សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ២០២៥ ជាឆ្នាំ ដែលកម្ពុជាទទួលបានគម្រោងវិនិយោគចុះបញ្ជី វិនិយោគនៅកម្ពុជាច្រើន ជាក់ស្ដែង គ្រាន់តែរយៈពេល៧ខែ គម្រោងវិនិយោគដែលបានស្នើសុំចុះបញ្ជី និងអនុម័តជាផ្លូវការមានរហូតដល់ទៅ៤៤០គម្រោងដែលមានចំនួនច្រើនជាងឆ្នាំ២០២៤ពេញមួយឆ្នាំទៅហើយ ។ នេះបើតាមមរបាយការណ៍របស់ក្រុមប្រឹក្សាអភិវឌ្ឍន៍កម្ពុជា ចេញផ្សាយនៅល្ងាចថ្ងៃទី១១ ខែសីហា ឆ្នាំ២០២៥ ។
យោងតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជាបានបង្ហាញផងដែរថា ក្នុងចំណោមគម្រោងវិនិយោគទាំង៤៤០គម្រោងដែលបានអនុម័តនោះមានទុនវិនិយោគប្រមាណ៦,៧ពាន់លានដុល្លារអាមេរិកបង្កើតការងារបានប្រមាណ ៣១២ពាន់កន្លែង ដោយផ្ដោតលើវិស័យសំខាន់ៗដូចជា កសិកម្ម កសិ-ឧស្សាហកម្ម វិស័យហេដ្ឋារចនាសម្ព័ន្ធ វិស័យទេសចរណ៍ និងវិស័យឧស្សាហកម្មជាដើម។
បើតាមរបាយការណ៍ក៏បានបង្ហាញថា វិស័យឧស្សាហកម្មមានទឹកប្រាក់វិនិយោគច្រើនជាងគេដែលមានរហូតដល់ទៅ ៤,៧ពាន់លានដុល្លារអាមេរិក វិស័យហេដ្ឋារចនាសម្ព័ន្ធ និងផ្សេងៗមានទឹកប្រាក់១,៥ពាន់លានដុល្លារអាមេរិក វិស័យកសិកម្ម និងកសិ-ឧស្សាហកម្មមានទឹកប្រាក់វិនិយោគ៣៥៦លានដុល្លារអាមេរិក និងវិស័យ ទេសចរណ៍ មានទឹកប្រាក់វិនិយោគ ប្រមាណ១៦៧លានដុល្លារអាមេរិក ។
សម្រាប់ប្រភពទុនវិនិយោគ ដែលបានចុះបញ្ជីវិនិយោគនៅកម្ពុជារយៈពេល៧ខែកន្លងមកនេះ ឃើញថាប្រភពទុនវិនិយោគមកពីចិនមានទំហំធំជាងគេដែលមានរហូតដល់ទៅ ៥៣,៦៦ភាគរយនៃទំហំទុនវិនិយោគសរុប បន្ទាប់មកកម្ពុជា មានប្រមាណ២៩,៩៧ភាគរយ ប្រទេសសិង្ហបុរី មាន៧,១ភាគរយ និងវៀតណាមមាន៥,៩៥ភាគរយ ។
ក្នុងរយៈពេល៧ខែដើមឆ្នាំ២០២៥នេះដែរ ខេត្តដែលទាក់ទាញគម្រោងវិនិយោគបានច្រើនជាងគេ គឺខេត្តកំពង់ស្ពឺ ដែលមានចំនួនរហូតដល់ ១០៤គម្រោង បន្ទាន់គឺខេត្តស្វាយរៀង មានចំនួន ១០២គម្រោង រាជធានីភ្នំពេញ ទទួលបានគម្រោង៥១គម្រោង ខេត្តតាកែវ ទទួលបាន៤៤គម្រោង ខេត្តកោះកុង៤១គម្រោង ព្រះសីហនុទទួលបាន ៣៥គម្រោង និងខេត្តកណ្ដាលមានចំនួន ៣៣គម្រោង ។
ឯកឧត្តមស៊ុន ចាន់ថុល ឧបនាយករដ្ឋមន្ត្រីនិងជាអនុប្រធានទី ១ ក្រុមប្រឹក្សាអភិវឌ្ឍន៍កម្ពុជាបានថ្លែងថា លទ្ធផលនៃការទទួលបានគម្រោងវិនិយោគក្នុងឆ្នាំ ២០២៥ដែលមានចំនួនច្រើននេះ គឺជាលទ្ធផលនៃការទាក់ម៉ូយរបស់ថ្នាក់ដឹកនាំនៃរាជរដ្ឋាភិបាលកម្ពុជានាពេលកន្លងមក ដែលបានធ្វើបេសកកម្មទៅកាន់បណ្ដាប្រទេសនានា ដើម្បីឱ្យវិនិយោគិនទាំងនោះចូលមកបណ្ដាក់ទុនវិនិយោគនៅកម្ពុជា
ឯកឧត្តមក៏ បានបង្ហាញពីសក្ដានុពលវិនិយោគបន្ថែមដើម្បីទាក់ទាញការវិនិយោគពីបរទេសក៏ដូចជាវិនិយោគិនក្នុងស្រុក ដោយបានលើកឡើងអំពី ហេដ្ឋារចនាសម្ព័ន្ធៗ រួមមានផ្លូវល្បឿនលឿន គម្រោងព្រែកជីកហ្វូណនតេជោ អាកាសយានដ្ឋានអន្តរជាតិតេជោ ដែលជាផ្លូវដឹកជញ្ជូនដ៏សំខាន់ សម្រាប់សម្រួលដល់វិនិយោគិន ។
លោក ឡុង ឌីម៉ង់ អភិបាលរងខេត្តព្រះសីហនុ ក៏បានលើកឡើងពីគម្រោងពង្រីកកំពង់ផែស្វយ័តក្រុងព្រះសីហនុ ដែលនឹងពង្រីកពី ជម្រៅទឹកឱ្យបានដល់ ១៧,៥ម៉ែត្រ នៅឆ្នាំ២០៣០ ដោយអាចអនុញ្ញាតឱ្យនាវាតូចធំ នៅក្នុងតំបន់អាស៊ីប៉ាស៊ីហ្វិកចូលចតបានស្ទើរតែទាំងអស់ ដោយមិនចាំបាច់ផ្ទេរពីកំពង់ផែប្រទេសផ្សេងទៀតឡើយ ហើយនឹងធ្វើឱ្យតម្លៃដឹកជញ្ជូនតាមផ្លូវទឹករបស់កម្ពុជាមានតម្លៃទាបជាងមុន ធ្វើឱ្យវិនិយោគិនកាន់តែចាប់អារម្មណ៍លើការវិនិយោគនៅកម្ពុជាជាពិសេសនៅក្រុងព្រះសីហនុផ្ទាល់តែម្ដង ៕
Account
Security
Favourite Content