សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ចាប់តាំងពីរាជរដ្ឋាភិបាលបានប្រកាសដាក់ឱ្យអនុវត្តកម្មវិធីពិសេសជំរុញការវិនិយោគខេត្តព្រះសីហនុ នាដើមឆ្នាំ២០២៤ រហូតដល់ចុងឆ្នាំ២០២៥នេះ ក្រុមការងារជំរុញការវិនិយោគនៃកម្មវិធីពិសេសនេះ ទទួលបានគម្រោងវិនិយោគប្រមាណជាង៤០០គម្រោង ក្រោមទុនវិនិយោគសរុបប្រមាណជាង៨០០លានដុល្លារអាម៉េរិក ។
នៅក្នុងកិច្ចប្រជុំពិភាក្សាជាមួយនឹងគណៈប្រតិភូរដ្ឋបាលខេត្តមណ្ឌលគិរី កាលពីថ្ងៃទី២០ ខែវិច្ឆិកា ឆ្នាំ២០២៥ ឯកឧត្តមបណ្ឌិតសភាចារ្យ ហ៊ាន សាហ៊ីប រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ បានចែករំលែកបទពិសោធន៍ និងទិដ្ឋភាពសំខាន់នៃការអនុវត្តកម្មវិធីពិសេសជំរុញការវិនិយោគក្នុងខេត្តព្រះសីហនុឆ្នាំ២០២៤ ដោយក្នុងរយៈពេលជិត២ឆ្នាំកន្លងមកនេះ ក្រុមការងារជំរុញការវិនិយោគកម្មវិធីនេះ ទទួលបានលទ្ធផលល្អប្រសើរ។
គួររំលឹកថា ដោយសារតែទទួលបានភាពជោគជ័យនៃការអនុវត្តកម្មវិធីពិសេសជំរុញការវិនិយោគនៅខេត្តព្រះសីហនុនេះហើយ ទើបរាជរដ្ឋាភិបាលបានប្រកាសដាក់ឱ្យអនុវត្តកម្មវិធីពិសេសជំរុញការវិនិយោគនៅខេត្តទាំងបួនក្នុងភូមិឦសានកាលពីអំឡុងខែមេសា ឆ្នាំ២០២៥កន្លងទៅនេះ ដើម្បីទាក់ទាញគម្រោងវិនិយោគនានាទៅកាន់ខេត្តទាំងបួនក្នុងភូមិភាគឦសាន ហើយជាលទ្ធផលក៏ឃើញថាមានវិនិយោគិនក្នុង និងក្រៅប្រទេសបានចូលទៅកាន់ខេត្តទាំងនោះដើម្បីសិក្សា និងស្វែងរកឱកាសវិនិយោគលើវិស័យសក្ដានុពលនានា ។
នៅក្នុងកិច្ចប្រជុំកាលពីថ្ងៃទី២០ ខែវិច្ឆិកា ឆ្នាំ២០២៥ ឯកឧត្តមបណ្ឌិតសភាចារ្យ បានថ្លែងថា ការអនុវត្តកម្មវិធីពិសេសជំរុញការវិនិយោគក្នុងខេត្តទាំង៤នៅភូមិឦសាន គឺផ្ដោតលើការជំរុញការប្រើប្រាស់ដីកសិកម្ម និងកសិ-ឧស្សាហកម្ម ឱ្យអស់សក្ដានុពល ការជំរុញការកែច្នៃផលិតផល សេវាកម្មទេសចរណ៍ ដែលការណ៍នេះ អាជ្ញាធរខេត្តមណ្ឌលគិរី មានតួនាទី ភារកិច្ចយ៉ាងសំខាន់ក្នុងការចូលរួមអនុវត្តកម្មវិធីនេះ ។
ឯកឧត្តមបណ្ឌិតបានបញ្ជាក់ថា ក្រោយពីមានព្រឹត្តិការណ៍នៅតាមព្រំដែនជាមួយប្រទេសជិតខាង ធ្វើឱ្យមានផលប៉ះពាល់ដល់ខ្សែច្រវាក់ផ្គត់ផ្គង់ និងផលិតកម្មរំហូរការងារ និងតម្រូវការលើផលិតផលប្រើប្រាស់ ព្រមទាំងរំហូរពាណិជ្ជកម្មទាំងការនាំចេញ និងការនាំចូល ជាពិសេសវត្ថុធាតុដើម សម្រាប់បម្រើដល់សកម្មភាពផលិតកម្មក្នុងស្រុក និងនិន្នាការប្រើប្រាស់ផលិតផលក្នុងស្រុកជំនួសវិញ ។ ដូច្នេះ ការវិនិយោគលើការផលិតផលនូវផលិតផលសម្រាប់បំពេញបន្ថែមនៅក្នុងប្រទេសកម្ពុជាពិតជាមានសារសំខាន់ណាស់ និងអាចលើកកម្ពស់សេដ្ឋកិច្ចកម្ពុជាបានមួយកម្រិតថែមទៀតផង ។
យោងតាមលេខាដ្ឋាននៃក្រុមការងារជំរុញការវិនិយោគក្នុងភូមិភាគឦសានបានបង្ហាញឱ្យឃើញថា ចាប់តាំងពីរាជរដ្ឋាភិបាលប្រកាសឱ្យអនុវត្តន៍កម្មវិធីពិសេសជំរុញការវិនិយោគភូមិភាគឦសាន មានក្រុមហ៊ុន និងគម្រោងវិនិយោគជាច្រើនបានសិក្សាស្វែងរកការវិនិយោគ ដើម្បីទទួលបានការលើកទឹកចិត្តពិសេសពីរាជរដ្ឋាភិបាល ក្នុងនោះឃើញថាមានគម្រោងធំៗមួយចំនួនកំពុងត្រៀមដំណើរការក្នុងវិស័យកសិកម្ម កសិ-ឧស្សាហកម្ម និងគម្រោងកំពង់ផែពហុបំណងជាដើម ។
ឯកឧត្តម វ៉ា ថន អភិបាលខេត្តក្រចេះ ដែលជាខេត្តមួយក្នុងចំណោមខេត្តទាំងបួនក្នុងតំបន់ភូមិភាគឦសានបានថ្លែងឱ្យដឹងថា កាលពីពេលថ្មីៗនេះ មានវិនិយោគិន និងធុរជនជាច្រើនចូលមកស្វែងរកការវិនិយោគ ហើយក៏មានគម្រោងវិនិយោគមួយចំនួនទៀតដែលផ្អាកដំណើរការចាប់ផ្ដើមដំណើរការឡើងវិញ ក្នុងពេលមានការលើកទឹកចិត្តពីរាជរដ្ឋាភិបាល ៕
Account
Security
Favourite Content