សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ នាថ្ងៃទី២១ខែវិច្ឆិកា បានទទួលជួបលោកស្រី Anna Nesterova ប្រធានសម្ព័ន្ធធុរកិច្ចស្ត្រីនៃកិច្ចសហប្រតិបត្តិការ BRICS ប្រចាំប្រទេសរុស្ស៊ី ដើម្បីពិភាក្សាកិច្ចសហប្រតិបត្តិការកាន់តែស៊ីជម្រៅ ក្នុងការអភិវឌ្ឍសហគ្រិនភាពស្រ្តី និងនវានុវត្តន៍ធុរកិច្ច។
ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានលើកឡើងថា សហគ្រិនភាពស្ត្រីមានសារៈសំខាន់ណាស់ក្នុងការរួមចំណែកកសាងសេដ្ឋកិច្ចដែលមានភាពធន់ បរិយាបន្ន និងត្រៀមលក្ខណៈសមស្របសម្រាប់អនាគត។
ជាមួយគ្នានេះ ឯកឧត្តមក៏បានស្វាគមន៍សម្ព័ន្ធធុរកិច្ចស្ត្រីនេះ ដែលបានគាំទ្របណ្តាញសហគ្រិនស្រ្តីអាស៊ាន (AWEN) និងការស្វែងរកភាពជាដៃគូបន្ថែមជាមួយកម្ពុជា។
លោកស្រី Nesterova បានកោតសរសើរចំពោះការអភិវឌ្ឍយ៉ាងឆាប់រហ័ស និងភាពស្រស់ស្អាតរបស់ប្រទេសកម្ពុជា ព្រមទាំងបានជម្រាបជូនអំពីកិច្ចប្រជុំរបស់លោកស្រីជាមួយភាគីពាក់ព័ន្ធក្នុងវិស័យទេសចរណ៍។ សម្ព័ន្ធធុរកិច្ចស្ត្រីនៃកិច្ចសហប្រតិបត្តិការ BRICS គឺជាវេទិកាមិនមែននយោបាយ ដែលផ្តោតលើឧស្សាហកម្មច្នៃប្រឌិត (creative industries) ទេសចរណ៍ កសិកម្ម ហិរញ្ញវត្ថុ បច្ចេកវិទ្យា និងវិទ្យាសាស្ត្រ។
លោកស្រីក៏បានជម្រាបជូនអំពីគំនិតផ្តួចផ្តើមសំខាន់ៗរបស់សម្ព័ន្ធធុរកិច្ចស្ត្រីនេះ ដូចជាកិច្ចប្រជុំកំពូលសម្ព័ន្ធធុរកិច្ចស្ត្រីប្រចាំឆ្នាំ កម្មវិធីប្រកួតប្រជែងធុរកិច្ចបង្កើតថ្មីដឹកនាំដោយស្ត្រី ផែនការបង្កើតមូលនិធិ ធុរកិច្ចស្ត្រី និងការពង្រីកការិយាល័យរបស់ខ្លួននៅទូទាំងតំបន់អាស៊ាន រួមទាំងកម្ពុជាផងដែរ។
សូមបញ្ជាក់ថា BRICS គឺជាកិច្ចសហប្រតិបត្តិការអន្តររដ្ឋាភិបាលនៃបណ្តាប្រទេសដែលមានសេដ្ឋកិច្ចកំពុងរីកចម្រើនធំៗ ដូចជាប្រទេសប្រេស៊ីល រុស្ស៊ី ឥណ្ឌា ចិន និងអាហ្វ្រិកខាងត្បូង ហើយក្រោយមក បានពង្រីកសមាជិកភាពដោយរួមបញ្ចូលប្រទេសដៃគូថ្មីៗ។ កិច្ចសហប្រតិបត្តិការនេះមានគោលដៅលើកកម្ពស់ការធ្វើពាណិជ្ជកម្ម វិនិយោគ នវានុវត្តន៍ និងការអភិវឌ្ឍប្រកបដោយបរិយាបន្ន ក្នុងចំណោមបណ្តាប្រទេសជាសមាជិក និងប្រទេសដៃគូនានារបស់ខ្លួន៕
Account
Security
Favourite Content