សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ ក្នុងរយៈពេល៨ខែ ឆ្នាំ២០២៣នេះ កម្ពុជាទទួលបានអ្នកដំណើរតាមផ្លូវអាកាសចំនួនជាង ៣.៤លាននាក់ ដែលចំនួននេះកើនឡើងជាង ១៨០% បើធៀបនឹងរយៈពេលដូចគ្នាកាលពីឆ្នាំ២០២២។ នេះជាការបញ្ជាក់ឱ្យដឹងពីមន្រ្តីជាន់ខ្ពស់អាកាសចរណ៍ស៊ីវិល ដែលបានបង្ហាញពីភាពប្រសើរឡើងនៃវិស័យអាកាសចរណ៍របស់កម្ពុជា ក៏ដូចជាការងើបឡើងវិញនៃចំនួនភ្ញៀវទេសចរអន្តរជាតិ។
ឯកឧត្តម ស៊ីន ចាន់សិរីវុត្ថា អនុរដ្ឋលេខាធិការ និងជាអ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិល បានបញ្ជាក់ប្រាប់ថា អ្នកដំណើរតាមផ្លូវអាកាសរបស់កម្ពុជាដែលទទួលបានរយៈពេល៨ខែ ឆ្នាំ២០២៣ (គិតត្រឹមថ្ងៃទី៣១ ខែសីហា ឆ្នាំ២០២៣) មានចំនួនជាង ៣.៤លាននាក់ កើនឡើងជាង១៨០% បើធៀបទៅនឹងរយៈពេលដូចគ្នានៅឆ្នាំ២០២២ ។
អ្នកនាំពាក្យរូបនេះក៏បានបញ្ជាក់ថា សម្រាប់ជើងហោះហើរមានចំនួន ៣៣ ១៤៦ជើង (ចលនាទ្វេទិស) កើនឡើង ១១៤% បើធៀបទៅនឹងរយៈពេលដូចគ្នានៅឆ្នាំ២០២២។ ដោយឡែកចំពោះការដឹកជញ្ជូនទំនិញតាមផ្លូវអាកាសវិញ មានចំនួនជាង ៣៤ ៨៨១ តោន ថយចុះជាង ១០% បើធៀបទៅនឹងរយៈពេលដូចគ្នានៅឆ្នាំ២០២២។
សូមជម្រាបថា ស្របពេលដែលវិស័យអាកាសចរណ៍នៅកម្ពុជា ចាប់ផ្តើមងើបឡើងវិញជាបណ្តើរៗក្រោយការរីករាលដាលនៃជំងឺកូវីដ-១៩ ក្រុមហ៊ុនអាកាសចរណ៍ Qatar Airway ដែលជាក្រុមហ៊ុនអាកាសចរណ៍ដ៏ធំមួយនៅលើពិភពលោក នឹងចាប់ផ្តើមបើកជើងហោះហើរមកកម្ពុជាឡើងវិញនៅចុងខែតុលា ឆ្នាំ២០២៣នេះ ខណៈកម្ពុជាកំពុងស្នើដល់ក្រុមហ៊ុនអាកាសចរណ៍របស់ជប៉ុន ANA ពិនិត្យលទ្ធភាពបើកជើងហោះហើរជាមួយកម្ពុជាឡើងវិញ ក្នុងពេលឆាប់ៗនេះ បន្ទាប់ពីខកខានអស់ពេល ៤ឆ្នាំដោយសារតែវិបត្តិជំងឺកូវីដ-១៩។
ជាមួយនេះ កម្ពុជាក៏ត្រៀមដាក់ឱ្យដំណើរអាកាសយានដ្ឋានអន្តរជាតិសៀមរាបអង្គរថ្មី នៅថ្ងៃទី១៦ ខែតុលា ឆ្នាំ២០២៣ខាងមុខនេះផងដែរ ដើម្បីទទួលអ្នកដំណើរតាមផ្លូវអាកាសបន្ថែម។
សម្រាប់វិស័យឯកជនបានសាទរនូវអ្វីដែលកម្ពុជាបានត្រៀមសម្រាប់អ្នកដំណើរទេសចរអន្តរជាតិ នូវអាកាសយានដ្ឋានអន្តរជាតិសៀមរាបអង្គរថ្មី ដែលរំពឹងថានឹងនាំមកនូវភ្ញៀវទេសចរបន្ថែមទៀតមកកាន់កម្ពុជា ដើម្បីទស្សនាតំបន់ទេសចរណ៍ធម្មជាតិ តំបន់ទេសចរណ៍ប្រាសាទបុរាណ រមណីយដ្ឋានវប្បធម៌ប្រវត្តិសាស្រ្ត និងតំបន់អេកូទេសចរណ៍ជាដើម។
