ភ្នំពេញ ៖ យោងតាមរបាយការណ៍របស់អគ្គនាយកដ្ឋានគយ និងរដ្ឋាករកម្ពុជា (GDCE)​ បានឱ្យដឹងថា រយៈពេល៧ខែ គិតចាប់ពីខែមករា ដល់ខែកក្កដា ឆ្នាំ២០២៥ ពាណិជ្ជកម្មទ្វេភាគីរវាងកម្ពុជា-អាម៉េរិក សម្រេច​បាន​ជាង ៧,១ ពាន់លានដុល្លារ កើនឡើង ២៥,៨% ធៀបនឹងរយៈពេលដូចគ្នាកាលពីឆ្នាំមុន ដោយក្នុងនោះ ​កម្ពុជានាំទំនិញចេញទៅអាម៉េរិកមានទំហំទឹកប្រាក់ជាង ៦,៩២ ពាន់លានដុល្លារ កើន ២៥,៧% ធៀបនឹងរយៈពេលដូចគ្នាកាលពីឆ្នាំ២០២៤ ដែលមានប្រមាណ ៥ ៥១១លានដុល្លារ ។ ចំណែកអាម៉េរិក បាននាំចូលមកវិញមានទឹកប្រាក់ ២០១ លានដុល្លារ កើនឡើង ៣០,៨% បើធៀបនឹងរយៈពេលដូចគ្នា កាលពីឆ្នាំ២០២៤ ដែលមានប្រមាណ១៥៤លានដុល្លារប៉ុណ្ណោះ។

មុខទំនិញដែលកម្ពុជានាំចេញទៅអាម៉េរិក ភាគច្រើនមានដូចជា សម្លៀកបំពាក់ សម្ភារសម្រាប់ការធ្វើដំណើរ (វ៉ាលី កាបូប) កង់ គ្រឿងបង្គុំ និងសម្ភារប្រើប្រាស់មួយចំនួនទៀត។ ចំណែកកម្ពុជា នាំចូលពីអាម៉េរិកវិញ មានដូចជា រថយន្ត គ្រឿងយន្ត គ្រឿងអលង្ការ គ្រឿងសំអាង សម្ភារអគ្គិសនី អេឡិចត្រូនិក និងសម្ភារប្រើប្រាស់មួយចំនួនទៀត។

ឯកឧត្តម ឧបនាយករដ្ឋមន្ត្រី ស៊ុន ចាន់ថុល អនុប្រធានទី១ក្រុមប្រឹក្សាអភិវឌ្ឍន៍កម្ពុជា បានមាន​ប្រ​សា​សន៍ថា កាលពីថ្ងៃទី០១ ខែសីហា សហរដ្ឋអាម៉េរិកទើបតែសម្រេចយកពន្ធ​លើទំនិញរបស់កម្ពុជា​ ក្នុងអត្រា ១៩% ដែលអត្រានេះនឹងធ្វើឱ្យកម្ពុជា​មានលទ្ធភាព​ប្រកួត​ប្រជែង​ជា​មួយ​ប្រទេសជិតខាង និងថែរក្សារោងចក្រដែលមានស្រាប់ ​ព្រមទាំង​ទាក់ទាញ​ការវិនិ​យោគ​ថ្មីៗកាន់តែ​ច្រើនបន្ថែមទៀត។

ឯកឧត្តម ឧបនាយករដ្ឋមន្ត្រីបានបញ្ជាក់ថា៖

«កម្ពុជានឹងខិតខំ​ចរចាបន្ថែម​ទៀតជា​មួយ​អាម៉េរិកលើវិស័យអាទិ​ភាព ​ដូចជា វិស័យកាត់ដេរ សម្លៀកបំពាក់ ស្បែកជើង ដោយ​ប្រភេទទំនិញនេះ មិនមានផលិតនៅអាម៉េរិកទេ ដូច្នេះ ​គ្មាន​អ្វីប្រកួតប្រជែងជាមួយក្រុមហ៊ុននៅអាម៉េរិកនោះទេ ។​ យើងខ្ញុំ​នឹងខិត​ខំចរ​ចាធ្វើយ៉ាងណាឱ្យទាបជាង ១៩%»។

សូមជម្រាបថា ដោយការខិតខំប្រឹងប្រែងរបស់រាជរដ្ឋាភិបាលក្រោមការដឹកនាំរបស់សម្តេចបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ធ្វើឱ្យការចរចាពន្ធបដិកាជាមួយសហរដ្ឋអាម៉េរិកសម្រេចបានលទ្ធផលល្អ ដោយលោក ដូណាល់ ត្រាំ ប្រធានាធិបតីអាម៉េរិក បានសម្រេចទម្លាក់អត្រាពន្ធបដិកាសម្រាប់ការនាំចូលទំនិញពីកម្ពុជាពី ៤៩% មកនៅ ១៩%ប៉ុណ្ណោះ ខណៈកម្ពុជាទម្លាក់ពន្ធគយលើទំនិញអាម៉េរិកដល់ ០% ដែលចាប់អនុវត្តន៍ចាប់ថ្ងៃទី១ ខែសីហា ឆ្នាំ២០២៥តទៅ។

សូមជម្រាបដា ចំពោះយានយន្តផលិតនៅសហរដ្ឋអាម៉េរិក និងនាំចូលពីសហរដ្ឋអាម៉េរិក ដែលអាចទទួលបាននូវអត្រាពន្ធគយ ០% គឺសំដៅលើយានយន្តដែលប្រើប្រាស់មិនលើសពី៥ ០០០ គីឡូម៉ែត្រ និងមានឆ្នាំម៉ូដែលមិនលើសពី ១ឆ្នាំ មុនឆ្នាំចរន្ត និងជារថយន្តមូល មិនបុក មិនប៉ះ។

-ទំនិញដែលអាចទទួលបានអត្រាពន្ធគយ ០% នេះ ជាទំនិញនាំចូលមកព្រះរាជាណាចក្រកម្ពុជា ដែលបានផ្ទុកចូលក្នុងមធ្យោបាយដឹកជញ្ជូននៅសហរដ្ឋអាម៉េរិក ចាប់ពីថ្ងៃទី៨ ខែសីហា ឆ្នាំ២០២៥ តទៅ។

-ការអនុវត្តអត្រាពន្ធគយ ០% នេះពុំតម្រូវឱ្យមានវិញ្ញាបនបត្របញ្ជាក់ដើមកំណើតពីសហរដ្ឋអាម៉េរិកឡើយ ដោយគ្រាន់តែតម្រូវឱ្យអ្នកនាំចូលធ្វើការប្រកាសដើមកំណើតទំនិញតាមទម្រង់ និងនីតិវិធីដែលកំណត់ដោយអគ្គនាយកដ្ឋានគយ និងរដ្ឋាករកម្ពុជា៕