សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ត្រឹមរយៈពេលតែ៦ខែប៉ុណ្ណោះ វិនិយោគិនចិនបានយកលុយមកបណ្ដាក់ទុនវិនិយោគនៅក្នុងប្រទេសកម្ពុជាសរុបចំនួនជាង ៣,២ពាន់លានដុល្លារអាម៉េរិក និងបានក្លាយជាវិនិយោគិនដែលបានដាក់ទុនច្រើនជាងគេនៅកម្ពុជាក្នុងរយៈពេល៦ខែមកនេះ ។ នេះបើតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជា (CDC) ។
របាយការណ៍ដដែលបានបង្ហាញថា ក្នុងរយៈពេល៦ខែ កម្ពុជាទទួលបានទឹកប្រាក់ចុះបញ្ជីវិនិយោគលើគម្រោងចំនួន ៣៧៣ ស្មើនឹងទុនសរុបប្រមាណ ៥,៨ពាន់លានដុល្លារអាម៉េរិក ក្នុងនោះ វិនិយោគិនចិនបានដាក់ទុនវិនិយោគច្រើនជាងគេដែលមានចំណែករហូតដល់ ៥៦,២៣ភាគរយ ឬប្រមាណ ៣,២ពាន់លានដុល្លារអាម៉េរិក ។
គម្រោងធំៗដែលវិនិយោគិនចិនបានបោះទុនវិនិយោគនៅក្នុងប្រទេសកម្ពុជារយៈពេល៦ខែមកនេះ រួមមានគម្រោងអភិវឌ្ឍន៍វិស័យថាមពលអគ្គិសនី គម្រោងរោងចក្រ ឧស្សាហកម្ម ដូចជាគម្រោងបង្កើតរោងចក្រផលិតសំបកកង់ឡាន និងគម្រោងបង្កើតរោងចក្រដំឡើងរថយន្តអគ្គិសនីជាដើម ។
ឯកឧត្តម ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ ក្រុមប្រឹក្សាអភិវឌ្ឍន៍កម្ពុជាបានថ្លែងថា ក្នុងឆ្នាំ២០២៥នេះ កម្ពុជាទាក់ទាញបាននូវគម្រោងវិនិយោគច្រើនជាងឆ្នាំ២០២៤កន្លងទៅ ដោយគ្រាន់តែរយៈពេល៦ខែ មានរហូតដល់ ៣៧៣គម្រោង មានទឹកប្រាក់ដល់ ៥,៨ពាន់លានដុល្លារអាម៉េរិក ។ ដោយឡែក នៅក្នុងសប្ដាហ៍ទី១ នៃខែកក្កដា ឆ្នាំ២០២៥នេះ ក្រុមប្រឹក្សាអភិវឌ្ឍន៍កម្ពុជា បានអនុម័តគម្រោងបន្ថែមធ្វើឱ្យទឹកប្រាក់ចុះបញ្ជីវិនិយោគនៅក្នុងប្រទេសកម្ពុជាមានរហូតដល់ជាង ៦ពាន់លានដុល្លារអាម៉េរិក ។
ឯកឧត្តមបានបញ្ជាក់ថា គ្រាន់តែរយៈពេល៦ខែដើមឆ្នាំ២០២៥នេះ ទាំងចំនួនគម្រោងវិនិយោគ និងទឹកប្រាក់ចុះបញ្ជីវិនិយោគ វាប្រហាក់ប្រហែល ឬលើសនឹងចំនួនគម្រោងវិនិយោគ និងទឹកប្រាក់ចុះបញ្ជីវិនិយោគក្នុងឆ្នាំ២០២៤ទាំងមូលទៅហើយ ដូច្នេះទម្រាំដាច់ឆ្នាំ២០២៥ កម្ពុជាអាចនឹងទទួលបានគម្រោងវិនិយោគ និងទឹកប្រាក់វិនិយោគច្រើន ហើយនៅពេលគម្រោងវិនិយោគទាំងនោះចាប់ផ្ដើមដំណើរការនឹងបង្កើតការងារជូនប្រជាពលរដ្ឋកម្ពុជាបានរាប់សិបម៉ឺននាក់ផងដែរ ។
ទាក់ទងនឹងគម្រោងវិនិយោគរបស់វិនិយោគិនចិន ក្នុងរយៈពេលចុងក្រោយនេះ ថ្នាក់ដឹកនាំនៃប្រទេសចិនបានមកបំពេញទស្សនកិច្ចផ្លូវរដ្ឋ និងផ្លូវការជាបន្តបន្ទាប់ ហើយថែមទាំងបានសន្យាថា នឹងជំរុញវិនិយោគិនរបស់ខ្លួនមកបណ្ដាក់ទុនវិនិយោគបន្ថែមទៀត ជាពិសេសចិនបានបង្កើតតំបន់សេដ្ឋកិច្ចពិសេសជាច្រើនកន្លែង ដើម្បីទាក់ទាញគម្រោងវិនិយោគរបស់ចិនមកបណ្ដាក់ទុននៅក្នុងតំបន់សេដ្ឋកិច្ចពិសេសទាំងនោះ ។
បើតាមការបញ្ជាក់ពីអភិបាលខេត្តជាំងស៊ូ ក្នុងដំណើរទស្សនកិច្ចក្នុងប្រទេសកម្ពុជានាពេលថ្មីៗនេះបានប្ដេជ្ញាក្នុងការជំរុញវិនិយោគិនចិនមកបណ្ដាក់ទុនវិនិយោគនៅកម្ពុជាបន្ថែម ដោយក្នុងនោះ តំបន់សេដ្ឋកិច្ចពិសេសក្រុងព្រះសីហនុ គឺជាគម្រោងវិនិយោគរបស់ចិន ដែលអាចទាក់ទាញសហគ្រាសចិនមកបណ្ដាក់ទុនវិនិយោគបន្ថែមទៀត ។
ទន្ទឹមនឹងនេះដែរ ដើម្បីទាក់ទាញវិនិយោគិនចិនមកបណ្ដាក់ទុនវិនិយោគបន្ថែមនៅកម្ពុជា វិនិយោគិននឹងបង្កើតតំបន់សេដ្ឋកិច្ចពិសេសចិនបន្ថែមចំនួនពីរកន្លែងទៀត ដែលតំបន់សេដ្ឋកិច្ចពិសេសបានផ្ដល់នូវអត្ថប្រយោជន៍ច្រើន ជាពិសេសជួយសម្រួលនីតិវិធីក្នុងការបណ្ដាក់ទុនវិនិយោគបានកាន់តែងាយស្រួល៕
Account
Security
Favourite Content