លោកជំទាវ ឆាយ ស៊ីវលីន ប្រធានសមាគមទីភ្នាក់ទេសចរណ៍កម្ពុជា (CATA) បានប្រាប់ AMS ថា តាមតួលេខឃើញមានកំណើន ប៉ុន្តែតំបន់ទេសចរណ៍មួយចំនួន ដូចជាខេត្តសៀមរាបជាដើម ការកើនឡើងនៃភ្ញៀវទេសចរនៅមានកម្រិត ព្រោះភ្ញៀវដែលចូលមកកម្ពុជា មិនមែនជាអ្នកទេសចរសុទ្ធនោះទេ គឺជាពាណីជ្ជករ អ្នកវិនិយោគ និងភ្ញៀវដែលមានបេសកកម្មផ្សេងៗ មកចូលរួមកិច្ចប្រជុំនានា។
លោកជំទាវ បញ្ជាក់ថា ទោះយ៉ាងណាពេលនេះជារដូវភ្លៀង បើផុតខែនេះ នឹងមានការធ្វើដំណើរនៃភ្ញៀវទេសចរមកកាន់កម្ពុជា ព្រោះមកដល់ពេលនេះ មានភ្ញៀវកក់កន្លែងច្រើនហើយសម្រាប់ខែតុលាខាងមុខ ស្របពេលដែលរដ្ឋាភិបាលនឹងបើកអាកាសយានដ្ឋានអន្តរជាតិសៀមរាបអង្គរថ្មី ដែលជាព្រលានទំនើបអាចទទួលយន្តហោះធុនធំបាន និងទទួលបានការហោះហើរដោយត្រង់ពីប្រទេសឆ្ងាយៗ ដែលរំពឹងថានឹងនាំភ្ញៀវទេសចរមកកាន់កម្ពុជា។
លោកជំទាវបានបញ្ជាក់ថា សមាគមនៅមានការបារម្ភពីការផ្សព្វផ្សាយព័ត៌មានក្លែងក្លាយពីកម្ពុជា, សមាគមបាន និងកំពុងធ្វើការជាច្រើនជាមួយដៃគូនៅក្រៅប្រទេស និងផ្សព្វផ្សាយតាមរយៈការតាំងពិព័រណ៍ទេសចរណ៍នៅតាមប្រទេសនីមួយៗក្នុងតំបន់អាស៊ាន ហើយរដ្ឋាភិបាលក៏មានកម្មវិធីសំខាន់ៗពាក់ព័ន្ធនឹងការរៀបចំព្រឹត្តិការណ៍ទេសចរណ៍ ដែលរួមចំណែកដល់ការផ្សព្វផ្សាយវិស័យទេសចរណ៍កម្ពុជាទៅកាន់ពិភពលោក។
លោកជំទាវ ឆាយ ស៊ីវលីន បានលើកឡើងថា ដើម្បីជំរុញវិស័យទេសចរណ៍ រាជរដ្ឋាភិបាលគួរតែលើកទឹកចិត្តតាមយន្តការណាមួយដល់វិស័យឯកជន ដើម្បីឱ្យពួកគាត់បន្តនិរន្តរភាព ហើយដើម្បីអាចទាក់ទាញភ្ញៀវបានលុះត្រាតែមានផលិតផលក្នុងវិស័យទេសចរណ៍រស់រវើក សម្បូរបែប ទើបអាចធ្វើការប្រកួតប្រជែងជាមួយប្រទេសជិតខាងបាន ព្រោះអាជីវកម្មក្នុងវិស័យទេសចរណ៍មិនទាន់អាចស្តារឡើងវិញភ្លាមៗ ក្រោយវិបត្តិកូវីដ-១៩ នោះទេ។
សូមបញ្ជាក់ថា ក្រសួងទេសចរណ៍មានចក្ខុវិស័យនៅឆ្នាំ២០២៥ នឹងទទួលបានទេសចរអន្តរជាតិ ៦.៤លាននាក់ ជាមួយទេសចរជាតិ ១៦.៧លាននាក់ ហើយនៅឆ្នាំ២០២៦ នឹងទទួលបានទេសចរអន្តរជាតិ ៧លាននាក់ ជាមួយទេសចរជាតិប្រមាណ១៧លាននាក់៕
Account
Security
Favourite Content