កំពត៖ នៅឆ្នាំ២០១៧ អ្នកឧកញ៉ាបណ្ឌិត សុខ គង់ បានសម្រេចបោះទុនជាច្រើនលានដុល្លារវិនិយោគលើវិស័យកសិកម្មទំនើបនៅលើភ្នំបូគោ ដើម្បីបង្កើតកសិដ្ឋានបន្លែសុវត្ថិភាពដ៏ធំមួយ មិនប្រើប្រាស់ថ្នាំពុលកសិកម្មគ្រប់ប្រភេទ សម្រាប់ផ្គត់ផ្គង់ជូនសណ្ឋាគារទាំង៥របស់ក្រុមហ៊ុនសុខាអូតែល និងផ្គត់ផ្គង់ជូនអតិថិជនដែលត្រូវការបរិភោគបន្លែសុវត្ថិភាព។

ក្រុមហ៊ុនបានកសាង Greenhouse លើផ្ទៃដីជាច្រើនហិកតា ដែលធំជាងគេនៅកម្ពុជា និងនាំចេញទៅកាន់ទីផ្សារបានជាង១០តោនក្នុងមួយសប្តាហ៍ ហើយការដាំដុះបន្លែនេះគឺគោរពទាំងស្រុងនូវស្តង់ដារនៃការអនុវត្តកសិកម្មល្អ(Good Agricultural Practice​-GAP) និងបានចុះបញ្ជីពាណិជ្ជកម្មកាលពីខែកក្កដាឆ្នាំ២០១៩។

លោក ណាល់ វិឆៃ ប្រធានផ្នែកបច្ចេកទេសកសិកម្មនៅបូកគោហ្វាម បានឱ្យដឹងថា ៖ កសិដ្ឋានបន្លែធម្មជាតិបូកគោ មានផ្ទៃដី១២ហិកតា ស្ថិតលើកំពូលភ្នំបូកគោ ហើយមានបន្លែជាង៣០មុខ សុទ្ធតែជាប្រភេទបន្លែដែលមានតម្រូវការទីផ្សារខ្ពស់។

បញ្ជាក់ប្រាប់បណ្ដាញព័ត៌មាន AMS Economy នៅក្នុងបេសកកម្ម «ផ្សព្វផ្សាយទ្រង់ទ្រាយធំពីសក្ដានុពលនៃការអភិវឌ្ឍក្រុងបូកគោ» ដែលរៀបចំដោយក្លឹបអ្នកកាសែតកម្ពុជា លោក ណាល់ វិឆៃ បានឱ្យដឹងថា៖ កសិដ្ឋានបន្លែសរីរាង្គនៅភ្នំបូកគោ អាចប្រមូលផលបាន ១,៥តោនក្នុង១ថ្ងៃ ដាក់លក់តាមបណ្ដាទីផ្សារនៅក្នុងប្រទេសកម្ពុជា។

អ្នកគ្រប់គ្រងកសិដ្ឋានរូបនេះបានបញ្ជាក់ថា បច្ចុប្បន្ន មានបន្លែចំនួន ៣០ប្រភេទ ដាំលើរងចំនួន ១២។ ស្ថិតលើផ្ទៃដី ១២ហិកតា កសិដ្ឋានបន្លែសរីរាង្គភ្នំបូកគោ ក៏គ្រោងនឹងពង្រីកផ្ទៃដីដាំបន្ថែមផងដែរ។

លោក ណាល់ វិឆៃ បានលើកឡើងថា៖

«បន្លែនៅកសិដ្ឋានបូកគោ គឺមានប្លែកជាងគេបើធៀបទៅបន្លែដែលមាននៅលើទីផ្សារ ព្រោះការដាំដុះបានស្រាវជ្រាវ និងថែទាំគ្រប់ជ្រុងជ្រោយសម្រាប់សុខភាពអ្នកបរិភោគ ហើយបានជ្រើសរើសគ្រាប់ពូជដែលមានសារធាតុចិញ្ចឹមខ្ពស់សម្រាប់ផ្ដល់ជូនអតិថិជននូវបន្លែដាំក្នុងស្រុកដែលល្អបំផុត» ។

ប្រធានផ្នែកបច្ចេកទេសកសិកម្មខាងលើបានបញ្ជាក់ឲ្យដឹងទៀតថា ៖ បន្លែដែលដាំនៅកសិដ្ឋានបូកគោហ្វាម គឺធានាបាននូវសុវត្ថិភាពចំណីអាហារមិនមានសារធាតុគីមី ដែលបងប្អូនប្រជាពលរដ្ឋអាចរកទិញបាននៅតាមផ្សារទំនើបជាច្រើននៅកម្ពុជា។

ទាក់ទងនឹងរោងដាំបន្លែនេះ លោក ណាល់ វិឆៃ បានបញ្ជាក់ថា ៖ ដំណាំបានត្រូវដាំក្នុងផ្ទះសំណាញ់ ដែលជាសំណង់មួយធ្វើពីដែក ឬ ឈើ ដែលហ៊ុព័ទ្ធដោយសំណាញ់បិទជិត។ បច្ចេកទេសមួយនេះ មានប្រសិទ្ធភាពខ្ពស់ក្នុងការការពារកត្តាចង្រៃក្នុងផលិតកម្មដំណាំ ការពារទឹកភ្លៀង ខ្យល់ ជាដើម៕