សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ សហព័ន្ធស្រូវអង្ករកម្ពុជា បានបង្ហាញរបាយការណ៍ថា ក្នុងរយៈពេល ៩ខែ ឆ្នាំ២០២៣នេះ ប្រទេសកម្ពុជារកចំណូលបានពីការនាំចេញស្រូវ-អង្ករ ឈានដល់កម្រិតមួយខ្ពស់ក្នុងតម្លៃ១១៩០លានដុល្លារ ដែលជាចំនួនទឹកប្រាក់ដ៏ច្រើនមួយជាប្រវត្តិសាស្ត្រ។ ចំនួនទឹកប្រាក់នេះ បានកើនឡើងប្រមាណ ៤០ភាគរយ បើធៀបនឹងរយៈពេលដូចគ្នាកាលពីឆ្នាំមុន ដែលមានតម្លៃត្រឹមតែ ៨៥០លានដុល្លារអាមេរិក។
តាមរបាយការណ៍ដដែលបានឱ្យដឹងទៀតថា ក្នុងរយៈពេល៩ខែ ឆ្នាំ២០២៣នេះ កម្ពុជាបាននាំចេញអង្ករចំនួន ៤៥ម៉ឺនតោន គិតជាទឹកប្រាក់ចំនួន ៣២៧,៤៥លានដុល្លារ កើនឡើង ១,៦ភាគរយ និង ១៤,១៣ភាគរយ រៀងគ្នា។ អង្ករទាំងនេះ ត្រូវបាននាំចេញដោយក្រុមហ៊ុនចំនួន ៥៥ក្រុមហ៊ុន ទៅកាន់គោលដៅចំនួន ៥៧ប្រទេសនៅជុំវិញពិភពលោក។
ការនាំចេញអង្ករទៅកាន់ប្រទេសចិន និងហុងកុង បានចំនួន ១៥ម៉ឺនតោន គិតជាទឹកប្រាក់ចំនួន ៩៩,៦៥លានដុល្លារ។ ដោយឡែកការនាំចេញទៅកាន់ប្រទេសនៅទ្វីបអឺរ៉ុបវិញ បានចំនួន ២៦ប្រទេស សម្រេចបានចំនួន ១៩ម៉ឺនតោន គិតជាទឹកប្រាក់ចំនួន ១៣៨,៩៨លានដុល្លារ។ ចំណែកឯការនាំចេញទៅកាន់ប្រទេសសមាជិកអាស៊ានចំនួន ៥ប្រទេស សម្រេចបានក្នុងបរិមាណចំនួនជាង ៤ម៉ឺនតោន គិតជាទឹកប្រាក់ចំនួន ៣១,៣២លានដុល្លារ និងគោលដៅផ្សេងទៀតនៅអាហ្វ្រិក មជ្ឈឹមបូព៌ាចំនួន ២៤ប្រទេស បានចំនួនជាង ៦ម៉ឺនតោន គិតជាទឹកប្រាក់បានចំនួន ៥៧,៤៩លានដុល្លារ។
ចំពោះការនាំចេញស្រូវ នៅក្នុងរយៈពេល ៩ខែ ឆ្នាំ២០២៣នេះ ប្រទេសកម្ពុជាក៏បាននាំចេញស្រូវចំនួន ៣លានតោន គិតជាទឹកប្រាក់បានប្រមាណ ៨៦២,៣៩លានដុល្លារអាមេរិក ក្នុងនោះជាង ៥៩% បាននាំចេញដោយឆ្លងកាត់ការស្នើសុំការបញ្ជាក់ឯកសារនាំចេញពីអាជ្ញាធរមានសមត្ថកិច្ច។ តួលេខនៃការនាំចេញស្រូវនេះ គឺមានកំណើនបរិមាណ ៣០,៦៣ភាគរយ និងកំណើនតម្លៃ ៥០ភាគរយ បើធៀបនឹងរយៈពេលដូចគ្នាកាលពីឆ្នាំមុន។
ឯកឧត្តម យ៉ង សាំងកុមារ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ កាលពីពេលថ្មីៗនេះបានបើកកិច្ចប្រជុំពិភាក្សាការងារជាមួយមន្ត្រីដែលពាក់ព័ន្ធ ដែលបានផ្តោតជាសំខាន់ទៅលើគោលបំណងបង្កើនការនាំវចេញអង្ករកម្ពុជាទៅកាន់ទីផ្សារអន្តរជាតិ។
ឯកឧត្តមបានបង្ហាញ និងពន្យល់ពីប្រភេទពូជផ្ការំដួល និងពូជសែនក្រអូប ដែលជាអង្ករល្អនៅកម្ពុជា មានលក្ខណៈពិសេស ហើយថែមទាំងទទួលបានពានរង្វាន់ ៥ឆ្នាំផងដែរ ដែលចង់ជំរុញនាំចេញទៅកាន់ទីផ្សារអន្តរជាតិ។ ការនាំចេញកសិផលកសិកម្មកម្ពុជា ជាពិសេសស្រូវអង្ករនេះ គឺជាកត្តាចាំបាច់ ដែលអាចជួយអោយកសិករមានទីផ្សារ តម្លៃបន្ថែមខ្ពស់ មានប្រសិទ្ធភាព និងនិរន្តរភាព។
សូមជម្រាបជូនថា គោលបំណងនៃកិច្ចប្រជុំនេះ គឺដើម្បីពិនិត្យលទ្ធភាពក្នុងការនាំចេញ ស្រូវអង្ករពីកម្ពុជាទៅកាន់ទីផ្សារប្រទេសមជ្ឈិមបូព៌ាដែលមានប្រទេស អ៊ីរ៉ង់ អ៊ីរ៉ាក់ ស៊ីរី ជាដើម ស្របពេលដែលកម្ពុជា និងអារ៉ាប៊ី សាអ៊ូឌីត បានប្តេជ្ញាចិត្តរួមគ្នាក្នុងការជំរុញពាណិជ្ជកម្ម ការវិនិយោគថាមពល និងវិស័យសក្តានុពលផ្សេងទៀត ដើម្បីផលប្រយោជន៍ទៅវិញទៅមកនៃប្រទេស និងប្រជាជនទាំង ២ ខណៈកម្ពុជាក៏រំពឹងនឹងទាក់ទាញការវិនិយោគលើវិស័យប្រេងកាត និងឧស្ម័នពីប្រទេសដែលផលិតប្រេងមួយនេះផងដែរ តាមរយៈដំណើរទស្សនកិច្ចរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា កាលពីពេលកន្លងទៅថ្មីៗនេះ៕
Account
Security
Favourite Content