សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ បន្ទាប់ពីរាជរដ្ឋាភិបាលកម្បុជាបានប្រកាសដាក់ឱ្យអនុវត្តន៍នូវកម្មវិធីពិសេសជំរុញការវិនិយោគក្នុងខេត្តភូមិភាគឦសានចាប់តាំងពីអំឡុងខែមេសា ឆ្នាំ២០២៥កន្លងទៅ ឃើញអ្នកវិនិយោគកាន់ចាប់អារម្មណ៍លើការបណ្ដាក់ទុនវិនិយោគ នៅក្នុងខេត្តទាំង៤ក្នុងភូមិភាគឦសានរួមមានខេត្តក្រចេះ ស្ទឹងត្រែង មណ្ឌលគិរី និងរតនគិរី ។
លោកឌុក ពិសិដ្ឋ ម្ចាស់ចម្ការកាហ្វេនិងផ្ទះស្នាក់ PDA FARM ក្នុងខេត្តមណ្ឌលគិរី បានមានប្រសាសន៍ឱ្យដឹងថា ចាប់តាំងពីរាជរដ្ឋាភិបាលបានប្រកាសអនុវត្តន៍កម្មវិធីពិសេសជំរុញការវិនិយោគខេត្តទាំង៤ក្នុងភូមិភាគឦសាន ឃើញទាំងមន្ត្រីថ្នាក់ជាតិ និងមន្ត្រីថ្នាក់ខេត្តបានយកចិត្តទុកដាក់និងចុះពិនិត្យមើលការវិនិយោគរបស់វិនិយោគិនក្នុងនិងក្រៅប្រទេសនៅក្នុងខេត្តមណ្ឌលគិរីជាបន្តបន្ទាប់ ហើយក្នុងនាមជាម្ចាស់កសិកដ្ឋាននិងផ្ទះស្នាក់នៅខេត្តមណ្ឌលគិរី ក៏មានក្ដីសប្បាយរីករាយ ជាមួយកម្មវិធីជំរុញការវិនិយោគនេះ ពីព្រោះតាមអ្វីដែលបានដឹង កម្មវិធីនេះ បានលើកទឹកចិត្តដល់បណ្ដាវិនិយោគិននានាមកកាន់ខេត្តទាំង៤នៅភូមិភាគឦសានដូចជាផ្នែកពន្ធ ជាក់ស្ដែងរូបលោកផ្ទាល់ គឺរដ្ឋបានលើកលែងពន្ធលើការកែច្នៃកាហ្វេរហូតដល់ ១២ឆ្នាំ ។
លោកបន្តថា ក្នុងនាមជាអ្នកវិនិយោគនៅក្នុងតំបន់ភូមិភាគឦសាននិងកំពុងទទួលបានអត្ថប្រយោជន៍ពីកម្មវិធីពិសេសជំរុញការវិនិយោគរបស់រាជរដ្ឋាភិបាល លោកនឹងផ្សព្វផ្សាយនិងចែករំលែកទៅកាន់វិនិយោគិន ធុរជននានាឱ្យបានដឹង និងចូលមកវិនិយោគនៅក្នុងខេត្តមណ្ឌលគិរី ក៏ដូចជាខេត្ត៣ផ្សេងទៀតក្នុងភូមិភាគឦសាន ដើម្បីទទួលបានឱកាសក្នុងការអនុគ្រោះពីរាជរដ្ឋាភិបាល ។
យោងតាមរបាយការណ៍របស់ក្រុមការងារជំរុញការវិនិយោគខេត្តទាំង៤ នៅភូមិភាគឦសាន បានបង្ហាញថា ចាប់តាំងពីកម្មវិធីពិសេសនេះបានដាក់ឱ្យអនុវត្ត មានក្រុមហ៊ុន និងគម្រោងវិនិយោគជាច្រើនបានដាក់ស្នើសុំការលើកលែងនិងអនុគ្រោះដើម្បីដំណើរការវិនិយោគនៅក្នុងខេត្តទាំង៤នោះ ហើយក៏មានគម្រោងជាច្រើនដែរ ត្រូវបានក្រុមការងារជំរុញការវិនិយោគអនុម័តជាផ្លូវការ ជាក់ស្ដែងកាលពីពេលថ្មីៗនេះ គម្រោងវិនិយោគចំនួន២២ ក្រោមទុនវិនិយោគប្រមាណ៤០០លានដុល្លារអាម៉េរិក បានដាក់ស្នើសុំលើកទឹកចិត្តពិសេសពីរាជរដ្ឋាភិបាល ដើម្បីដំណើរការវិនិយោគនៅភូមិភាគឦសាន ហើយក្រុមការងារក៏បានលើកយកមកពិនិត្យពិភាក្សាដើម្បីអនុម័តជាផ្លូវការ ។
ដោយឡែកកាលពី ពាក់កណ្ដាលខែមករា ឆ្នាំ ២០២៦នេះដែរ ក្រុមការងារជំរុញការវិនិយោគក្នុងភូមិភាគឦសាន ក៏បានប្រជុំពិភាក្សាលើការអនុវត្តគោលការណ៍លើកទឹកចិត្តពិសេស ការអនុគ្រោះ និង ការសម្របសម្រួលនីតិវិធី លើគម្រោង ចំនួន ៤ នៅខេត្តក្រចេះ និង ខេត្តរតនគិរី ជាមួយនឹងទុនវិនិយោគសរុប ៣៥៥លានដុល្លារអាម៉េរិក ដែលអាចបង្កើតការងារបានរហូតដល់១២ ៣០០កន្លែង ។
លោកបណ្ឌិតអ៊ិន ចាន់នីប្រធាននាយកប្រតិបត្តិធនាគារអេស៊ីលីដា ភីអិលស៊ី ក៏បានមានប្រសាសន៍ថា ដើម្បីគាំទ្រដល់អាជីវកម្មរបស់អាជីវករនៅក្នុងខេត្តភូមិភាគឦសាន ធនាគារអេស៊ីលីដា បានពង្រីកប្រតិបត្តិការនិងសេវារបស់ខ្លួន តាំងពីយូរមកហើយ ហើយក៏បានឃើញថាឱកាសនៃការធ្វើអាជីវកម្មនៅតំបន់ភូមិភាគឦសានក៏មានច្រើនដែរ ។
លោកបណ្ឌិតបន្តថា រាជរដ្ឋាភិបាលបានលើកទឹកចិត្តនិងជំរុញការវិនិយោគនៅខេត្តភូមិភាគឦសាន ដោយបានសាងសង់ហេដ្ឋារចនាសម្ព័ន្ធ ដូចជាផ្លូវ ភ្លើង និងទឹក ហើយសម្រាប់ធនាគារអេស៊ីលីដា ភីអិលស៊ី ក៏បានគាំទ្រតាមរយៈការអនុវត្តតាមប្រកាសរបស់ធនាគារជាតិនៃកម្ពុជា ។ អ្វីដែលពិសេសធនាគារក៏បានពង្រីកសេវាទូទាត់តាមអេឡិចត្រូនិកមកកាន់តំបន់ភូមិភាគឦសានក៏ដូចជាតំបន់ផ្សេងទៀត ដើម្បីសម្រួលដល់ការទូទាត់របស់ពលរដ្ឋ អាជីវករ ធុរជន និងវិនិយោគិនផងដែរ ៕
Account
Security
Favourite Content