សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ ក្នុងរយៈពេល៥ ខែនៃឆ្នាំ២០២៤ កម្ពុជា បាននាំចេញសម្លៀកបំពាក់ ស្បែកជើង និងទំនិញធ្វើដំណើរបានកើនឡើង២០,៦៩ ភាគរយ ធៀបនឹងរយៈពេលដូចគ្នាកាលពីឆ្នាំមុន ដែលរកចំណូលបាន៤,៨៩ ពាន់លានដុល្លារ។ នេះបើយោងតាមទិន្នន័យរបស់អគ្គនាយកដ្ឋានគយ និងរដ្ឋាករកម្ពុជា។
យោងតាមទិន្នន័យដដែលបានឱ្យដឹងថា ក្នុងអំឡុងខែមករាដល់ខែឧសភា ឆ្នាំ២០២៤ ផ្នែកទាំងអស់ដែលស្ថិតនៅក្រោមវិស័យសម្លៀកបំពាក់ ស្បែកជើង និងទំនិញធ្វើដំណើរ មានដំណើរការល្អដោយបានបង្កើនការនាំចេញបើប្រៀបធៀបនឹងរយៈពេលដូចគ្នាកាលពីឆ្នាំមុន។
ការនាំចេញសម្លៀកបំពាក់ ស្បែកជើង និងទំនិញធ្វើដំណើរមានសន្ទុះឡើងវិញនៅឆ្នាំនេះបន្ទាប់ពីបានធ្លាក់ចុះអស់រយៈពេលជិត១៨ ខែចាប់តាំងពីពាក់កណ្តាលឆ្នាំ២០២២។ កំណើននេះបានជួយសម្រួលបន្ទុករបស់រដ្ឋាភិបាលដែលកំពុងតែផ្តល់ជំនួយជាសាច់ប្រាក់ដល់កម្មករក្នុងវិស័យនេះ ដែលបានបាត់បង់ការងារបន្ទាប់ពីការបិទរោងចក្រ ឬព្យួរការងារ។
ការនាំចេញសម្លៀកបំពាក់ប៉ាក់ និងគ្រឿងសម្លៀកបំពាក់រកចំណូលបាន ២,១៨ ពាន់លានដុល្លារ កើនឡើង ១៧,៩ ភាគរយ បើធៀបនឹងខែមករា ដល់ខែឧសភា ឆ្នាំ ២០២៣។ សម្លៀកបំពាក់ដែលមិនមែនជាប៉ាក់រកចំណូលបាន ១,២៤ ពាន់លានដុល្លារ កើនឡើង ៣២,២ ភាគរយធៀបនឹងឆ្នាំមុន។
ការនាំចេញស្បែកជើង រកចំណូលបាន ៦១៥ លានដុល្លារ ក្នុងរយៈពេល៥ ខែដំបូង ក្នុងឆ្នាំនេះ កើនឡើង ១០,១ ភាគរយ បើប្រៀបធៀបនឹងឆ្នាំមុន និងផលិតផលស្បែក និងទំនិញធ្វើដំណើរចំនួន ៧៦២ លានដុល្លារ ជាមួយនឹងកំណើន ១៩,៤ ភាគរយ ក្នុងរយៈពេលដូចគ្នា។
ផលិតផលវាយនភ័ណ្ឌផ្សេងទៀតរកចំណូលបាន ៨៧ លានដុល្លារពីខែមករាដល់ខែឧសភាឆ្នាំ២០២៤ ដោយបានចុះបញ្ជីកំណើន ៣៨,៨ ភាគរយបើធៀបនឹងរយៈពេលដូចគ្នាកាលពីឆ្នាំមុន។
នៅក្នុងខែឧសភា ឆ្នាំ២០២៤ ការនាំចេញយសម្លៀកបំពាក់ ស្បែកជើង និងទំនិញធ្វើដំណើររកចំណូលបាន១,១៩ ពាន់លានដុល្លារ កើនឡើង៣១,៨៤ ភាគរយ បើធៀបនឹងខែឧសភា ឆ្នាំ២០២៣៕
បើយោងតាមអង្គការពលកម្មអន្តរជាតិខាងការងារ (ILO) បានឱ្យដឹងថា វិស័យសម្លៀកបំពាក់ ស្បែកជើង និងទំនិញធ្វើដំណើរ បានបង្កើតឱកាសការងារជាច្រើននៅក្នុងប្រទេសកម្ពុជា។ វិស័យនេះ មាន១១ ភាគរយនៃសេដ្ឋកិច្ច និងបានរួមចំណែកប្រហែល ៥០ភាគរយនៃកំណើនផលិតផលក្នុងស្រុកសរុប(GDP) របស់កម្ពុជា ក្នុងឆ្នាំ២០២១។
គួររំលឹកផងដែរថា ការនាំចេញយសម្លៀកបំពាក់ ស្បែកជើង និងទំនិញធ្វើដំណើររបស់កម្ពុជាបានធ្លាក់ចុះ ១៣,៣១ ភាគរយក្នុងឆ្នាំ២០២៣ ពី១២,៨០ ពាន់លានដុល្លារក្នុងឆ្នាំ២០២២ ដល់ ១១,០៩ ពាន់លានដុល្លារ ដែលនាំឱ្យមានការព្យួរការងាររបស់កម្មករជាច្រើន៕
Account
Security
Favourite Content