តព្រះសីហនុ ដោយក្នុងផែនការមេនេះ ក្នុងរយៈពេល១៥ឆ្នាំ រំពឹងថាខេត្តព្រះសីហនុ អាចទទួលបានគម្រោងវិនិយោសរុបក្នុងទឹកប្រាក់ប្រមាណ២០ពាន់លានដុល្លារ ធ្វើឱ្យខេត្តតំបន់សមុទ្រមួយនេះ កាន់តែមានសក្ដានុពលទាក់ទាញការវិនិយោគពីបណ្ដាប្រទេសជាច្រើនទៀត ផ្ដល់ប្រាក់ចំណូលដល់ពលរដ្ឋ ជួយជំរុញកំណើនសេដ្ឋកិច្ចខេត្ត និងប្រទេសកម្ពុជាទាំងមូល ៕
Account
Security
Favourite Content